Amsāl 3
allāh ke ḵẖauf aur hikmat kī barkat
1mere beṭe, merī hidāyat mat bhūlnā. mere ahkām tere dil meṅ mahfūz raheṅ. 2kyūṅki in hī se terī zindagī ke dinoṅ aur sāloṅ meṅ izāfā hogā aur terī ḵẖushhālī baṛhegī. 3shafqat aur vafā terā dāman na chhoṛeṅ. unheṅ apne gale se bāṅdhnā, apne dil kī taḵẖtī par kandā karnā. 4tab tujhe allāh aur insān ke sāmne meharbānī aur qabūliyat hāsil hogī.
5pūre dil se rabb par bharosā rakh, aur apnī aqal par takiyā na kar. 6jahāṅ bhī tū chale sirf usī ko jān le, phir vah ḵẖud terī rāhoṅ ko hamvār karegā. 7apne āp ko dānishmand mat samajhnā balki rabb kā ḵẖauf mān kar burāī se dūr rah. 8is se terā badan sehat pāegā aur terī haḍḍiyāṅ tar-o-tāzā ho jāeṅgī. 9apnī milkiyat aur apnī tamām paidāvār ke pahale phal se rabb kā ehatirām kar, 10phir tere godām anāj se bhar jāeṅge aur tere bartan mai se chhalak uṭheṅge.
11mere beṭe, rabb kī tarbiyat ko radd na kar, jab vah tujhe ḍāṅṭe to raṅjīdā na ho. 12kyūṅki jo rabb ko piyārā hai us kī vah tādīb kartā hai, jis tarah bāp us beṭe ko tambīh kartā hai jo use pasand hai.
haqīqī daulat
13mubārak hai vah jo hikmat pātā hai, jise samajh hāsil hotī hai. 14kyūṅki hikmat chāṅdī se kahīṅ ziyādā sūdmand hai, aur us se sone se kahīṅ ziyādā qīmtī chīzeṅ hāsil hotī haiṅ. 15hikmat motiyoṅ se ziyādā nafīs hai, tere tamām ḵẖazāne us kā muqāblā nahīṅ kar sakte. 16us ke dahane hāth meṅ umr kī darāzī aur bāeṅ hāth meṅ daulat aur izzat hai. 17us kī rāheṅ ḵẖushgavār, us ke tamām rāste pur’amn haiṅ. 18jo us kā dāman pakaṛ le us ke liye vah zindagī kā daraḵẖt hai. mubārak hai vah jo us se lipṭā rahe. 19rabb ne hikmat ke vasīle se hī zamīn kī bunyād rakhī, samajh ke zarīe hī āsmān ko mazbūtī se lagāyā. 20us ke irfān se hī gaharāiyoṅ kā pānī phūṭ niklā aur āsmān se shabnam ṭapak kar zamīn par paṛtī hai.
21mere beṭe, dānāī aur tamīz apne pās mahfūz rakh aur unheṅ apnī nazar se dūr na hone de. 22un se terī jān tar-o-tāzā aur terā galā ārāstā rahegā. 23tab tū chalte vaqt mahfūz rahegā, aur terā pāoṅ ṭhokar nahīṅ khāegā. 24tū pāoṅ phailā kar so sakegā, koī sadmā tujhe nahīṅ pahuṅchegā balki tū leṭ kar gaharī nīṅd soegā. 25nāghāṅ āfat se mat ḍarnā, na us tabāhī se jo bedīn par ġālib ātī hai, 26kyūṅki rabb par terā etimād hai, vahī tere pāoṅ ko phaṅs jāne se mahfūz rakhegā.
dūsroṅ kī madad karne kī nasīhat
27agar koī zarūratmand ho aur tū us kī madad kar sake to us ke sāth bhalāī karne se inkār na kar. 28agar tū āj kuchh de sake to apne paṛosī se mat kahanā, “kal ānā to maiṅ āp ko kuchh de dūṅgā.” 29jo paṛosī befikr tere sāth rahatā hai us ke ḵẖilāf bure mansūbe mat bāṅdhnā. 30jis ne tujhe nuqsān nahīṅ pahuṅchāyā adālat meṅ us par bebunyād ilzām na lagānā.
31na zālim se hasad kar, na us kī koī rāh iḵẖtiyār kar. 32kyūṅki burī rāh par chalne vāle se rabb ghin khātā hai jabki sīdhī rāh par chalne vāloṅ ko vah apne rāzoṅ se āgāh kartā hai. 33bedīn ke ghar par rabb kī lānat ātī jabki rāstbāz ke ghar ko vah barkat detā hai. 34mazāq uṛāne vāloṅ kā vah mazāq uṛātā, lekin farotanoṅ par meharbānī kartā hai. 35dānishmand mīrās meṅ izzat pāeṅge jabki ahamaq ke nasīb meṅ sharmindagī hogī.