Amsāl 8

hikmat kī dāvat aur vādā

¹suno! kyā hikmat āvāz nahīṅ detī? hāṅ, samajh ūṅchī āvāz se elān kartī hai. ²vah bulandiyoṅ par khaṛī hai, us jagah jahāṅ tamām rāste ek dūsre se milte haiṅ. ³shahar ke darvāzoṅ par jahāṅ log nikalte aur dāḵẖil hote haiṅ vahāṅ hikmat zordār āvāz se pukārtī hai,

⁴“ai mardo, maiṅ tum hī ko pukārtī hūṅ, tamām insānoṅ ko āvāz detī hūṅ.

⁵ai sādālauho, hoshyārī sīkh lo! ai ahamqo, samajh apnā lo!

⁶suno, kyūṅki maiṅ sharāfat kī bāteṅ kartī hūṅ, aur mere hoṅṭ sacchāī pesh karte haiṅ.

⁷merā muṅh sacch boltā hai, kyūṅki mere hoṅṭ bedīnī se ghin khāte haiṅ.

⁸jo bhī bāt mere muṅh se nikle vah rāst hai, ek bhī pechdār yā ṭeṛhī nahīṅ hai.

⁹samajhdār jāntā hai ki merī bāteṅ sab durust haiṅ, ilm rakhne vāle ko mālūm hai ki vah sahīh haiṅ.

¹⁰chāṅdī kī jagah merī tarbiyat aur ḵẖālis sone ke bajāy ilm-o-irfān apnā lo.

¹¹kyūṅki hikmat motiyoṅ se kahīṅ behatar hai, koī bhī ḵẖazānā us kā muqāblā nahīṅ kar saktā.

¹²maiṅ jo hikmat hūṅ hoshyārī ke sāth bastī hūṅ, aur maiṅ tamīz kā ilm rakhtī hūṅ.

¹³jo rabb kā ḵẖauf māntā hai vah burāī se nafrat kartā hai. mujhe ġarūr, takabbur, ġalat chāl-chalan aur ṭeṛhī bātoṅ se nafrat hai.

¹⁴mere pās acchhā mashvrā aur kāmyābī hai. merā dūsrā nām samajh hai, aur mujhe quvvat hāsil hai.

¹⁵mere vasīle se bādshāh saltanat aur hukmarān rāst faisle karte haiṅ.

¹⁶mere zarīe raīs aur shurfā balki tamām ādil munsif hukūmat karte haiṅ.

¹⁷jo mujhe piyār karte haiṅ unheṅ maiṅ piyār kartī hūṅ, aur jo mujhe ḍhūṅḍte haiṅ vah mujhe pā lete haiṅ.

¹⁸mere pās izzat-o-daulat, shāndār māl aur rāstī hai.

¹⁹merā phal sone balki ḵẖālis sone se kahīṅ behatar hai, merī paidāvār ḵẖālis chāṅdī par sabqat rakhtī hai.

²⁰maiṅ rāstī kī rāh par hī chaltī hūṅ, vahīṅ jahāṅ insāf hai.

²¹jo mujh se muhabbat rakhte haiṅ unheṅ maiṅ mīrās meṅ daulat muhayyā kartī hūṅ. un ke godām bhare rahate haiṅ.

hikmat kā taḵẖlīq meṅ hissā

²²jab rabb taḵẖlīq kā silsilā amal meṅ lāyā to pahale us ne mujhe hī banāyā. qadīm zamāne meṅ maiṅ us ke dīgar kāmoṅ se pahale hī vujūd meṅ āī.

²³mujhe azal se muqarrar kiyā gayā, ibtidā hī se jab duniyā abhī paidā nahīṅ huī thī.

²⁴na samundar kī gaharāiyāṅ, na kasrat se phūṭne vāle chashme the jab maiṅ ne janm liyā.

²⁵na pahāṛ apnī apnī jagah par qāim hue the, na pahāṛiyāṅ thīṅ jab maiṅ paidā huī.

²⁶us vaqt allāh ne na zamīn, na us ke maidān, aur na duniyā ke pahale ḍhele banāe the.

²⁷jab us ne āsmān ko us kī jagah par lagāyā aur samundar kī gaharāiyoṅ par zamīn kā ilāqā muqarrar kiyā to maiṅ sāth thī.

²⁸jab us ne āsmān par bādloṅ aur gaharāiyoṅ meṅ sarchashmoṅ kā intizām mazbūt kiyā to maiṅ sāth thī.

²⁹jab us ne samundar kī haddeṅ muqarrar kīṅ aur hukm diyā ki pānī un se tajāvuz na kare, jab us ne zamīn kī bunyādeṅ apnī apnī jagah par rakhīṅ

³⁰to maiṅ māhir kārīgar kī haisiyat se us ke sāth thī. roz-ba-roz maiṅ lutf kā bāis thī, har vaqt us ke huzūr raṅgraliyāṅ manātī rahī.

³¹maiṅ us kī zamīn kī satah par raṅgraliyāṅ manātī aur insān se lutf’andoz hotī rahī.

³²chunāṅche mere beṭo, merī suno, kyūṅki mubārak haiṅ vah jo merī rāhoṅ par chalte haiṅ.

³³merī tarbiyat mān kar dānishmand ban jāo, use nazar’andāz mat karnā.

³⁴mubārak hai vah jo merī sune, jo roz-ba-roz mere darvāze par chaukas khaṛā rahe, rozānā merī chaukhaṭ par hāzir rahe.

³⁵kyūṅki jo mujhe pāe vah zindagī aur rabb kī manzūrī pātā hai.

³⁶lekin jo mujhe pāne se qāsir rahe vah apnī jān par zulm kartā hai, jo bhī mujh se nafrat kare use maut piyārī hai.”