Mukāshfā 11

do gavāh

¹mujhe gaz kī tarah kā sarkaṅḍā diyā gayā aur batāyā gayā, “jā, allāh ke ghar aur qurbāngāh kī paimāish kar. us meṅ parastāroṅ kī tādād bhī gin. ²lekin bairūnī sahan ko chhoṛ de. use mat nāp, kyūṅki use ġairīmāndāroṅ ko diyā gayā hai jo muqaddas shahar ko 42 mahīnoṅ tak kuchalte raheṅge. ³aur maiṅ apne do gavāhoṅ ko iḵẖtiyār dūṅgā, aur vah ṭāṭ oṛh kar 1,260 dinoṅ ke daurān nubuvvat kareṅge.”

⁴yah do gavāh zaitūn ke vah do daraḵẖt aur vah do shamādān haiṅ jo duniyā ke āqā ke sāmne khaṛe haiṅ. ⁵agar koī unheṅ nuqsān pahuṅchānā chāhe to un ke muṅh meṅ se āg nikal kar un ke dushmanoṅ ko bhasm kar detī hai. jo bhī unheṅ nuqsān pahuṅchānā chāhe use is tarah marnā paṛtā hai. ⁶in gavāhoṅ ko āsmān ko band rakhne kā iḵẖtiyār hai tāki jitnā vaqt vah nubuvvat kareṅ bārish na ho. unheṅ pānī ko ḵẖūn meṅ badalne aur zamīn ko har qism kī aziyat pahuṅchāne kā iḵẖtiyār bhī hai. aur vah jitnī dafā jī chāhe yah kar sakte haiṅ.

⁷un kī gavāhī kā muqarrarā vaqt pūrā hone par athāh gaṛhe meṅ se nikalne vālā haivān un se jaṅg karnā shurū karegā aur un par ġālib ā kar unheṅ mār ḍālegā. ⁸un kī lāsheṅ us baṛe shahar kī saṛak par paṛī raheṅgī jis kā alāmtī nām sadūm aur misr hai. vahāṅ un kā āqā bhī maslūb huā thā. ⁹aur sāḍhe tīn dinoṅ ke daurān har ummat, qabīle, zabān aur qaum ke log in lāshoṅ ko ghūr kar dekheṅge aur inheṅ dafan karne nahīṅ deṅge. ¹⁰zamīn ke bāshinde un kī vajah se masrūr hoṅge aur ḵẖushī manā kar ek dūsre ko tuhfe bhejeṅge, kyūṅki in do nabiyoṅ ne zamīn par rahane vāloṅ ko kāfī īzā pahuṅchāī thī. ¹¹lekin in sāḍhe tīn dinoṅ ke bād allāh ne un meṅ zindagī kā dam phūṅk diyā, aur vah apne pāoṅ par khaṛe hue. jo unheṅ dekh rahe the vah saḵẖt dahshatzadā hue. ¹²phir unhoṅ ne āsmān se ek ūṅchī āvāz sunī jis ne un se kahā, “yahāṅ ūpar āo!” aur un ke dushmanoṅ ke dekhte dekhte donoṅ ek bādal meṅ āsmān par chale gae. ¹³usī vaqt ek shadīd zalzlā āyā aur shahar kā dasvāṅ hissā gir kar tabāh ho gayā. 7,000 afrād us kī zad meṅ ā kar mar gae. bache hue logoṅ meṅ dahshat phail gaī aur vah āsmān ke ḵẖudā ko jalāl dene lage.

¹⁴dūsrā afsos guzar gayā, lekin ab tīsrā afsos jald hone vālā hai.

sātvāṅ turam

¹⁵sātveṅ farishte ne apne turam meṅ phūṅk mārī. is par āsmān par se ūṅchī āvāzeṅ sunāī deṅ jo kah rahī thīṅ, “zamīn kī bādshāhī hamāre āqā aur us ke masīh kī ho gaī hai. vahī azal se abad tak hukūmat karegā.” ¹⁶aur allāh ke taḵẖt ke sāmne baiṭhe 24 buzurgoṅ ne gir kar allāh ko sijdā kiyā ¹⁷aur kahā, “ai rabb qādir-e-mutlaq ḵẖudā, ham terā shukr karte haiṅ, tū jo hai aur jo thā. kyūṅki tū apnī azīm qudrat ko kām meṅ lā kar hukūmat karne lagā hai. ¹⁸qaumeṅ ġusse meṅ āeṅ to terā ġazab nāzil huā. ab murdoṅ kī adālat karne aur apne ḵẖādimoṅ ko ajr dene kā vaqt ā gayā hai. hāṅ, tere nabiyoṅ, muqaddasīn aur terā ḵẖauf mānne vāloṅ ko ajr milegā, ḵẖwāh vah chhoṭe hoṅ yā baṛe. ab vah vaqt bhī ā gayā hai ki zamīn ko tabāh karne vāloṅ ko tabāh kiyā jāe.”

¹⁹āsmān par allāh ke ghar ko kholā gayā aur us meṅ us ke ahd kā sandūq nazar āyā. bijlī chamakne lagī, shor mach gayā, bādal garajne aur baṛe baṛe ole paṛne lage.