Mukāshfā 13

do haivān

¹phir maiṅ ne dekhā ki samundar meṅ se ek haivān nikal rahā hai. us ke sāt sīṅg aur sāt sar the. har sīṅg par ek tāj aur har sar par kufr kā ek nām thā. ²yah haivān chīte kī mānind thā. lekin us ke rīchh ke se pāoṅ aur sherbabar kā sā muṅh thā. ajhdahe ne is haivān ko apnī quvvat, apnā taḵẖt aur baṛā iḵẖtiyār de diyā. ³lagtā thā ki haivān ke saroṅ meṅ se ek par lāilāj zaḵẖm lagā hai. lekin is zaḵẖm ko shifā dī gaī. pūrī duniyā yah dekh kar hairatzadā huī aur haivān ke pīchhe lag gaī. ⁴logoṅ ne ajhdahe ko sijdā kiyā, kyūṅki usī ne haivān ko iḵẖtiyār diyā thā. aur unhoṅ ne yah kah kar haivān ko bhī sijdā kiyā, “kaun is haivān kī mānind hai? kaun is se laṛ saktā hai?”

⁵is haivān ko baṛī baṛī bāteṅ aur kufr bakne kā iḵẖtiyār diyā gayā. aur use yah karne kā iḵẖtiyār 42 mahīne ke liye mil gayā. ⁶yūṅ vah apnā muṅh khol kar allāh, us ke nām, us kī sukūnatgāh aur āsmān ke bāshindoṅ par kufr bakne lagā. ⁷use muqaddasīn se jaṅg karke un par fatah pāne kā iḵẖtiyār bhī diyā gayā. aur use har qabīle, har ummat, har zabān aur har qaum par iḵẖtiyār diyā gayā. ⁸zamīn ke tamām bāshinde is haivān ko sijdā kareṅge yānī vah sab jin ke nām duniyā kī ibtidā se lele kī kitāb-e-hayāt meṅ darj nahīṅ haiṅ, us lele kī kitāb meṅ jo zabah kiyā gayā hai.

⁹jo sun saktā hai vah sun le! ¹⁰agar kisī ko qaidī bannā hai to vah qaidī hī banegā. agar kisī ko talvār kī zad meṅ ā kar marnā hai to vah aise hī maregā. ab muqaddasīn ko sābitqadmī aur vafādār īmān kī ḵẖās zarūrat hai.

¹¹phir maiṅ ne ek aur haivān ko dekhā. vah zamīn meṅ se nikal rahā thā. us ke lele ke se do sīṅg the, lekin us ke bolne kā andāz ajhdahe kā sā thā. ¹²us ne pahale haivān kā pūrā iḵẖtiyār us kī ḵẖātir istemāl karke zamīn aur us ke bāshindoṅ ko pahale haivān ko sijdā karne par uksāyā, yānī us haivān ko jis kā lāilāj zaḵẖm bhar gayā thā. ¹³aur us ne baṛe mojizānā nishān dikhāe, yahāṅ tak ki us ne logoṅ ke dekhte dekhte āsmān se zamīn par āg nāzil hone dī. ¹⁴yūṅ use pahale haivān kī ḵẖātir mojizānā nishān dikhāne kā iḵẖtiyār diyā gayā, aur in ke zarīe us ne zamīn ke bāshindoṅ ko sahīh rāh se bahakāyā. us ne unheṅ kahā ki vah us haivān kī tāzīm meṅ ek mujassmā banā deṅ jo talvār se zaḵẖmī hone ke bāvujūd dubārā zindā huā thā. ¹⁵phir use pahale haivān ke mujassme meṅ jān ḍālne kā iḵẖtiyār diyā gayā tāki mujassmā bol sake aur unheṅ qatl karvā sake jo use sijdā karne se inkār karte the. ¹⁶us ne yah bhī karvāyā ki har ek ke dahane hāth yā māthe par ek ḵẖās nishān lagāyā jāe, ḵẖwāh vah chhoṭā ho yā baṛā, amīr ho yā ġarīb, āzād ho yā ġulām. ¹⁷sirf vah shaḵẖs kuchh ḵẖarīd yā bech saktā thā jis par yah nishān lagā thā. yah nishān haivān kā nām yā us ke nām kā nambar thā.

¹⁸yahāṅ hikmat kī zarūrat hai. jo samajhdār hai vah haivān ke nambar kā hisāb kare, kyūṅki yah ek mard kā nambar hai. us kā nambar 666 hai.