Amsāl 31
lamūel kī kahāvateṅ
1zail meṅ massā ke bādshāh lamūel kī kahāvateṅ haiṅ. us kī māṅ ne use yah tālīm dī,
2ai mere beṭe, mere peṭ ke phal, jo merī mannatoṅ se paidā huā, maiṅ tujhe kyā batāūṅ? 3apnī pūrī tāqat aurtoṅ par zāe na kar, un par jo bādshāhoṅ kī tabāhī kā bāis haiṅ.
4ai lamūel, bādshāhoṅ ke liye mai pīnā munāsib nahīṅ, hukmarānoṅ ke liye sharāb kī ārzū rakhnā mauzūṅ nahīṅ. 5aisā na ho ki vah pī pī kar qavānīn bhūl jāeṅ aur tamām mazlūmoṅ kā haq māreṅ. 6sharāb unheṅ pilā jo tabāh hone vāle haiṅ, mai unheṅ pilā jo ġam khāte haiṅ, 7aise hī pī pī kar apnī ġurbat aur musībat bhūl jāeṅ.
8apnā muṅh un ke liye khol jo bol nahīṅ sakte, un ke haq meṅ jo zarūratmand haiṅ. 9apnā muṅh khol kar insāf se adālat kar aur musībatzadā aur ġarīboṅ ke huqūq mahfūz rakh.
sughaṛ bīvī kī tārīf
10sughaṛ bīvī kaun pā saktā hai? aisī aurat motiyoṅ se kahīṅ ziyādā beshaqīmat hai. 11us par us ke shauhar ko pūrā etimād hai, aur vah nafā se maharūm nahīṅ rahegā. 12umr bhar vah use nuqsān nahīṅ pahuṅchāegī balki barkat kā bāis hogī.
13vah ūn aur san chun kar baṛī mehanat se dhāgā banā letī hai. 14tijārtī jahāzoṅ kī tarah vah dūrdarāz ilāqoṅ se apnī roṭī le ātī hai.
15vah pau phaṭne se pahale hī jāg uṭhtī hai tāki apne ghar vāloṅ ke liye khānā aur apnī naukrāniyoṅ ke liye un kā hissā tayyār kare. 16soch-bichār ke bād vah khet ḵẖarīd letī, apne kamāe hue paisoṅ se aṅgūr kā bāġ lagā letī hai.
17tāqat se kamarbastā ho kar vah apne bāzūoṅ ko mazbūt kartī hai. 18vah mahsūs kartī hai, “merā kārobār fāidāmand hai,” is liye us kā charāġ rāt ke vaqt bhī nahīṅ bujhtā. 19us ke hāth har vaqt ūn aur katān kātne meṅ masrūf rahate haiṅ. 20vah apnī muṭṭhī musībatazadoṅ aur ġarīboṅ ke liye khol kar un kī madad kartī hai. 21jab barf paṛe to use ghar vāloṅ ke bāre meṅ koī ḍar nahīṅ, kyūṅki sab garm garm kapṛe pahane hue haiṅ. 22apne bistar ke liye vah acchhe kambal banā letī, aur ḵẖud vah bārīk katān aur arġvānī raṅg ke libās pahane phirtī hai.
23shahar ke darvāze meṅ baiṭhe mulk ke buzurg us ke shauhar se ḵẖūb vāqif haiṅ, aur jab kabhī koī faislā karnā ho to vah bhī shūrā meṅ sharīk hotā hai.
24bīvī kapṛoṅ kī silāī karke unheṅ faroḵẖt kartī hai, saudāgar us ke kamarband ḵẖarīd lete haiṅ.
25vah tāqat aur vaqār se mulabbas rahatī aur haṅs kar āne vāle dinoṅ kā sāmnā kartī hai. 26vah hikmat se bāt kartī, aur us kī zabān par shafīq tālīm rahatī hai. 27vah sustī kī roṭī nahīṅ khātī balki apne ghar meṅ har muāmale kī dekh-bhāl kartī hai.
28us ke beṭe khaṛe ho kar use mubārak kahate haiṅ, us kā shauhar bhī us kī tārīf karke kahatā hai, 29“bahut sī aurteṅ sughaṛ sābit huī haiṅ, lekin tū un sab par sabqat rakhtī hai!”
30dilfarebī, dhokā aur husn pal bhar kā hai, lekin jo aurat allāh kā ḵẖauf māne vah qābil-e-tārīf hai. 31use us kī mehanat kā ajr do! shahar ke darvāzoṅ meṅ us ke kām us kī sitāish kareṅ!.