Romiyoṅ 13

r’āyā ke farāiz

¹har shaḵẖs iḵẖtiyār rakhne vāle hukmarānoṅ ke tābe rahe, kyūṅki tamām iḵẖtiyār allāh kī taraf se hai. jo iḵẖtiyār rakhte haiṅ unheṅ allāh kī taraf se muqarrar kiyā gayā hai. ²chunāṅche jo hukmarān kī muḵẖālafat kartā hai vah allāh ke farmān kī muḵẖālafat kartā aur yūṅ apne āp par allāh kī adālat lātā hai. ³kyūṅki hukmarān un ke liye ḵẖauf kā bāis nahīṅ hote jo sahīh kām karte haiṅ balki un ke liye jo ġalat kām karte haiṅ. kyā āp hukmarān se ḵẖauf khāe baġair zindagī guzārnā chāhate haiṅ? to phir vah kuchh kareṅ jo acchhā hai to vah āp ko shābāsh degā. ⁴kyūṅki vah allāh kā ḵẖādim hai jo āp kī behatrī ke liye ḵẖidmat kartā hai. lekin agar āp ġalat kām kareṅ to ḍareṅ, kyūṅki vah apnī talvār ko ḵẖwāh-m-ḵẖwāh thāme nahīṅ rakhtā. vah allāh kā ḵẖādim hai aur us kā ġazab ġalat kām karne vāle par nāzil hotā hai. ⁵is liye lāzim hai ki āp hukūmat ke tābe raheṅ, na sirf sazā se bachne ke liye balki is liye bhī ki āp ke zamīr par dāġ na lage.

⁶yahī vajah hai ki āp ṭaiks adā karte haiṅ, kyūṅki sarkārī mulāzim allāh ke ḵẖādim haiṅ jo is ḵẖidmat ko sar’anjām dene meṅ lage rahate haiṅ. ⁷chunāṅche har ek ko vah kuchh deṅ jo us kā haq hai, ṭaiks lene vāle ko ṭaiks aur kasṭam ḍyūṭī lene vāle ko kasṭam ḍyūṭī. jis kā ḵẖauf rakhnā āp par farz hai us kā ḵẖauf māneṅ aur jis kā ehatirām karnā āp par farz hai us kā ehatirām kareṅ.

ek dūsre ke liye farāiz

⁸kisī ke bhī qarzdār na raheṅ. sirf ek qarz hai jo āp kabhī nahīṅ utār sakte, ek dūsre se muhabbat rakhne kā qarz. yah karte raheṅ kyūṅki jo dūsroṅ se muhabbat rakhtā hai us ne sharīat ke tamām taqāze pūre kie haiṅ. ⁹maslan sharīat meṅ likhā hai, “qatl na karnā, zinā na karnā, chorī na karnā, lālach na karnā.” aur dīgar jitne ahkām haiṅ is ek hī hukm meṅ samāe hue haiṅ ki “apne paṛosī se vaisī muhabbat rakhnā jaisī tū apne āp se rakhtā hai.” ¹⁰jo kisī se muhabbat rakhtā hai vah us se ġalat sulūk nahīṅ kartā. yūṅ muhabbat sharīat ke tamām taqāze pūre kartī hai.

¹¹aisā karnā lāzim hai, kyūṅki āp ḵẖud is vaqt kī ahamiyat ko jānte haiṅ ki nīṅd se jāg uṭhne kī ghaṛī ā chukī hai. kyūṅki jab ham īmān lāe the to hamārī najāt itnī qarīb nahīṅ thī jitnī ki ab hai. ¹²rāt ḍhalne vālī hai aur din nikalne vālā hai. is liye āeṅ, ham tārīkī ke kām gande kapṛoṅ kī tarah utār kar nūr ke hathiyār bāṅdh leṅ. ¹³ham sharīf zindagī guzāreṅ, aise logoṅ kī tarah jo din kī raushnī meṅ chalte haiṅ. is liye lāzim hai ki ham in chīzoṅ se bāz raheṅ : badamastoṅ kī raṅgraliyoṅ aur sharābnoshī se, zinākārī aur ayyāshī se, aur jhagṛe aur hasad se. ¹⁴is ke bajāy ḵẖudāvand īsā masīh ko pahan leṅ aur apnī purānī fitrat kī parvarish yūṅ na kareṅ ki gunāh’ālūdā ḵẖwāhishāt bedār ho jāeṅ.