1 Kurinthiyon 1
salaam
1yah khat paulus kee taraf say hai, jo allaah kay iraaday say maseeh eesa ka bulaaya hua rasool hai, aur hamaaray bhaaee sosthines kee taraf say.
2main kurinthus men maujood allaah kee jamaaat ko likh raha hoon, aap ko jinhen maseeh eesa men muqaddas kiya gaya hai, jinhen muqaddas honay kay liyay bulaaya gaya hai. saath hee yah khat un tamaam logon kay naam bhee hai jo har jagah hamaaray khudaavand eesa maseeh ka naam letay hain jo un ka aur hamaara khudaavand hai.
3hamaara khuda baap aur khudaavand eesa maseeh aap ko fazl aur salaamatee ata karen.
shukr
4main hamesha aap kay liyay khuda ka shukr karta hoon ki us nay aap ko maseeh eesa men itna fazl bakhsha hai. 5aap ko us men har lihaaz say daulatmand kiya gaya hai, har qism kee taqreer aur ilm-o-irfaan men. 6kyoonki maseeh kee gavaahee nay aap kay darmiyaan zor pakad liya hai, 7is liyay aap ko hamaaray khudaavand eesa maseeh kay zuhoor ka intizaar kartay kartay kisee bhee barkat men kamee naheen. 8vahee aap ko aakhir tak mazboot banaaay rakhega, is liyay aap hamaaray khudaavand eesa maseeh kee doosree aamad kay din beilzaam thaherengay. 9allaah par poora etimaad kiya ja sakta hai jis nay aap ko bula kar apnay farzand hamaaray khudaavand eesa maseeh kee rifaaqat men shareek kiya hai.
kurinthiyon kee paarteebaazee
10bhaaiyo, main apnay khudaavand eesa maseeh kay naam men aap ko taakeed karta hoon ki aap sab ek hee baat kahen. aap kay darmiyaan paarteebaazee naheen balki ek hee soch aur ek hee raay honee chaahiay. 11kyoonki meray bhaaiyo, aap kay baaray men mujhay khaloay kay ghar vaalon say maaloom hua hai ki aap jhagdon men ulajh gaay hain. 12matlab yah hai ki aap men say koee kaheta hai, “main paulus kee paartee ka hoon,” koee “main apullos kee paartee ka hoon,” koee “main kaifa kee paartee ka hoon” aur koee ki “main maseeh kee paartee ka hoon.” 13kya maseeh bat gaya? kya aap kee khaatir paulus ko saleeb par chadhaaya gaya? ya kya aap ko paulus kay naam say baptisma diya gaya?
14khuda ka shukr hai ki main nay aap men say kisee ko baptisma naheen diya siva-ay-krispus aur gayus kay. 15is liyay koee naheen kah sakta ki main nay paulus kay naam say baptisma paaya hai. 16haan main nay stifanaas kay gharaanay ko bhee baptisma diya. lekin jahaan tak mera khayaal hai is kay ilaava kisee aur ko baptisma naheen diya. 17maseeh nay mujhay baptisma denay kay liyay rasool bana kar naheen bheja balki is liyay ki allaah kee khushkhabaree sunaaoon. aur yah kaam mujhay duniyaavee hikmat say aaraasta taqreer say naheen karna hai taaki maseeh kee saleeb kee taaqat beasar na ho jaaay.
saleeb ka paighaam
18kyoonki saleeb ka paighaam un kay liyay jin ka anjaam halaakat hai bevuqoofee hai jabki hamaaray liyay jin ka anjaam najaat hai yah allaah kee qudrat hai. 19chunaanchay paak navishton men likha hai,
“main daanishmandon kee daanish ko tabaah karoongaa
aur samajhdaaron kee samajh ko radd karoonga.”
20ab daanishmand shakhs kahaan hai? aalim kahaan hai? is jahaan ka munaazray ka maahir kahaan hai? kya allaah nay duniya kee hikmat-o-daanaaee ko bevuqoofee saabit naheen kiya?
21kyoonki agarchi duniya allaah kee daanaaee say ghiree huee hai to bhee duniya nay apnee daanaaee kee badaulat allaah ko na pahechaana. is liyay allaah ko pasand aaya ki vah saleeb kay paighaam kee bevuqoofee kay zareeay hee eemaan rakhnay vaalon ko najaat day. 22yahoodee taqaaza kartay hain ki ilaahee baaton kee tasdeeq ilaahee nishaanon say kee jaaay jabki yoonaanee daanaaee kay vaseelay say in kee tasdeeq kay khwaahaan hain. 23is kay muqaablay men ham maseeh-ay-masloob kee munaadee kartay hain. yahoodee is say thokar kha kar naaraaz ho jaatay hain jabki ghairyahoodee isay bevuqoofee qaraar detay hain. 24lekin jo allaah kay bulaaay huay hain, khwaah vah yahoodee hon khwaah yoonaanee, un kay liyay maseeh allaah kee qudrat aur allaah kee daanaaee hota hai. 25kyoonki allaah kee jo baat bevuqoofee lagtee hai vah insaan kee daanaaee say ziyaada daanishmand hai. aur allaah kee jo baat kamzor lagtee hai vah insaan kee taaqat say ziyaada taaqatvar hai.
26bhaaiyo, is par ghaur karen ki aap ka kya haal tha jab khuda nay aap ko bulaaya. aap men say kam hain jo duniya kay meyaar kay mutaabiq daana hain, kam hain jo taaqatvar hain, kam hain jo aalee khaandaan say hain. 27balki jo duniya kee nigaah men bevuqoof hai usay allaah nay chun liya taaki daanaaon ko sharminda karay. aur jo duniya men kamzor hai usay allaah nay chun liya taaki taaqatavaron ko sharminda karay. 28isee tarah jo duniya kay nazdeek zaleel aur haqeer hai usay allaah nay chun liya. haan, jo kuchh bhee naheen hai usay us nay chun liya taaki usay nest karay jo bazaahir kuchh hai. 29chunaanchay koee bhee allaah kay saamnay apnay par fakhar naheen kar sakta. 30yah allaah kee taraf say hai ki aap maseeh eesa men hain. allaah kee bakhshish say eesa khud hamaaree daanaaee, hamaaree raastbaazee, hamaaree taqdees aur hamaaree makhlsee ban gaya hai. 31is liyay jis tarah kalaam-ay-muqaddas farmaata hai, “fakhar karnay vaala khudaavand hee par fakhar karay.”