Mukāshfā 14

lelā aur us kī qaum

¹phir maiṅ ne dekhā ki lelā mere sāmne hī siyyūn ke pahāṛ par khaṛā hai. us ke sāth 1,44,000 afrād khaṛe the jin ke māthoṅ par us kā aur us ke bāp kā nām likhā thā. ²aur maiṅ ne āsmān se ek aisī āvāz sunī jo kisī baṛe ābshār aur garajte bādloṅ kī ūṅchī kaṛak kī mānind thī. yah us āvāz kī mānind thī jo sarod bajāne vāle apne sāzoṅ se nikālte haiṅ. ³yah 1,44,000 afrād taḵẖt, chār jāndāroṅ aur buzurgoṅ ke sāmne khaṛe ek nayā gīt gā rahe the, ek aisā gīt jo sirf vahī sīkh sake jinheṅ lele ne zamīn se ḵẖarīd liyā thā. ⁴yah vah mard haiṅ jinhoṅ ne apne āp ko ḵẖavātīn ke sāth ālūdā nahīṅ kiyā, kyūṅki vah kuṅvāre haiṅ. jahāṅ bhī lelā jātā hai vahāṅ vah bhī jāte haiṅ. unheṅ bāqī insānoṅ meṅ se fasal ke pahale phal kī haisiyat se allāh aur lele ke liye ḵẖarīdā gayā hai. ⁵un ke muṅh se kabhī jhūṭ nahīṅ niklā balki vah beilzām haiṅ.

tīn farishte

⁶phir maiṅ ne ek aur farishtā dekhā. vah mere sar ke ūpar hī havā meṅ uṛ rahā thā. us ke pās allāh kī abdī ḵẖushḵẖabarī thī tāki vah use zamīn ke bāshindoṅ yānī har qaum, qabīle, ahal-e-zabān aur ummat ko sunāe. ⁷us ne ūṅchī āvāz se kahā, “ḵẖudā kā ḵẖauf mān kar use jalāl do, kyūṅki us kī adālat kā vaqt ā gayā hai. use sijdā karo jis ne āsmānoṅ, zamīn, samundar aur pānī ke chashmoṅ ko ḵẖalaq kiyā hai.”

⁸ek dūsre farishte ne pahale ke pīchhe pīchhe chalte hue kahā, “vah gir gayā hai! hāṅ, azīm bābal gir gayā hai, jis ne tamām qaumoṅ ko apnī harāmkārī aur mastī kī mai pilāī hai.”

⁹in do farishtoṅ ke pīchhe ek tīsrā farishtā chal rahā thā. us ne ūṅchī āvāz se kahā, “jo bhī haivān aur us ke mujassme ko sijdā kare aur jise bhī us kā nishān apne māthe yā hāth par mil jāe ¹⁰vah allāh ke ġazab kī mai se piegā, aisī mai jo milāvaṭ ke baġair hī allāh ke ġazab ke piyāle meṅ ḍālī gaī hai. muqaddas farishtoṅ aur lele ke huzūr use āg aur gaṅdhak kā azāb sahanā paṛegā. ¹¹aur in logoṅ ko satāne vālī yah āg jaltī rahegī, is kā dhuāṅ abad tak chaṛhtā rahegā. jo haivān aur us ke mujassme ko sijdā karte haiṅ yā jinhoṅ ne us ke nām kā nishān liyā hai vah na din, na rāt ko ārām pāeṅge.”

¹²yahāṅ muqaddasīn ko sābitqadam rahane kī zarūrat hai, unheṅ jo allāh ke ahkām pūre karte aur īsā ke vafādār rahate haiṅ.

¹³phir maiṅ ne āsmān se ek āvāz yah kahatī huī sunī, “likh, mubārak haiṅ vah murde jo ab se ḵẖudāvand meṅ vafāt pāte haiṅ.”

“jī hāṅ,” rūh farmātā hai, “vah apnī mehanat-mashaqqat se ārām pāeṅge, kyūṅki un ke nek kām un ke pīchhe ho kar un ke sāth chaleṅge.”

zamīn par fasal kī kaṭāī

¹⁴phir maiṅ ne ek safed bādal dekhā, aur us par koī baiṭhā thā jo ibn-e-ādam kī mānind thā. us ke sar par sone kā tāj aur hāth meṅ tez darāntī thī. ¹⁵ek aur farishtā allāh ke ghar se nikal kar ūṅchī āvāz se pukār kar us se muḵẖātib huā jo bādal par baiṭhā thā, “apnī darāntī le kar fasal kī kaṭāī kar! kyūṅki fasal kāṭne kā vaqt ā gayā hai aur zamīn par kī fasal pak gaī hai.” ¹⁶chunāṅche bādal par baiṭhne vāle ne apnī darāntī zamīn par chalāī aur zamīn kī fasal kī kaṭāī huī.

¹⁷is ke bād ek aur farishtā allāh ke us ghar se nikal āyā jo āsmān par hai, aur us ke pās bhī tez darāntī thī.

¹⁸phir ek tīsrā farishtā āyā. use āg par iḵẖtiyār thā. vah qurbāngāh se āyā aur ūṅchī āvāz se pukār kar tez darāntī pakṛe hue farishte se muḵẖātib huā, “apnī tez darāntī le kar zamīn kī aṅgūr kī bel se aṅgūr ke gucchhe jamā kar, kyūṅki us ke aṅgūr pak gae haiṅ.” ¹⁹farishte ne zamīn par apnī darāntī chalāī, us ke aṅgūr jamā kie aur unheṅ allāh ke ġazab ke us baṛe hauz meṅ phaiṅk diyā jis meṅ aṅgūr kā ras nikālā jātā hai. ²⁰yah hauz shahar se bāhar vāqe thā. us meṅ paṛe aṅgūroṅ ko itnā rauṅdā gayā ki hauz meṅ se ḵẖūn bah niklā. ḵẖūn kā yah sailāb 300 kilomīṭar dūr tak pahuṅch gayā aur vah itnā ziyādā thā ki ghoṛoṅ kī lagāmoṅ tak pahuṅch gayā.