Romiyoṅ 7
shādī kī misāl
1bhāiyo, āp to sharīat se vāqif haiṅ. to kyā āp nahīṅ jānte ki sharīat us vaqt tak insān par iḵẖtiyār rakhtī hai jab tak vah zindā hai? 2shādī kī misāl leṅ. jab kisī aurat kī shādī hotī hai to sharīat us kā shauhar ke sāth baṅdhan us vaqt tak qāim rakhtī hai jab tak shauhar zindā hai. agar shauhar mar jāe to phir vah is baṅdhan se āzād ho gaī. 3chunāṅche agar vah apne ḵẖāvand ke jīte jī kisī aur mard kī bīvī ban jāe to use zinākār qarār diyā jātā hai. lekin agar us kā shauhar mar jāe to vah sharīat se āzād huī. ab vah kisī dūsre mard kī bīvī bane to zinākār nahīṅ ṭhahartī. 4mere bhāiyo, yah bāt āp par bhī sādiq ātī hai. jab āp masīh ke badan kā hissā ban gae to āp mar kar sharīat ke iḵẖtiyār se āzād ho gae. ab āp us ke sāth paivast ho gae haiṅ jise murdoṅ meṅ se zindā kiyā gayā tāki ham allāh kī ḵẖidmat meṅ phal lāeṅ. 5kyūṅki jab ham apnī purānī fitrat ke tahat zindagī guzārte the to sharīat hamārī gunāh’ālūdā raġbatoṅ ko uksātī thī. phir yahī raġbateṅ hamāre āzā par asar’andāz hotī thīṅ aur natīje meṅ ham aisā phal lāte the jis kā anjām maut hai. 6lekin ab ham mar kar sharīat ke baṅdhan se āzād ho gae haiṅ. ab ham sharīat kī purānī zindagī ke tahat ḵẖidmat nahīṅ karte balki rūh-ul-quds kī naī zindagī ke tahat.
sharīat aur gunāh
7kyā is kā matlab yah hai ki sharīat ḵẖud gunāh hai? hargiz nahīṅ! bāt to yah hai ki agar sharīat mujh par mere gunāh zāhir na kartī to mujhe in kā kuchh patā na chaltā. maslan agar sharīat na batātī, “lālach na karnā” to mujhe darahaqīqat mālūm na hotā ki lālach kyā hai. 8lekin gunāh ne is hukm se fāidā uṭhā kar mujh meṅ har tarah kā lālach paidā kar diyā. is ke bar’aks jahāṅ sharīat nahīṅ hotī vahāṅ gunāh murdā hai aur aisā kām nahīṅ kar pātā. 9ek vaqt thā jab maiṅ sharīat ke baġair zindagī guzārtā thā. lekin jūṅ hī hukm mere sāmne āyā to gunāh meṅ jān ā gaī 10aur maiṅ mar gayā. is tarah mālūm huā ki jis hukm kā maqsad merī zindagī ko qāim rakhnā thā vahī merī maut kā bāis ban gayā. 11kyūṅki gunāh ne hukm se fāidā uṭhā kar mujhe bahakāyā aur hukm se hī mujhe mār ḍālā.
12lekin sharīat ḵẖud muqaddas hai aur is ke ahkām muqaddas, rāst aur acchhe haiṅ. 13kyā is kā matlab yah hai ki jo acchhā hai vahī mere liye maut kā bāis ban gayā? hargiz nahīṅ! gunāh hī ne yah kiyā. is acchhī chīz ko istemāl karke us ne mere liye maut paidā kar dī tāki gunāh zāhir ho jāe. yūṅ hukm ke zarīe gunāh kī sanjīdgī hadd se ziyādā baṛh jātī hai.
hamāre andar kī kash-m-kash
14ham jānte haiṅ ki sharīat ruhānī hai. lekin merī fitrat insānī hai, mujhe gunāh kī ġulāmī meṅ bechā gayā hai. 15darahaqīqat maiṅ nahīṅ samajhtā ki kyā kartā hūṅ. kyūṅki maiṅ vah kām nahīṅ kartā jo karnā chāhatā hūṅ balki vah jis se mujhe nafrat hai. 16lekin agar maiṅ vah kartā hūṅ jo nahīṅ karnā chāhatā to zāhir hai ki maiṅ muttafiq hūṅ ki sharīat acchhī hai. 17aur agar aisā hai to phir maiṅ yah kām ḵẖud nahīṅ kar rahā balki gunāh jo mere andar sukūnat kartā hai. 18mujhe mālūm hai ki mere andar yānī merī purānī fitrat meṅ koī acchhī chīz nahīṅ bastī. agarchi mujh meṅ nek kām karne kā irādā to maujūd hai lekin maiṅ use amlī jāmā nahīṅ pahanā saktā. 19jo nek kām maiṅ karnā chāhatā hūṅ vah nahīṅ kartā balki vah burā kām kartā hūṅ jo karnā nahīṅ chāhatā. 20ab agar maiṅ vah kām kartā hūṅ jo maiṅ nahīṅ karnā chāhatā to is kā matlab hai ki maiṅ ḵẖud nahīṅ kar rahā balki vah gunāh jo mere andar bastā hai.
21chunāṅche mujhe ek aur tarah kī sharīat kām kartī huī nazar ātī hai, aur vah yah hai ki jab maiṅ nek kām karne kā irādā rakhtā hūṅ to burāī ā maujūd hotī hai. 22hāṅ, apne bātin meṅ to maiṅ ḵẖushī se allāh kī sharīat ko māntā hūṅ. 23lekin mujhe apne āzā meṅ ek aur tarah kī sharīat dikhāī detī hai, aisī sharīat jo merī samajh kī sharīat ke ḵẖilāf laṛ kar mujhe gunāh kī sharīat kā qaidī banā detī hai, us sharīat kā jo mere āzā meṅ maujūd hai. 24hāy, merī hālat kitnī burī hai! mujhe is badan se jis kā anjām maut hai kaun chhuṛāegā? 25ḵẖudā kā shukr hai jo hamāre ḵẖudāvand īsā masīh ke vasīle se yah kām kartā hai.
ġaraz yahī merī hālat hai, masīh ke baġair maiṅ allāh kī sharīat kī ḵẖidmat sirf apnī samajh se kar saktā hūṅ jabki merī purānī fitrat gunāh kī sharīat kī ġulām rah kar usī kī ḵẖidmat kartī hai.