Amsāl 5
zinākārī se ḵẖabardār
1mere beṭe, merī hikmat par dhyān de, merī samajh kī bātoṅ par kān dhar. 2phir tū tamīz kā dāman thāme rahegā, aur tere hoṅṭ ilm-o-irfān mahfūz rakheṅge. 3kyūṅki zinākār aurat ke hoṅṭoṅ se shahad ṭapaktā hai, us kī bāteṅ tel kī tarah chiknī-chupṛī hotī haiṅ. 4lekin anjām meṅ vah zahar jaisī kaṛvī aur dodhārī talvār jaisī tez sābit hotī hai. 5us ke pāoṅ maut kī taraf utarte, us ke qadam pātāl kī jānib baṛhte jāte haiṅ. 6us ke rāste kabhī idhar kabhī idhar phirte haiṅ tāki tū zindagī kī rāh par tavajjuh na de aur us kī āvārgī ko jān na le.
7chunāṅche mere beṭo, merī suno aur mere muṅh kī bātoṅ se dūr na ho jāo. 8apne rāste us se dūr rakh, us ke ghar ke darvāze ke qarīb bhī na jā. 9aisā na ho ki tū apnī tāqat kisī aur ke liye sarf kare aur apne sāl zālim ke liye zāe kare. 10aisā na ho ki pardesī terī milkiyat se ser ho jāeṅ, ki jo kuchh tū ne mehanat-mashaqqat se hāsil kiyā vah kisī aur ke ghar meṅ āe. 11tab āḵẖirkār terā badan aur gosht ghul jāeṅge, aur tū āheṅ bhar bhar kar 12kahegā, “hāy, maiṅ ne kyūṅ tarbiyat se nafrat kī, mere dil ne kyūṅ sarzanish ko haqīr jānā? 13hidāyat karne vāloṅ kī maiṅ ne na sunī, apne ustādoṅ kī bātoṅ par kān na dharā. 14jamāat ke darmiyān hī rahate hue mujh par aisī āfat āī ki maiṅ tabāhī ke dahāne tak pahuṅch gayā hūṅ.”
15apne hī hauz kā pānī aur apne hī kueṅ se phūṭne vālā pānī pī le. 16kyā munāsib hai ki tere chashme galiyoṅ meṅ aur terī nadiyāṅ chaukoṅ meṅ bah nikleṅ? 17jo pānī terā apnā hai vah tujh tak mahdūd rahe, ajnabī us meṅ sharīk na ho jāe. 18terā chashmā mubārak ho. hāṅ, apnī bīvī se ḵẖush rah. 19vahī terī manamohan hirnī aur dilrubā ġazāl [a] lafzī tarjumā : pahāṛī bakrī. hai. usī kā piyār tujhe tar-o-tāzā kare, usī kī muhabbat tujhe hameshā mast rakhe.
20mere beṭe, tū ajnabī aurat se kyūṅ mast ho jāe, kisī dūsre kī bīvī se kyūṅ lipaṭ jāe? 21ḵẖayāl rakh, insān kī rāheṅ rabb ko sāf dikhāī detī haiṅ, jahāṅ bhī vah chale us par vah tavajjuh detā hai. 22bedīn kī apnī hī harkateṅ use phaṅsā detī haiṅ, vah apne hī gunāh ke rassoṅ meṅ jakṛā rahatā hai. 23vah tarbiyat kī kamī ke sabab se halāk ho jāegā, apnī baṛī hamāqat ke bāis ḍagmagāte hue apne anjām ko pahuṅchegā.