Titus 2
sehatabaḵẖsh tālīm
1lekin āp vah kuchh sunāeṅ jo sehatabaḵẖsh tālīm se mutābiqat rakhtā hai. 2buzurg mardoṅ ko batā denā ki vah hoshmand, sharīf aur samajhdār hoṅ. un kā īmān, muhabbat aur sābitqadmī sehatmand hoṅ.
3isī tarah buzurg ḵẖavātīn ko hidāyat denā ki vah muqaddasīn kī sī zindagī guzāreṅ. na vah tuhamat lagāeṅ na sharāb kī ġulām hoṅ. is ke bajāy vah acchhī tālīm dene ke lāiq hoṅ 4tāki vah javān aurtoṅ ko samajhdār zindagī guzārne kī tarbiyat de sakeṅ, ki vah apne shauharoṅ aur bacchoṅ se muhabbat rakheṅ, 5ki vah samajhdār [a] yūnānī lafz meṅ zabt-e-nafs kā unsur bhī pāyā jātā hai. aur muqaddas hoṅ, ki vah ghar ke farāiz adā karne meṅ lagī raheṅ, ki vah nek hoṅ, ki vah apne shauharoṅ ke tābe raheṅ. agar vah aisī zindagī guzāreṅ to vah dūsroṅ ko allāh ke kalām par kufr bakne kā mauqā farāham nahīṅ kareṅgī.
6īsī tarah javān ādmiyoṅ kī hausalāafzāī kareṅ ki vah har lihāz se samajhdār zindagī guzāreṅ. 7āp ḵẖud nek kām karne meṅ un ke liye namūnā baneṅ. tālīm dete vaqt āp kī ḵẖulūsdilī, sharāfat 8aur alfāz kī beilzām sehat sāf nazar āe. phir āp ke muḵẖālif sharmindā ho jāeṅge, kyūṅki vah hamāre bāre meṅ koī burī bāt nahīṅ kah sakeṅge.
9ġulāmoṅ ko kah denā ki vah har lihāz se apne mālikoṅ ke tābe raheṅ. vah unheṅ pasand āeṅ, bahs-mubāhasā kie baġair un kī bāt māneṅ 10aur un kī chīzeṅ chorī na kareṅ balki sābit kareṅ ki un par har tarah kā etimād kiyā jā saktā hai. kyūṅki is tarīqe se vah hamāre najātadihandā allāh ke bāre meṅ tālīm ko har tarah se dilkash banā deṅge.
11kyūṅki allāh kā najātabaḵẖsh fazl tamām insānoṅ par zāhir huā hai. 12aur yah fazl hameṅ tarbiyat de kar is qābil banā detā hai ki ham bedīnī aur duniyāvī ḵẖwāhishāt kā inkār karke is duniyā meṅ samajhdār, rāstbāz aur ḵẖudātaras zindagī guzār sakeṅ. 13sāth sāth yah tarbiyat us mubārak din kā intizār karne meṅ hamārī madad kartī hai jis kī ummīd ham rakhte haiṅ aur jab hamāre azīm ḵẖudā aur najātadihandā īsā masīh kā jalāl zāhir ho jāegā. 14kyūṅki masīh ne hamāre liye apnī jān de dī tāki fidyā de kar hameṅ har tarah kī bedīnī se chhuṛā kar apne liye ek pāk aur maḵẖsūs qaum banāe jo nek kām karne meṅ sargarm ho.
15in hī bātoṅ kī tālīm de kar pūre iḵẖtiyār ke sāth logoṅ ko samjhāeṅ aur un kī islāh kareṅ. koī bhī āp ko haqīr na jāne.