1 Kurinthiyon 11

¹meray namoonay par chalen jis tarah main maseeh kay namoonay par chalta hoon.

ibaadat men khavaateen ka kirdaar

²shaabaash ki aap har tarah say mujhay yaad rakhtay hain. aap nay rivaayaat ko yoon mahfooz rakha hai jis tarah main nay unhen aap kay sapurd kiya tha. ³lekin main aap ko ek aur baat say aagaah karna chaahata hoon. har mard ka sar maseeh hai jabki aurat ka sar mard aur maseeh ka sar allaah hai. ⁴agar koee mard sar dhaank kar dua ya nubuvvat karay to vah apnay sar kee beizzatee karta hai. ⁵aur agar koee khaatoon nangay sar dua ya nubuvvat karay to vah apnay sar kee beizzatee kartee hai, goya vah sar mundee hai. ⁶jo aurat apnay sar par dopatta naheen letee vah tind karvaaay. lekin agar tind karvaana ya sar mundavaana us kay liyay beizzatee ka baais hai to phir vah apnay sar ko zaroor dhaankay. ⁷lekin mard kay liyay laazim hai ki vah apnay sar ko na dhaankay kyoonki vah allaah kee soorat aur jalaal ko mun’akis karta hai. lekin aurat mard ka jalaal mun’akis kartee hai, ⁸kyoonki pahela mard aurat say naheen nikla balki aurat mard say niklee hai. ⁹mard ko aurat kay liyay khalaq naheen kiya gaya balki aurat ko mard kay liyay. ¹⁰is vajah say aurat farishton ko pesh-ay-nazar rakh kar apnay sar par dopatta lay jo us par ikhtiyaar ka nishaan hai. ¹¹lekin yaad rahay ki khudaavand men na aurat mard kay baghair kuchh hai aur na mard aurat kay baghair. ¹²kyoonki agarchi ibtida men aurat mard say niklee, lekin ab mard aurat hee say paida hota hai. aur har shay allaah say nikaltee hai.

¹³aap khud faisla karen. kya munaasib hai ki koee aurat allaah kay saamnay nangay sar dua karay? ¹⁴kya fitrat bhee yah naheen sikhaatee ki lambay baal mard kee beizzatee ka baais hain ¹⁵jabki aurat kay lambay baal us kee izzat ka moojib hain? kyoonki baal usay dhaampnay kay liyay diay gaay hain. ¹⁶lekin is silsilay men agar koee jhagadnay ka shauq rakhay to jaan lay ki na hamaara yah dastoor hai, na allaah kee jamaaaton ka.

asha-ay-rabbaanee

¹⁷main aap ko ek aur hidaayat deta hoon. lekin is silsilay men meray paas aap kay liyay taareefee alfaaz naheen, kyoonki aap ka jama hona aap kee behatree ka baais naheen hota balki nuqsaan ka baais. ¹⁸avval to main sunta hoon ki jab aap jamaaat kee soorat men ikatthay hotay hain to aap kay darmiyaan paarteebaazee nazar aatee hai. aur kisee hadd tak mujhay is ka yaqeen bhee hai. ¹⁹laazim hai ki aap kay darmiyaan mukhtalif paartiyaan nazar aaen taaki aap men say vah zaahir ho jaaen jo aazmaanay kay baad bhee sachchay niklen. ²⁰jab aap jama hotay hain to jo khaana aap khaatay hain us ka asha-ay-rabbaanee say koee taalluq naheen raha. ²¹kyoonki har shakhs doosron ka intizaar kiay baghair apna khaana khaanay lagta hai. nateejay men ek bhooka raheta hai jabki doosray ko nasha ho jaata hai. ²²taajjub hai! kya khaanay-peenay kay liyay aap kay ghar naheen? ya kya aap allaah kee jamaaat ko haqeer jaan kar un ko jo khaalee haath aaay hain sharminda karna chaahatay hain? main kya kahoon? kya aap ko shaabaash doon? is men main aap ko shaabaash naheen day sakta.

²³kyoonki jo kuchh main nay aap kay sapurd kiya hai vah mujhay khudaavand hee say mila hai. jis raat khudaavand eesa ko dushman kay havaalay kar diya gaya us nay rotee lay kar ²⁴shukrguzaaree kee dua kee aur usay tukday karkay kaha, “yah mera badan hai jo tumhaaray liyay diya jaata hai. mujhay yaad karnay kay liyay yahee kiya karo.” ²⁵isee tarah us nay khaanay kay baad piyaala lay kar kaha, “mai ka yah piyaala vah naya ahd hai jo meray khoon kay zareeay qaaim kiya jaata hai. jab kabhee isay piyo to mujhay yaad karnay kay liyay piyo.” ²⁶kyoonki jab bhee aap yah rotee khaatay aur yah piyaala peetay hain to khudaavand kee maut ka elaan kartay hain, jab tak vah vaapas na aaay.

²⁷chunaanchay jo naalaaiq taur par khudaavand kee rotee khaaay aur us ka piyaala piay vah khudaavand kay badan aur khoon ka gunaah karta hai aur qusoorvaar thaherega. ²⁸har shakhs apnay aap ko parakh kar hee is rotee men say khaaay aur piyaalay men say piay. ²⁹jo rotee khaatay aur piyaala peetay vaqt khudaavand kay badan ka ehatiraam naheen karta vah apnay aap par allaah kee adaalat laata hai. ³⁰isee liyay aap kay darmiyaan bahuteray kamzor aur beemaar hain balki bahut say maut kee neend so chukay hain. ³¹agar ham apnay aap ko jaanchtay to allaah kee adaalat say bachay rahetay. ³²lekin khudaavand hamaaree adaalat karnay say hamaaree tarbiyat karta hai taaki ham duniya kay saath mujrim na thaheren.

³³gharaz meray bhaaiyo, jab aap khaanay kay liyay jama hotay hain to ek doosray ka intizaar karen. ³⁴agar kisee ko bhook lagee ho to vah apnay ghar men hee khaana kha lay taaki aap ka jama hona aap kee adaalat ka baais na thaheray. deegar hidaayaat main aap ko us vaqt doonga jab aap kay paas aaoonga.