1 Kurinthiyon 10

israaeel ka ibratanaak tajribaa

¹bhaaiyo, main naheen chaahata ki aap is baat say naavaaqif rahen ki hamaaray baapdaada sab baadal kay neechay thay. vah sab samundar men say guzray. ²un sab nay baadal aur samundar men moosa ka baptisma liya. ³sab nay ek hee ruhaanee khuraak khaaee ⁴aur sab nay ek hee ruhaanee paanee piya. kyoonki maseeh ruhaanee chataan kee soorat men un kay saath saath chalta raha aur vahee un sab ko paanee pilaata raha. ⁵is kay baavujood un men say beshatar log allaah ko pasand na aaay, is liyay vah registaan men halaak ho gaay.

⁶yah sab kuchh hamaaree ibrat kay liyay vaaqay hua taaki ham un logon kee tarah buree cheezon kee havas na karen. ⁷un men say baaz kee tarah butparast na banen, jaisay muqaddas navishton men likha hai, “log khaanay-peenay kay liyay baith gaay aur phir uth kar rangraliyon men apnay dil bahelaanay lagay.” ⁸ham zina bhee na karen jaisay un men say baaz nay kiya aur nateejay men ek hee din men 23,000 afraad dher ho gaay. ⁹ham khudaavand kee aazmaaish bhee na karen jis tarah un men say baaz nay kee aur nateejay men saampon say halaak huay. ¹⁰aur na budabudaaen jis tarah un men say baaz budbudaanay lagay aur nateejay men halaak karnay vaalay farishtay kay haathon maaray gaay.

¹¹yah maajray ibrat kee khaatir un par vaaqay huay aur ham akheer zamaanay men rahenay vaalon kee naseehat kay liyay likhay gaay.

¹²gharaz jo samajhta hai ki vah mazbootee say khada hai, khabardaar rahay ki gar na paday. ¹³aap sirf aisee aazmaaishon men paday hain jo insaan kay liyay aam hotee hain. aur allaah vafaadaar hai. vah aap ko aap kee taaqat say ziyaada aazmaaish men naheen padnay dega. jab aap aazmaaish men pad jaaengay to vah us men say nikalnay kee raah bhee paida kar dega taaki aap usay bardaasht kar saken.

asha-ay-rabbaanee aur butparastee men tazaad

¹⁴gharaz meray piyaaro, butparastee say bhaagen. ¹⁵main aap ko samajhdaar jaan kar baat kar raha hoon. aap khud meree is baat ka faisla karen. ¹⁶jab ham asha-ay-rabbaanee kay mauqay par barkat kay piyaalay ko barkat day kar us men say peetay hain to kya ham yoon maseeh kay khoon men shareek naheen hotay? aur jab ham rotee tod kar khaatay hain to kya maseeh kay badan men shareek naheen hotay? ¹⁷rotee to ek hee hai, is liyay ham jo bahut say hain ek hee badan hain, kyoonki ham sab ek hee rotee men shareek hotay hain.

¹⁸banee israaeel par ghaur karen. kya bait-ul-muqaddas men qurbaaniyaan khaanay vaalay qurbaangaah kee rifaaqat men shareek naheen hotay? ¹⁹kya main yah kahena chaahata hoon ki buton kay chadhaavay kee koee haisiyat hai? ya ki but kee koee haisiyat hai? hargiz naheen. ²⁰main yah kaheta hoon ki jo qurbaaniyaan vah guzaraantay hain allaah ko naheen balki shayaateen ko guzaraantay hain. aur main naheen chaahata ki aap shayaateen kee rifaaqat men shareek hon. ²¹aap khudaavand kay piyaalay aur saath hee shayaateen kay piyaalay say naheen pee saktay. aap khudaavand kay rifaaqtee khaanay aur saath hee shayaateen kay rifaaqtee khaanay men shareek naheen ho saktay. ²²ya kya ham allaah kee ghairat ko uksaana chaahatay hain? kya ham us say taaqatvar hain?

doosron kay zameer ka lihaaz karnaa

²³sab kuchh rava to hai, lekin sab kuchh mufeed naheen. sab kuchh jaaiz to hai, lekin sab kuchh hamaaree taameer-o-taraqqee ka baais naheen hota. ²⁴har koee apnay hee faaiday kee talaash men na rahay balki doosray kay.

²⁵baazaar men jo kuchh bikta hai usay khaaen aur apnay zameer ko mutmain karnay kee khaatir poochhgichh na karen, ²⁶kyoonki “zameen aur jo kuchh us par hai rabb ka hai.”

²⁷agar koee ghaireemaandaar aap kee daavat karay aur aap us daavat ko qabool kar len to aap kay saamnay jo kuchh bhee rakha jaaay usay khaaen. apnay zameer kay itmeenaan kay liyay tafteesh na karen. ²⁸lekin agar koee aap ko bata day, “yah buton ka chadhaava hai” to phir us shakhs kee khaatir jis nay aap ko aagaah kiya hai aur zameer kee khaatir usay na khaaen. ²⁹matlab hai apnay zameer kee khaatir naheen balki doosray kay zameer kee khaatir. kyoonki yah kis tarah ho sakta hai ki kisee doosray ka zameer meree aazaadee kay baaray men faisla karay? ³⁰agar main khuda ka shukr karkay kisee khaanay men shareek hota hoon to phir mujhay kyoon bura kaha jaaay? main to usay khuda ka shukr karkay khaata hoon.

³¹chunaanchay sab kuchh allaah kay jalaal kee khaatir karen, khwaah aap khaaen, pien ya aur kuchh karen. ³²kisee kay liyay thokar ka baais na banen, na yahoodiyon kay liyay, na yoonaaniyon kay liyay aur na allaah kee jamaaat kay liyay. ³³isee tarah main bhee sab ko pasand aanay kee har mumkin koshish karta hoon. main apnay hee faaiday kay khayaal men naheen raheta balki doosron kay taaki bahuteray najaat paaen.