Zakariyāh 5

chhaṭī royā : uṛne vālā tūmār

¹maiṅ ne ek bār phir apnī nazar uṭhāī to ek uṛtā huā tūmār dekhā. ²farishte ne pūchhā, “tujhe kyā nazar ātā hai?” maiṅ ne javāb diyā, “ek uṛtā huā tūmār jo 30 fuṭ lambā aur 15 fuṭ chauṛā hai.” ³vah bolā, “is se murād ek lānat hai jo pūre mulk par bhejī jāegī. is tūmār ke ek taraf likhā hai ki har chor ko miṭā diyā jāegā aur dūsrī taraf yah ki jhūṭī qasam khāne vāle ko nest kiyā jāegā. ⁴rabb-ul-afwāj farmātā hai, ‘maiṅ yah bhejūṅgā to chor aur mere nām kī jhūṭī qasam khāne vāle ke ghar meṅ lānat dāḵẖil hogī aur us ke bīch meṅ rah kar use lakṛī aur patthar samet tabāh kar degī’.”

sātvīṅ royā : ṭokrī meṅ aurat

⁵jo farishtā mujh se bāt kar rahā thā us ne ā kar mujh se kahā, “apnī nigāh uṭhā kar vah dekh jo nikal kar ā rahā hai.” ⁶maiṅ ne pūchhā, “yah kyā hai?” us ne javāb diyā, “yah anāj kī paimāish karne kī ṭokrī hai. yah pūre mulk meṅ nazar ātī hai.” ⁷ṭokrī par sīse kā ḍhaknā thā. ab vah khul gayā, aur ṭokrī meṅ baiṭhī huī ek aurat dikhāī dī. ⁸farishtā bolā, “is aurat se murād bedīnī hai.” us ne aurat ko dhakkā de kar ṭokrī meṅ vāpas kar diyā aur sīse kā ḍhaknā zor se band kar diyā.

⁹maiṅ ne dubārā apnī nazar uṭhāī to do aurtoṅ ko dekhā. un ke laqlaq ke se par the, aur uṛte vaqt havā un ke sāth thī. ṭokrī ke pās pahuṅch kar vah use uṭhā kar āsmān-o-zamīn ke darmiyān le gaīṅ. ¹⁰jo farishtā mujh se guftagu kar rahā thā us se maiṅ ne pūchhā, “aurteṅ ṭokrī ko kidhar le jā rahī haiṅ?” ¹¹us ne javāb diyā, “mulk-e-bābal meṅ. vahāṅ vah us ke liye ghar banā deṅgī. jab ghar tayyār hogā to ṭokrī vahāṅ us kī apnī jagah par rakhī jāegī.”