Romiyoṅ 5

rāstbāzī kā anjām

¹ab chūṅki hameṅ īmān se rāstbāz qarār diyā gayā hai is liye allāh ke sāth hamārī sulah hai. is sulah kā vasīlā hamārā ḵẖudāvand īsā masīh hai. ²hamāre īmān lāne par us ne hameṅ fazl ke us maqām tak pahuṅchāyā jahāṅ ham āj qāim haiṅ. aur yūṅ ham is ummīd par faḵẖar karte haiṅ ki ham allāh ke jalāl meṅ sharīk hoṅge. ³na sirf yah balki ham us vaqt bhī faḵẖar karte haiṅ jab ham musībatoṅ meṅ phaṅse hote haiṅ. kyūṅki ham jānte haiṅ ki musībat se sābitqadmī paidā hotī hai, ⁴sābitqadmī se puḵẖtagī aur puḵẖtagī se ummīd. ⁵aur ummīd hameṅ sharmindā hone nahīṅ detī, kyūṅki allāh ne hameṅ rūh-ul-quds de kar us ke vasīle se hamāre diloṅ meṅ apnī muhabbat uṅḍelī hai.

⁶kyūṅki ham abhī kamzor hī the to masīh ne ham bedīnoṅ kī ḵẖātir apnī jān de dī. ⁷mushkil se hī koī kisī rāstbāz kī ḵẖātir apnī jān degā. hāṅ, mumkin hai ki koī kisī nekokār ke liye apnī jān dene kī jur’at kare. ⁸lekin allāh ne ham se apnī muhabbat kā izhār yūṅ kiyā ki masīh ne us vaqt hamārī ḵẖātir apnī jān dī jab ham gunāhgār hī the. ⁹hameṅ masīh ke ḵẖūn se rāstbāz ṭhaharāyā gayā hai. to yah bāt kitnī yaqīnī hai ki ham us ke vasīle se allāh ke ġazab se bacheṅge. ¹⁰ham abhī allāh ke dushman hī the jab us ke farzand kī maut ke vasīle se hamārī us ke sāth sulah ho gaī. to phir yah bāt kitnī yaqīnī hai ki ham us kī zindagī ke vasīle se najāt bhī pāeṅge. ¹¹na sirf yah balki ab ham allāh par faḵẖar karte haiṅ aur yah hamāre ḵẖudāvand īsā masīh ke vasīle se hai, jis ne hamārī sulah karāī hai.

ādam aur masīh

¹²jab ādam ne gunāh kiyā to us ek hī shaḵẖs se gunāh duniyā meṅ āyā. is gunāh ke sāth sāth maut bhī ā kar sab ādmiyoṅ meṅ phail gaī, kyūṅki sab ne gunāh kiyā. ¹³sharīat ke inkishāf se pahale gunāh to duniyā meṅ thā, lekin jahāṅ sharīat nahīṅ hotī vahāṅ gunāh kā hisāb nahīṅ kiyā jātā. ¹⁴tāham ādam se le kar mūsā tak maut kī hukūmat jārī rahī, un par bhī jinhoṅ ne ādam kī sī hukm’adūlī na kī.

ab ādam āne vāle īsā masīh kī taraf ishārā thā. ¹⁵lekin in donoṅ meṅ baṛā farq hai. jo nemat allāh muft meṅ detā hai vah ādam ke gunāh se mutābiqat nahīṅ rakhtī. kyūṅki is ek shaḵẖs ādam kī ḵẖilāfvarzī se bahut se log maut kī zad meṅ ā gae, lekin allāh kā fazl kahīṅ ziyādā muassir hai, vah muft nemat jo bahutoṅ ko us ek shaḵẖs īsā masīh meṅ milī hai. ¹⁶hāṅ, allāh kī is nemat aur ādam ke gunāh meṅ bahut farq hai. us ek shaḵẖs ādam ke gunāh ke natīje meṅ hameṅ to mujrim qarār diyā gayā, lekin allāh kī muft nemat kā asar yah hai ki hameṅ rāstbāz qarār diyā jātā hai, go ham se beshumār gunāh sarzad hue haiṅ. ¹⁷is ek shaḵẖs ādam ke gunāh ke natīje meṅ maut sab par hukūmat karne lagī. lekin is ek shaḵẖs īsā masīh kā kām kitnā ziyādā muassir thā. jitne bhī allāh kā vāfir fazl aur rāstbāzī kī nemat pāte haiṅ vah masīh ke vasīle se abdī zindagī meṅ hukūmat kareṅge.

¹⁸chunāṅche jis tarah ek hī shaḵẖs ke gunāh ke bāis sab log mujrim ṭhahare usī tarah ek hī shaḵẖs ke rāst amal se vah darvāzā khul gayā jis meṅ dāḵẖil ho kar sab log rāstbāz ṭhahar sakte aur zindagī pā sakte haiṅ. ¹⁹jis tarah ek hī shaḵẖs kī nāfarmānī se bahut se log gunāhgār ban gae, usī tarah ek hī shaḵẖs kī faramāṁbardārī se bahut se log rāstbāz ban jāeṅge.

²⁰sharīat is liye darmiyān meṅ ā gaī ki ḵẖilāfvarzī baṛh jāe. lekin jahāṅ gunāh ziyādā huā vahāṅ allāh kā fazl is se bhī ziyādā ho gayā. ²¹chunāṅche jis tarah gunāh maut kī sūrat meṅ hukūmat kartā thā usī tarah ab allāh kā fazl hameṅ rāstbāz ṭhaharā kar hukūmat kartā hai. yūṅ hameṅ apne ḵẖudāvand īsā masīh kī badaulat abdī zindagī hāsil hotī hai.