Amsāl 27
1us par sheḵẖī na mār jo tū kal karegā, tujhe kyā mālūm ki kal kā din kyā kuchh farāham karegā?
2terā apnā muṅh aur apne hoṅṭ terī tārīf na kareṅ balki vah jo tujh se vāqif bhī na ho.
3patthar bhārī aur ret vaznī hai, lekin jo ahamaq tujhe taṅg kare vah ziyādā nāqābil-e-bardāsht hai.
4ġussā zālim hotā aur taish sailāb kī tarah insān par ā jātā hai, lekin kaun hasad kā muqāblā kar saktā hai?
5khulī malāmat chhupī huī muhabbat se behatar hai.
6piyār karne vāle kī zarbeṅ vafā kā sabūt haiṅ, lekin nafrat karne vāle ke mut’addid bosoṅ se ḵẖabardār rah.
7jo ser hai vah shahad ko bhī pāoṅ tale rauṅd detā hai, lekin bhūke ko kaṛvī chīzeṅ bhī mīṭhī lagtī haiṅ.
8jo ādmī apne ghar se nikal kar mārā mārā phire vah us parinde kī mānind hai jo apne ghoṅsle se bhāg kar kabhī idhar kabhī idhar phaṛphaṛātā rahatā hai.
9tel aur baḵẖūr dil ko ḵẖush karte haiṅ, lekin dost apne acchhe mashvaroṅ se ḵẖushī dilātā hai.
10apne dostoṅ ko kabhī na chhoṛ, na apne zātī dostoṅ ko na apne bāp ke dostoṅ ko. tab tujhe musībat ke din apne bhāī se madad nahīṅ māṅgnī paṛegī. kyūṅki qarīb kā paṛosī dūr ke bhāī se behatar hai.
11mere beṭe, dānishmand ban kar mere dil ko ḵẖush kar tāki maiṅ apne haqīr jānne vāle ko javāb de sakūṅ.
12zahīn ādmī ḵẖatrā pahale se bhāṁp kar chhup jātā hai, jabki sādālauh āge baṛh kar us kī lapeṭ meṅ ā jātā hai.
13zamānat kā vah libās vāpas na kar jo kisī ne pardesī kā zāmin ban kar diyā hai. agar vah ajnabī aurat kā zāmin ho to us zamānat par zarūr qabzā kar jo us ne dī thī.
14jo subah-savere buland āvāz se apne paṛosī ko barkat de us kī barkat lānat ṭhaharāī jāegī.
15jhagṛālū bīvī mūslādhār bārish ke bāis musalsal ṭapakne vālī chhat kī mānind hai. 16use roknā havā ko rokne yā tel ko pakaṛne ke barābar hai.
17lohā lohe ko aur insān insān ke zahan ko tez kartā hai.
18jo anjīr ke daraḵẖt kī dekh-bhāl kare vah us kā phal khāegā, jo apne mālik kī vafādārī se ḵẖidmat kare us kā ehatirām kiyā jāegā.
19jis tarah pānī chihare ko mun’akis kartā hai usī tarah insān kā dil insān ko mun’akis kartā hai.
20na maut aur na pātāl kabhī ser hote haiṅ, na insān kī āṅkheṅ.
21sonā aur chāṅdī kuṭhālī meṅ pighlā kar pāk-sāf kar, lekin insān kā kirdār is se mālūm kar ki log us kī kitnī qadar karte haiṅ.
22agar ahamaq ko anāj kī tarah ūkhlī aur mūsal se kūṭā bhī jāe to bhī us kī hamāqat dūr nahīṅ ho jāegī.
23ehatiyāt se apnī bheṛ-bakriyoṅ kī hālat par dhyān de, apne revṛoṅ par ḵẖūb tavajjuh de. 24kyūṅki koī bhī daulat hameshā tak qāim nahīṅ rahatī, koī bhī tāj nasal-dar-nasal barqarār nahīṅ rahatā. 25khule maidān meṅ ghās kāṭ kar jamā kar tāki naī ghās ug sake, chārā pahāṛoṅ se bhī ikaṭṭhā kar. 26tab tū bheṛoṅ kī ūn se kapṛe banā sakegā, bakroṅ kī faroḵẖt se khet ḵẖarīd sakegā, 27aur bakriyāṅ itnā dūdh deṅgī ki tere, tere ḵẖāndān aur tere naukar-chākroṅ ke liye kāfī hogā.