Mukāshfā 17

mashhūr kasbī

¹phir sāt piyāle apne pās rakhne vāle in sāt farishtoṅ meṅ se ek mere pās āyā. us ne kahā, “ā, maiṅ tujhe us baṛī kasbī kī sazā dikhā dūṅ jo gahare pānī ke pās baiṭhī hai. ²zamīn ke bādshāhoṅ ne us ke sāth zinā kiyā. hāṅ, us kī zinākārī kī mai se zamīn ke bāshinde mast ho gae.”

³phir farishtā mujhe rūh meṅ ek registān meṅ le gayā. vahāṅ maiṅ ne ek aurat ko dekhā. vah ek qirmizī raṅg ke haivān par savār thī jis ke pūre jism par kufr ke nām likhe the aur jis ke sāt sar aur das sīṅg the. ⁴yah aurat arġvānī aur qirmizī raṅg ke kapṛe pahane aur sone, beshaqīmat javāhir aur motiyoṅ se sajī huī thī. us ke hāth meṅ sone kā ek piyālā thā jo ghinaunī chīzoṅ aur us kī zinākārī kī gandgī se bharā huā thā. ⁵us ke māthe par yah nām likhā thā, jo ek bhed hai, “azīm bābal, kasbiyoṅ aur zamīn kī ghinaunī chīzoṅ kī māṅ.” ⁶aur maiṅ ne dekhā ki yah aurat un muqaddasīn ke ḵẖūn se mast ho gaī thī jinhoṅ ne īsā kī gavāhī dī thī.

use dekh kar maiṅ nihāyat hairān huā. ⁷farishte ne mujh se pūchhā, “tū kyūṅ hairān hai? maiṅ tujh par aurat aur us haivān kā bhed khol dūṅgā jis par aurat savār hai aur jis ke sāt sar aur das sīṅg haiṅ. ⁸jis haivān ko tū ne dekhā vah pahale thā, is vaqt nahīṅ hai aur dubārā athāh gaṛhe meṅ se nikal kar halākat kī taraf baṛhegā. zamīn ke jin bāshindoṅ ke nām duniyā kī taḵẖlīq se hī kitāb-e-hayāt meṅ darj nahīṅ haiṅ vah haivān ko dekh kar hairatzadā ho jāeṅge. kyūṅki vah pahale thā, is vaqt nahīṅ hai lekin dubārā āegā.

⁹yahāṅ samajhdār zahan kī zarūrat hai. sāt saroṅ se murād sāt pahāṛ haiṅ jin par yah aurat baiṭhī hai. yah sāt bādshāhoṅ kī numāindagī bhī karte haiṅ. ¹⁰in meṅ se pāṅch gir gae haiṅ, chhaṭā maujūd hai aur sātvāṅ abhī āne vālā hai. lekin jab vah āegā to use thoṛī der ke liye rahanā hai. ¹¹jo haivān pahale thā aur is vaqt nahīṅ hai vah āṭhvāṅ bādshāh hai, go vah sāt bādshāhoṅ meṅ se bhī ek hai. vah halākat kī taraf baṛh rahā hai.

¹²jo das sīṅg tū ne dekhe vah das bādshāh haiṅ jinheṅ abhī koī bādshāhī nahīṅ milī. lekin unheṅ ghaṅṭe bhar ke liye haivān ke sāth bādshāh kā iḵẖtiyār milegā. ¹³yah ek hī soch rakh kar apnī tāqat aur iḵẖtiyār haivān ko de deṅge aur lele se jaṅg kareṅge, ¹⁴lekin lelā apne bulāe gae, chune hue aur vafādār pairokāroṅ ke sāth un par ġālib āegā, kyūṅki vah rabboṅ kā rabb aur bādshāhoṅ kā bādshāh hai.”

¹⁵phir farishte ne mujh se kahā, “jis pānī ke pās tū ne kasbī ko baiṭhī dekhā vah ummateṅ, hujūm, qaumeṅ aur zabāneṅ hai. ¹⁶jo haivān aur das sīṅg tū ne dekhe vah kasbī se nafrat kareṅge. vah use vīrān karke naṅgā chhoṛ deṅge aur us kā gosht khā kar use bhasm kareṅge. ¹⁷kyūṅki allāh ne un ke diloṅ meṅ yah ḍāl diyā hai ki vah us kā maqsad pūrā kareṅ aur us vaqt tak hukūmat karne kā apnā iḵẖtiyār haivān ke sapurd kar deṅ jab tak allāh ke farmān takmīl tak na pahuṅch jāeṅ.

¹⁸jis aurat ko tū ne dekhā vah vahī baṛā shahar hai jo zamīn ke bādshāhoṅ par hukūmat kartā hai.”