Amsāl 29
1jo mut’addid nasīhatoṅ ke bāvujūd haṭdharm rahe vah achānak hī barbād ho jāegā, aur shifā kā imkān hī nahīṅ hogā.
2jab rāstbāz bahut haiṅ to qaum ḵẖush hotī, lekin jab bedīn hukūmat kare to qaum āheṅ bhartī hai.
3jise hikmat piyārī ho vah apne bāp ko ḵẖushī dilātā hai, lekin kasbiyoṅ kā sāthī apnī daulat uṛā detā hai.
4bādshāh insāf se mulk ko mustahkam kartā, lekin hadd se ziyādā ṭaiks lene se use tabāh kartā hai.
5jo apne paṛosī kī chāplūsī kare vah us ke qadmoṅ ke āge jāl bichhātā hai.
6sharīr jurm karte vaqt apne āp ko phaṅsā detā, lekin rāstbāz ḵẖushī manā kar shādmān rahatā hai.
7rāstbāz pastahāloṅ ke huqūq kā ḵẖayāl rakhtā hai, lekin bedīn parvā hī nahīṅ kartā.
8tānāzan shahar meṅ afrā-tafrī machā dete jabki dānishmand ġussā ṭhaṅḍā kar dete haiṅ.
9jab dānishmand ādmī adālat meṅ ahamaq se laṛe to ahamaq taish meṅ ā jātā yā qahqahā lagātā hai, sukūn kā imkān hī nahīṅ hotā.
10ḵẖūṅḵẖār ādmī beilzām shaḵẖs se nafrat kartā, lekin sīdhī rāh par chalne vālā us kī behatrī chāhatā hai.
11ahamaq apnā pūrā ġussā utārtā, lekin dānishmand use rok kar qābū meṅ rakhtā hai.
12jo hukmarān jhūṭ par dhyān de us ke tamām mulāzim bedīn hoṅge.
13jab ġarīb aur zālim kī mulāqāt hotī hai to donoṅ kī āṅkhoṅ ko raushan karne vālā rabb hī hai.
14jo bādshāh diyānatdārī se zarūratmand kī adālat kare us kā taḵẖt hameshā tak qāim rahegā.
15chhaṛī aur nasīhat hikmat paidā kartī haiṅ. jise belagām chhoṛā jāe vah apnī māṅ ke liye sharmindagī kā bāis hogā.
16jab bedīn phaleṅ phūleṅ to gunāh bhī phaltā phūltā hai, lekin rāstbāz un kī shikast ke gavāh hoṅge.
17apne beṭe ko tarbiyat de to vah tujhe sukūn aur ḵẖushī dilāegā.
18jahāṅ royā nahīṅ vahāṅ qaum belagām ho jātī hai, lekin mubārak hai vah jo sharīat ke tābe rahatā hai.
19naukar sirf alfāz se nahīṅ sudhartā. agar vah bāt samjhe bhī to bhī dhyān nahīṅ degā.
20kyā koī dikhāī detā hai jo bāt karne meṅ jaldbāz hai? us kī nisbat ahamaq ke sudharne kī ziyādā ummīd hai.
21jo ġulām javānī se nāz-o-nemat meṅ pal kar bigaṛ jāe us kā burā anjām hogā.
22ġazab’ālūd ādmī jhagṛe chheṛtā rahatā hai, ġusīle shaḵẖs se mut’addid gunāh sarzad hote haiṅ.
23takabbur apne mālik ko past kar degā jabki farotan shaḵẖs izzat pāegā.
24jo chor kā sāthī ho vah apnī jān se nafrat rakhtā hai. go us se halaf uṭhvāyā jāe ki chorī ke bāre meṅ gavāhī de to bhī kuchh nahīṅ batātā balki halaf kī lānat kī zad meṅ ā jātā hai.
25jo insān se ḵẖauf khāe vah phaṅde meṅ phaṅs jāegā, lekin jo rabb kā ḵẖauf māne vah mahfūz rahegā.
26bahut log hukmarān kī manzūrī ke tālib rahate haiṅ, lekin insāf rabb hī kī taraf se miltā hai.
27rāstbāz badkār se aur bedīn sīdhī rāh par chalne vāle se ghin khātā hai.