Romiyoṅ 9

allāh aur us kī qaum

¹maiṅ masīh meṅ sacch kahatā hūṅ, jhūṭ nahīṅ boltā, aur merā zamīr bhī rūh-ul-quds meṅ is kī gavāhī detā hai ²ki maiṅ dil meṅ apne yahūdī hamvatanoṅ ke liye shadīd ġam aur musalsal dard mahsūs kartā hūṅ. ³kāsh mere bhāī aur ḵẖūnī rishtedār najāt pāeṅ! is ke liye maiṅ ḵẖud malaūn aur masīh se judā hone ke liye bhī tayyār hūṅ. ⁴allāh ne un hī ko jo isrāīlī haiṅ apne farzand banne ke liye muqarrar kiyā thā. un hī par us ne apnā jalāl zāhir kiyā, un hī ke sāth apne ahd bāṅdhe aur un hī ko sharīat atā kī. vahī haqīqī ibādat aur allāh ke vādoṅ ke haqdār haiṅ, ⁵vahī ibrāhīm aur yāqūb kī aulād haiṅ aur un hī meṅ se jismānī lihāz se masīh āyā. allāh kī tamjīd-o-tārīf abad tak ho jo sab par hukūmat kartā hai! āmīn.

⁶kahane kā matlab yah nahīṅ ki allāh apnā vādā pūrā na kar sakā. bāt yah nahīṅ hai balki yah ki vah sab haqīqī isrāīlī nahīṅ haiṅ jo isrāīlī qaum se haiṅ. ⁷aur sab ibrāhīm kī haqīqī aulād nahīṅ haiṅ jo us kī nasal se haiṅ. kyūṅki allāh ne kalām-e-muqaddas meṅ ibrāhīm se farmāyā, “terī nasal ishāq hī se qāim rahegī.” ⁸chunāṅche lāzim nahīṅ ki ibrāhīm kī tamām fitratī aulād allāh ke farzand hoṅ balki sirf vahī ibrāhīm kī haqīqī aulād samjhe jāte haiṅ jo allāh ke vāde ke mutābiq us ke farzand ban gae haiṅ. ⁹aur vādā yah thā, “muqarrarā vaqt par maiṅ vāpas āūṅgā to sārā ke beṭā hogā.”

¹⁰lekin na sirf sārā ke sāth aisā huā balki ishāq kī bīvī ribqā ke sāth bhī. ek hī mard yānī hamāre bāp ishāq se us ke juṛvāṅ bacche paidā hue. ¹¹lekin bacche abhī paidā nahīṅ hue the na unhoṅ ne koī nek yā burā kām kiyā thā ki māṅ ko allāh se ek paiġām milā. is paiġām se zāhir hotā hai ki allāh logoṅ ko apne irāde ke mutābiq chun letā hai. ¹²aur us kā yah chunāo un ke nek āmāl par mabnī nahīṅ hotā balki us ke bulāve par. paiġām yah thā, “baṛā chhoṭe kī ḵẖidmat karegā.” ¹³yah bhī kalām-e-muqaddas meṅ likhā hai, “yāqūb mujhe piyārā thā, jabki esau se maiṅ mutanaffir rahā.”

¹⁴kyā is kā matlab yah hai ki allāh beinsāf hai? hargiz nahīṅ! ¹⁵kyūṅki us ne mūsā se kahā, “maiṅ jis par meharbān honā chāhūṅ us par meharbān hotā hūṅ aur jis par raham karnā chāhūṅ us par raham kartā hūṅ.” ¹⁶chunāṅche sab kuchh allāh ke raham par hī mabnī hai. is meṅ insān kī marzī yā koshish kā koī daḵẖal nahīṅ. ¹⁷yūṅ allāh apne kalām meṅ misr ke bādshāh firaaun se muḵẖātib ho kar farmātā hai, “maiṅ ne tujhe is liye barpā kiyā hai ki tujh meṅ apnī qudrat kā izhār karūṅ aur yūṅ tamām duniyā meṅ mere nām kā parchār kiyā jāe.” ¹⁸ġaraz, yah allāh hī kī marzī hai ki vah kis par raham kare aur kis ko saḵẖt kar de.

