Mukāshfā 6

muhareṅ toṛī jātī haiṅ

¹phir maiṅ ne dekhā, lele ne sāt muharoṅ meṅ se pahalī muhar ko kholā. is par maiṅ ne chār jāndāroṅ meṅ se ek ko jis kī āvāz kaṛakte bādloṅ kī mānind thī yah kahate hue sunā, “ā!” ²mere dekhte dekhte ek safed ghoṛā nazar āyā. us ke savār ke hāth meṅ kamān thī, aur use ek tāj diyā gayā. yūṅ vah fātih kī haisiyat se aur fatah pāne ke liye vahāṅ se niklā.

³lele ne dūsrī muhar kholī to maiṅ ne dūsre jāndār ko kahate hue sunā ki “ā!” ⁴is par ek aur ghoṛā niklā jo āg jaisā surḵẖ thā. us ke savār ko duniyā se sulah-salāmatī chhīnne kā iḵẖtiyār diyā gayā tāki log ek dūsre ko qatl kareṅ. use ek baṛī talvār pakṛāī gaī.

⁵lele ne tīsrī muhar kholī to maiṅ ne tīsre jāndār ko kahate hue sunā ki “ā!” mere dekhte dekhte ek kālā ghoṛā nazar āyā. us ke savār ke hāth meṅ tarāzū thā. ⁶aur maiṅ ne chāroṅ jāndāroṅ meṅ se goyā ek āvāz sunī jis ne kahā, “ek din kī mazdūrī ke liye ek kilogrām gandum, aur ek din kī mazdūrī ke liye tīn kilogrām jau. lekin tel aur mai ko nuqsān mat pahuṅchānā.”

⁷lele ne chauthī muhar kholī to maiṅ ne chauthe jāndār ko kahate sunā ki “ā!” ⁸mere dekhte dekhte ek ghoṛā nazar āyā jis kā raṅg halkā pīlā sā thā. us ke savār kā nām maut thā, aur pātāl us ke pīchhe pīchhe chal rahī thī. unheṅ zamīn kā chauthā hissā qatl karne kā iḵẖtiyār diyā gayā, ḵẖwāh talvār, kāl, muhalak vabā yā vahashī jānvaroṅ ke zarīe se ho.

⁹lele ne pāṅchvīṅ muhar kholī to maiṅ ne qurbāngāh ke nīche un kī rūheṅ dekhīṅ jo allāh ke kalām aur apnī gavāhī qāim rakhne kī vajah se shahīd ho gae the. ¹⁰unhoṅ ne ūṅchī āvāz se chillā kar kahā, “ai qādir-e-mutlaq, quddūs aur sacche rabb, kitnī der aur lagegī? tū kab tak zamīn ke bāshindoṅ kī adālat karke hamāre shahīd hone kā intiqām na legā?” ¹¹tab un meṅ se har ek ko ek safed libās diyā gayā, aur unheṅ samjhāyā gayā ki “mazīd thoṛī der ārām karo, kyūṅki pahale tumhāre hamḵẖidmat bhāiyoṅ meṅ se utnoṅ ko shahīd ho jānā hai jitnoṅ ke liye yah muqarrar hai.”

¹²lele ne chhaṭī muhar kholī to maiṅ ne ek shadīd zalzlā dekhā. sūraj bakrī ke bāloṅ se bane ṭāṭ kī mānind kālā ho gayā, pūrā chāṅd ḵẖūn jaisā nazar āne lagā ¹³aur āsmān ke sitāre zamīn par yūṅ gir gae jis tarah anjīr ke daraḵẖt par lage āḵẖirī anjīr tez havā ke jhoṅkoṅ se gir jāte haiṅ. ¹⁴āsmān tūmār kī tarah jab use lapeṭ kar band kiyā jātā hai pīchhe haṭ gayā. aur har pahāṛ aur jazīrā apnī apnī jagah se khisak gayā. ¹⁵phir zamīn ke bādshāh, shahzāde, jarnail, amīr, asar-o-rasūḵẖ vāle, ġulām aur āzād sab ke sab ġāroṅ meṅ aur pahāṛī chaṭānoṅ ke darmiyān chhup gae. ¹⁶unhoṅ ne chillā kar pahāṛoṅ aur chaṭānoṅ se minnat kī, “ham par gir kar hameṅ taḵẖt par baiṭhe hue ke chihare aur lele ke ġazab se chhupā lo. ¹⁷kyūṅki un ke ġazab kā azīm din ā gayā hai, aur kaun qāim rah saktā hai?”