Zakariyāh 7
tum merī sunne se inkār karte ho
1dārā bādshāh kī hukūmat ke chauthe sāl meṅ rabb zakariyāh se hamkalām huā. kislev yānī navveṅ mahīne kā chauthā din [a] 4 disambar. thā. 2us vaqt bait-el shahar ne sarāzar aur rajam-malik ko us ke ādmiyoṅ samet yarūshalam bhejā thā tāki rabb se iltimās kareṅ. 3sāth sāth unheṅ rabb-ul-afwāj ke ghar ke imāmoṅ ko yah savāl pesh karnā thā, “ab ham kaī sāl se pāṅchveṅ mahīne meṅ rozā rakh kar rabb ke ghar kī tabāhī par mātam karte āe haiṅ. kyā lāzim hai ki ham yah dastūr āindā bhī jārī rakheṅ?”
4tab mujhe rabb-ul-afwāj se javāb milā, 5“mulk ke tamām bāshindoṅ aur imāmoṅ se kah, ‘beshak tum 70 sāl se pāṅchveṅ aur sātveṅ mahīne meṅ rozā rakh kar mātam karte āe ho. lekin kyā tum ne yah dastūr vāqaī merī ḵẖātir adā kiyā? hargiz nahīṅ! 6īdoṅ par bhī tum khāte-pīte vaqt sirf apnī hī ḵẖātir ḵẖushī manāte ho. 7yah vahī bāt hai jo maiṅ ne māzī meṅ bhī nabiyoṅ kī mārifat tumheṅ batāī, us vaqt jab yarūshalam meṅ ābādī aur sukūn thā, jab gird-o-navāh ke shahar dasht-e-najab aur maġrib ke nishebī pahāṛī ilāqe tak ābād the’.”
8is nāte se zakariyāh par rabb kā ek aur kalām nāzil huā, 9“rabb-ul-afwāj farmātā hai, ‘adālat meṅ munsifānā faisle karo, ek dūsre par meharbānī aur raham karo! 10bevāoṅ, yatīmoṅ, ajnabiyoṅ aur ġarīboṅ par zulm mat karnā. apne dil meṅ ek dūsre ke ḵẖilāf bure mansūbe na bāndho.’ 11jab tumhāre bāpdādā ne yah kuchh sunā to vah is par dhyān dene ke liye tayyār nahīṅ the balki akaṛ gae. unhoṅ ne apnā muṅh dūsrī taraf pher kar apne kānoṅ ko band kie rakhā. 12unhoṅ ne apne diloṅ ko hīre kī tarah saḵẖt kar liyā tāki sharīat aur vah bāteṅ un par asar’andāz na ho sakeṅ jo rabb-ul-afwāj ne apne rūh ke vasīle se guzashtā nabiyoṅ ko batāne ko kahā thā. tab rabb-ul-afwāj kā shadīd ġazab un par nāzil huā. 13vah farmātā hai, ‘chūṅki unhoṅ ne merī na sunī is liye maiṅ ne faislā kiyā ki jab vah madad ke liye mujh se iltijā kareṅ to maiṅ bhī un kī nahīṅ sunūṅgā. 14maiṅ ne unheṅ āṅdhī se uṛā kar tamām dīgar aqvām meṅ muntashir kar diyā, aisī qaumoṅ meṅ jin se vah nāvāqif the. un ke jāne par vatan itnā vīrān-o-sunsān huā ki koī na rahā jo us meṅ āe yā vahāṅ se jāe. yūṅ unhoṅ ne us ḵẖushgavār mulk ko tabāh kar diyā’.”