allāh kā ġazab aur raham

¹⁹shāyad koī kahe, “agar yah bāt hai to phir allāh kis tarah ham par ilzām lagā saktā hai jab ham se ġaltiyāṅ hotī haiṅ? ham to us kī marzī kā muqāblā nahīṅ kar sakte.” ²⁰yah na kaheṅ. āp insān hote hue kaun haiṅ ki allāh ke sāth bahs-mubāhasā kareṅ? kyā jis ko tashkīl diyā gayā hai vah tashkīl dene vāle se kahatā hai, “tū ne mujhe is tarah kyūṅ banā diyā?” ²¹kyā kumhār kā haq nahīṅ hai ki gāre ke ek hī lauṅde se muḵẖtalif qism ke bartan banāe, kuchh bāizzat istemāl ke liye aur kuchh zillat’āmez istemāl ke liye? ²²yah bāt allāh par bhī sādiq ātī hai. go vah apnā ġazab nāzil karnā aur apnī qudrat zāhir karnā chāhatā thā, lekin us ne baṛe sabr-o-tahammul se vah bartan bardāsht kie jin par us kā ġazab ānā hai aur jo halākat ke liye tayyār kie gae haiṅ. ²³us ne yah is liye kiyā tāki apnā jalāl kasrat se un bartanoṅ par zāhir kare jin par us kā fazl hai aur jo pahale se jalāl pāne ke liye tayyār kie gae haiṅ. ²⁴aur ham un meṅ se haiṅ jin ko us ne chun liyā hai, na sirf yahūdiyoṅ meṅ se balki ġairyahūdiyoṅ meṅ se bhī. ²⁵yūṅ vah ġairyahūdiyoṅ ke nāte se hosea kī kitāb meṅ farmātā hai,

“maiṅ use ‘merī qaum’ kahūṅgā

jo merī qaum na thī,

aur use ‘merī piyārī’ kahūṅgā

jo mujhe piyārī na thī.”

²⁶aur “jahāṅ unheṅ batāyā gayā ki ‘tum merī qaum nahīṅ’

vahāṅ vah ‘zindā ḵẖudā ke farzand’ kahalāeṅge.”

²⁷aur yasāyāh nabī isrāīl ke bāre meṅ pukārtā hai, “go isrāīlī sāhil par kī ret jaise beshumār kyūṅ na hoṅ to bhī sirf ek bache hue hisse ko najāt milegī. ²⁸kyūṅki rabb apnā farmān mukammal taur par aur tezī se duniyā meṅ pūrā karegā.” ²⁹yasāyāh ne yah bāt ek aur peshgoī meṅ bhī kī, “agar rabb-ul-afwāj hamārī kuchh aulād zindā na chhoṛtā to ham sadūm kī tarah miṭ jāte, hamārā amūrā jaisā satyānās ho jātā.”

isrāīl ke liye paulus kī duā

³⁰is se ham kyā kahanā chāhate haiṅ? yah ki go ġairyahūdī rāstbāzī kī talāsh meṅ na the to bhī unheṅ rāstbāzī hāsil huī, aisī rāstbāzī jo īmān se paidā huī. ³¹is ke bar’aks isrāīliyoṅ ko yah hāsil na huī, hālāṅki vah aisī sharīat kī talāsh meṅ rahe jo unheṅ rāstbāz ṭhaharāe. ³²is kī kyā vajah thī? yah ki vah apnī tamām koshishoṅ meṅ īmān par inhisār nahīṅ karte the balki apne nek āmāl par. unhoṅ ne rāh meṅ paṛe patthar se ṭhokar khāī. ³³yah bāt kalām-e-muqaddas meṅ likhī bhī hai,

“dekho maiṅ siyyūn meṅ ek patthar rakh detā hūṅ

jo ṭhokar kā bāis banegā,

ek chaṭān jo ṭhes lagne kā sabab hogī.

lekin jo us par īmān lāegā

use sharmindā nahīṅ kiyā jāegā.”