Romiyoṅ 4

ibrāhīm īmān se rāstbāz ṭhaharā

¹ibrāhīm jismānī lihāz se hamārā bāp thā. to rāstbāz ṭhaharne ke silsile meṅ us kā kyā tajribā thā? ²ham kah sakte haiṅ ki agar vah sharīat par amal karne se rāstbāz ṭhahartā to vah apne āp par faḵẖar kar saktā thā. lekin allāh ke nazdīk us ke pās apne āp par faḵẖar karne kā koī sabab na thā. ³kyūṅki kalām-e-muqaddas meṅ likhā hai, “ibrāhīm ne allāh par bharosā rakhā. is binā par allāh ne use rāstbāz qarār diyā.” ⁴jab log kām karte haiṅ to un kī mazdūrī koī ḵẖās meharbānī qarār nahīṅ dī jātī, balki yah to un kā haq bantā hai. ⁵lekin jab log kām nahīṅ karte balki allāh par īmān rakhte haiṅ jo bedīnoṅ ko rāstbāz qarār detā hai to un kā koī haq nahīṅ bantā. vah un ke īmān hī kī binā par rāstbāz qarār die jāte haiṅ. ⁶dāūd yahī bāt bayān kartā hai jab vah us shaḵẖs ko mubārak kahatā hai jise allāh baġair āmāl ke rāstbāz ṭhaharātā hai,

⁷“mubārak haiṅ vah jin ke jarāim muāf kie gae,

jin ke gunāh ḍhāṁpe gae haiṅ.

⁸mubārak hai vah jis kā gunāh rabb hisāb meṅ nahīṅ lāegā.”

⁹kyā yah mubārakabādī sirf maḵẖtūnoṅ ke liye hai yā nāmaḵẖtūnoṅ ke liye bhī? ham to bayān kar chuke haiṅ ki ibrāhīm īmān kī binā par rāstbāz ṭhaharā. ¹⁰use kis hālat meṅ rāstbāz ṭhaharāyā gayā? ḵẖatnā karāne ke bād yā pahale? ḵẖatne ke bād nahīṅ balki pahale. ¹¹aur ḵẖatnā kā jo nishān use milā vah us kī rāstbāzī kī muhar thī, vah rāstbāzī jo use ḵẖatnā karāne se peshtar milī, us vaqt jab vah īmān lāyā. yūṅ vah un sab kā bāp hai jo baġair ḵẖatnā karāe īmān lāe haiṅ aur is binā par rāstbāz ṭhaharte haiṅ. ¹²sāth hī vah ḵẖatnā karāne vāloṅ kā bāp bhī hai, lekin un kā jin kā na sirf ḵẖatnā huā hai balki jo hamāre bāp ibrāhīm ke us īmān ke naqsh-e-qadam par chalte haiṅ jo vah ḵẖatnā karāne se peshtar rakhtā thā.

allāh kā vādā īmān se hāsil hotā hai

¹³jab allāh ne ibrāhīm aur us kī aulād se vādā kiyā ki vah duniyā kā vāris hogā to us ne yah is liye nahīṅ kiyā ki ibrāhīm ne sharīat kī pairvī kī balki is liye ki vah īmān lāyā aur yūṅ rāstbāz ṭhaharāyā gayā. ¹⁴kyūṅki agar vah vāris haiṅ jo sharīat ke pairokār haiṅ to phir īmān beasar ṭhaharā aur allāh kā vādā miṭ gayā. ¹⁵sharīat allāh kā ġazab hī paidā kartī hai. lekin jahāṅ koī sharīat nahīṅ vahāṅ us kī ḵẖilāfvarzī bhī nahīṅ.

¹⁶chunāṅche yah mīrās īmān se miltī hai tāki is kī bunyād allāh kā fazl ho aur is kā vādā ibrāhīm kī tamām nasal ke liye ho, na sirf sharīat ke pairokāroṅ ke liye balki un ke liye bhī jo ibrāhīm kā sā īmān rakhte haiṅ. yahī ham sab kā bāp hai. ¹⁷yūṅ allāh kalām-e-muqaddas meṅ us se vādā kartā hai, “maiṅ ne tujhe bahut qaumoṅ kā bāp banā diyā hai.” allāh hī ke nazdīk ibrāhīm ham sab kā bāp hai. kyūṅki us kā īmān us ḵẖudā par thā jo murdoṅ ko zindā kartā aur jis ke hukm par vah kuchh paidā hotā hai jo pahale nahīṅ thā. ¹⁸ummīd kī koī kiran dikhāī nahīṅ detī thī, phir bhī ibrāhīm ummīd ke sāth īmān rakhtā rahā ki maiṅ zarūr bahut qaumoṅ kā bāp banūṅgā. aur āḵẖirkār aisā hī huā, jaisā kalām-e-muqaddas meṅ vādā kiyā gayā thā ki “terī aulād itnī hī beshumār hogī.” ¹⁹aur ibrāhīm kā īmān kamzor na paṛā, hālāṅki use mālūm thā ki maiṅ taqrīban sau sāl kā hūṅ aur merā aur sārā ke badan goyā murdā haiṅ, ab bacche paidā karne kī umr sārā ke liye guzar chukī hai. ²⁰to bhī ibrāhīm kā īmān ḵẖatm na huā, na us ne allāh ke vāde par shak kiyā balki īmān meṅ vah mazīd mazbūt huā aur allāh ko jalāl detā rahā. ²¹use puḵẖtā yaqīn thā ki allāh apne vāde ko pūrā karne kī qudrat rakhtā hai. ²²us ke is īmān kī vajah se allāh ne use rāstbāz qarār diyā. ²³kalām-e-muqaddas meṅ yah bāt ki allāh ne use rāstbāz qarār diyā na sirf us kī ḵẖātir likhī gaī ²⁴balki hamārī ḵẖātir bhī. kyūṅki allāh hameṅ bhī rāstbāz qarār degā agar ham us par īmān rakheṅ jis ne hamāre ḵẖudāvand īsā ko murdoṅ meṅ se zindā kiyā. ²⁵hamārī hī ḵẖatāoṅ kī vajah se use maut ke havāle kiyā gayā, aur hameṅ hī rāstbāz qarār dene ke liye use zindā kiyā gayā.