1 Kurinthiyon 12

ek rooh aur mukhtalif nemten

¹bhaaiyo, main naheen chaahata ki aap ruhaanee nemton kay baaray men naavaaqif rahen. ²aap jaantay hain ki eemaan laanay say peshtar aap ko baar baar bahekaaya aur goongay buton kee taraf khaincha jaata tha. ³isee kay pesh-ay-nazar main aap ko aagaah karta hoon ki allaah kay rooh kee hidaayat say bolnay vaala kabhee naheen kahega, “eesa par laanat.” aur rooh-ul-quds kee hidaayat say bolnay vaalay kay siva koee naheen kahega, “eesa khudaavand hai.”

⁴go tarah tarah kee nemten hotee hain, lekin rooh ek hee hai. ⁵tarah tarah kee khidmaten hotee hain, lekin khudaavand ek hee hai. ⁶allaah apnee qudrat ka izhaar mukhtalif andaaz say karta hai, lekin khuda ek hee hai jo sab men har tarah ka kaam karta hai. ⁷ham men say har ek men rooh-ul-quds ka izhaar kisee nemat say hota hai. yah nemten is liyay dee jaatee hain taaki ham ek doosray kee madad karen. ⁸ek ko rooh-ul-quds hikmat ka kalaam ata karta hai, doosray ko vahee rooh ilm-o-irfaan ka kalaam. ⁹teesray ko vahee rooh pukhta eemaan deta hai aur chauthay ko vahee ek rooh shifa denay kee nemten. ¹⁰vah ek ko mojizay karnay kee taaqat deta hai, doosray ko nubuvvat karnay kee salaahiyat aur teesray ko mukhtalif roohon men imtiyaaz karnay kee nemat. ek ko us say ghairzabaanen bolnay kee nemat miltee hai aur doosray ko in ka tarjuma karnay kee. ¹¹vahee ek rooh yah tamaam nemten taqseem karta hai. aur vahee faisla karta hai ki kis ko kya nemat milnee hai.

ek jism aur mukhtalif aazaa

¹²insaanee jism kay bahut say aaza hotay hain, lekin yah tamaam aaza ek hee badan ko tashkeel detay hain. maseeh ka badan bhee aisa hai. ¹³khwaah ham yahoodee thay ya yoonaanee, ghulaam thay ya aazaad, baptismay say ham sab ko ek hee rooh kee maarifat ek hee badan men shaamil kiya gaya hai, ham sab ko ek hee rooh pilaaya gaya hai.

¹⁴badan kay bahut say hissay hotay hain, na sirf ek. ¹⁵farz karen ki paaon kahay, “main haath naheen hoon is liyay badan ka hissa naheen.” kya yah kahenay par us ka badan say taalluq khatm ho jaaega? ¹⁶ya farz karen ki kaan kahay, “main aankh naheen hoon is liyay badan ka hissa naheen.” kya yah kahenay par us ka badan say naata toot jaaega? ¹⁷agar poora jism aankh hee hota to phir sunnay kee salaahiyat kahaan hotee? agar saara badan kaan hee hota to phir soonghnay ka kya banta? ¹⁸lekin allaah nay jism kay mukhtalif aaza bana kar har ek ko vahaan lagaaya jahaan vah chaahata tha. ¹⁹agar ek hee uzv poora jism hota to phir yah kis qism ka jism hota? ²⁰naheen, bahut say aaza hotay hain, lekin jism ek hee hai.

²¹aankh haath say naheen kah saktee, “mujhay teree zaroorat naheen,” na sar paaon say kah sakta hai, “mujhay tumhaaree zaroorat naheen.” ²²balki agar dekha jaaay to aksar aisa hota hai ki jism kay jo aaza ziyaada kamzor lagtay hain un kee ziyaada zaroorat hotee hai. ²³vah aaza jinhen ham kam izzat kay laaiq samajhtay hain unhen ham ziyaada izzat kay saath dhaamp letay hain, aur vah aaza jinhen ham sharm say chhupa kar rakhtay hain un hee ka ham ziyaada ehatiraam kartay hain. ²⁴is kay bar’aks hamaaray izzatdaar aaza ko is kee zaroorat hee naheen hotee ki ham un ka khaas ehatiraam karen. lekin allaah nay jism ko is tarah tarteeb diya ki us nay kamaqdar aaza ko ziyaada izzatdaar thaheraaya, ²⁵taaki jism kay aaza men tafriqa na ho balki vah ek doosray kee fikr karen. ²⁶agar ek uzv dukh men ho to us kay saath deegar tamaam aaza bhee dukh mahsoos kartay hain. agar ek uzv sarfaraaz ho jaaay to us kay saath baaqee tamaam aaza bhee masroor hotay hain.

²⁷aap sab mil kar maseeh ka badan hain aur infiraadee taur par us kay mukhtalif aaza. ²⁸aur allaah nay apnee jamaaat men pahelay rasool, doosray nabee aur teesray ustaad muqarrar kiay hain. phir us nay aisay log bhee muqarrar kiay hain jo mojizay kartay, shifa detay, doosron kee madad kartay, intizaam chalaatay aur mukhtalif qism kee ghairzabaanen boltay hain. ²⁹kya sab rasool hain? kya sab nabee hain? kya sab ustaad hain? kya sab mojizay kartay hain? ³⁰kya sab ko shifa denay kee nemten haasil hain? kya sab ghairzabaanen boltay hain? kya sab in ka tarjuma kartay hain? ³¹lekin aap un nemton kee talaash men rahen jo afzal hain.

ab main aap ko is say kaheen umda raah bataata hoon.