Romiyoṅ 6

masīh meṅ naī zindagī

¹kyā is kā matlab yah hai ki ham gunāh karte raheṅ tāki allāh ke fazl meṅ izāfā ho? ²hargiz nahīṅ! ham to mar kar gunāh se lātālluq ho gae haiṅ. to phir ham kis tarah gunāh ko apne āp par hukūmat karne de sakte haiṅ? ³yā kyā āp ko mālūm nahīṅ ki ham sab jinheṅ baptismā diyā gayā hai is se masīh īsā kī maut meṅ shāmil ho gae haiṅ? ⁴kyūṅki baptisme se hameṅ dafnāyā gayā aur us kī maut meṅ shāmil kiyā gayā tāki ham masīh kī tarah naī zindagī guzāreṅ, jise bāp kī jalālī qudrat ne murdoṅ meṅ se zindā kiyā.

⁵chūṅki is tarah ham us kī maut meṅ us ke sāth paivast ho gae haiṅ is liye ham us ke jī uṭhne meṅ bhī us ke sāth paivast hoṅge. ⁶kyūṅki ham jānte haiṅ ki hamārā purānā insān masīh ke sāth maslūb ho gayā tāki gunāh ke qabze meṅ yah jism nest ho jāe aur yūṅ ham gunāh ke ġulām na raheṅ. ⁷kyūṅki jo mar gayā vah gunāh se āzād ho gayā hai. ⁸aur hamārā īmān hai ki chūṅki ham masīh ke sāth mar gae haiṅ is liye ham us ke sāth zindā bhī hoṅge, ⁹kyūṅki ham jānte haiṅ ki masīh murdoṅ meṅ se jī uṭhā hai aur ab kabhī nahīṅ maregā. ab maut kā us par koī iḵẖtiyār nahīṅ. ¹⁰marte vaqt vah hameshā ke liye gunāh kī hukūmat se nikal gayā, aur ab jab vah dubārā zindā hai to us kī zindagī allāh ke liye maḵẖsūs hai. ¹¹āp bhī apne āp ko aisā samjheṅ. āp bhī mar kar gunāh kī hukūmat se nikal gae haiṅ aur ab āp kī masīh meṅ zindagī allāh ke liye maḵẖsūs hai.

¹²chunāṅche gunāh āp ke fānī badan meṅ hukūmat na kare. dhyān deṅ ki āp us kī burī ḵẖwāhishāt ke tābe na ho jāeṅ. ¹³apne badan ke kisī bhī uzv ko gunāh kī ḵẖidmat ke liye pesh na kareṅ, na use nārāstī kā hathiyār banne deṅ. is ke bajāy apne āp ko allāh kī ḵẖidmat ke liye pesh kareṅ. kyūṅki pahale āp murdā the, lekin ab āp zindā ho gae haiṅ. chunāṅche apne tamām āzā ko allāh kī ḵẖidmat ke liye pesh kareṅ aur unheṅ rāstī ke hathiyār banne deṅ. ¹⁴āindā gunāh āp par hukūmat nahīṅ karegā, kyūṅki āp apnī zindagī sharīat ke tahat nahīṅ guzārte balki allāh ke fazl ke tahat.

rāstbāzī ke ġulām

¹⁵ab savāl yah hai, chūṅki ham sharīat ke tahat nahīṅ balki fazl ke tahat haiṅ to kyā is kā matlab yah hai ki hameṅ gunāh karne ke liye khulā chhoṛ diyā gayā hai? hargiz nahīṅ! ¹⁶kyā āp ko mālūm nahīṅ ki jab āp apne āp ko kisī ke tābe karke us ke ġulām ban jāte haiṅ to āp us mālik ke ġulām haiṅ jis ke tābe āp haiṅ? yā to gunāh āp kā mālik ban kar āp ko maut tak le jāegā, yā faramāṁbardārī āp kī mālikan ban kar āp ko rāstbāzī tak le jāegī. ¹⁷darahaqīqat āp pahale gunāh ke ġulām the, lekin ḵẖudā kā shukr hai ki ab āp pūre dil se usī tālīm ke tābe ho gae haiṅ jo āp ke sapurd kī gaī hai. ¹⁸ab āp ko gunāh se āzād kar diyā gayā hai, rāstbāzī hī āp kī mālikan ban gaī hai. ¹⁹(āp kī fitratī kamzorī kī vajah se maiṅ ġulāmī kī yah misāl de rahā hūṅ tāki āp merī bāt samajh pāeṅ.) pahale āp ne apne āzā ko najāsat aur bedīnī kī ġulāmī meṅ de rakhā thā jis ke natīje meṅ āp kī bedīnī baṛhtī gaī. lekin ab āp apne āzā ko rāstbāzī kī ġulāmī meṅ de deṅ tāki āp muqaddas ban jāeṅ.

²⁰jab gunāh āp kā mālik thā to āp rāstbāzī se āzād the. ²¹aur is kā natījā kiyā thā? jo kuchh āp ne us vaqt kiyā us se āp ko āj sharm ātī hai aur us kā anjām maut hai. ²²lekin ab āp gunāh kī ġulāmī se āzād ho kar allāh ke ġulām ban gae haiṅ, jis ke natīje meṅ āp maḵẖsūs-o-muqaddas ban jāte haiṅ aur jis kā anjām abdī zindagī hai. ²³kyūṅki gunāh kā ajr maut hai jabki allāh hamāre ḵẖudāvand masīh īsā ke vasīle se hameṅ abdī zindagī kī muft nemat atā kartā hai.