Amsāl 24

-19-

¹sharīroṅ se hasad na kar, na un se sohbat rakhne kī ārzū rakh, ²kyūṅki un kā dil zulm karne par tulā rahatā hai, un ke hoṅṭ dūsroṅ ko dukh pahuṅchāte haiṅ.

-20-

³hikmat ghar ko tāmīr kartī, samajh use mazbūt bunyād par khaṛā kar detī, ⁴aur ilm-o-irfān us ke kamroṅ ko beshaqīmat aur manamohan chīzoṅ se bhar detā hai.

-21-

⁵dānishmand ko tāqat hāsil hotī aur ilm rakhne vāle kī quvvat baṛhtī rahatī hai, ⁶kyūṅki jaṅg karne ke liye hidāyat aur fatah pāne ke liye mut’addid mushīroṅ kī zarūrat hotī hai.

-22-

⁷hikmat itnī buland-o-bālā hai ki ahamaq use pā nahīṅ saktā. jab buzurg shahar ke darvāze meṅ faislā karne ke liye jamā hote haiṅ to vah kuchh nahīṅ kah saktā.

-23-

⁸bure mansūbe bāṅdhne vālā sāzishī kahalātā hai. ⁹ahamaq kī chālākiyāṅ gunāh haiṅ, aur log tānāzan se ghin khāte haiṅ.

-24-

¹⁰agar tū musībat ke din himmat hār kar ḍhīlā ho jāe to terī tāqat jātī rahegī.

-25-

¹¹jinheṅ maut ke havāle kiyā jā rahā hai unheṅ chhuṛā, jo qasāī kī taraf ḍagmagāte hue jā rahe haiṅ unheṅ rok de. ¹²shāyad tū kahe, “hameṅ to is ke bāre meṅ ilm nahīṅ thā.” lekin yaqīn jān, jo dil kī jāṅch-paṛtāl kartā hai vah bāt samajhtā hai, jo terī jān kī dekh-bhāl kartā hai use mālūm hai. vah insān ko us ke āmāl kā badlā detā hai.

-26-

¹³mere beṭe, shahad khā kyūṅki vah acchhā hai, chhatte kā ḵẖālis shahad mīṭhā hai. ¹⁴jān le ki hikmat isī tarah terī jān ke liye mīṭhī hai. agar tū use pāe to terī ummīd jātī nahīṅ rahegī balki terā mustaqbil acchhā hogā.

-27-

¹⁵ai bedīn, rāstbāz ke ghar kī tāk lagāe mat baiṭhnā, us kī rihāishgāh tabāh na kar. ¹⁶kyūṅki go rāstbāz sāt bār gir jāe to bhī har bār dubārā uṭh khaṛā hogā jabki bedīn ek bār ṭhokar khā kar musībat meṅ phaṅsā rahegā.

-28-

¹⁷agar terā dushman gir jāe to ḵẖush na ho, agar vah ṭhokar khāe to terā dil jashn na manāe. ¹⁸aisā na ho ki rabb yah dekh kar terā ravayyā pasand na kare aur apnā ġussā dushman par utārne se bāz āe.

-29-

¹⁹badkāroṅ ko dekh kar mushtail na ho jā, bedīnoṅ ke bāis kuṛhtā na rah. ²⁰kyūṅki sharīroṅ kā koī mustaqbil nahīṅ, bedīnoṅ kā charāġ bujh jāegā.

-30-

²¹mere beṭe, rabb aur bādshāh kā ḵẖauf mān, aur sarkashoṅ meṅ sharīk na ho. ²²kyūṅki achānak hī un par āfat āegī, kisī ko patā hī nahīṅ chalegā jab donoṅ un par hamlā karke unheṅ tabāh kar deṅge.

dānishmandoṅ kī mazīd kahāvateṅ

²³zail meṅ dānishmandoṅ kī mazīd kahāvateṅ qalamband haiṅ.

adālat meṅ jānibdārī dikhānā burī bāt hai. ²⁴jo qusūrvār se kahe, “tū bequsūr hai” us par qaumeṅ lānat bhejeṅgī, us kī sarzanish ummateṅ kareṅgī. ²⁵lekin jo qusūrvār ko mujrim ṭhaharāe vah ḵẖushhāl hogā, use kasrat kī barkat milegī.

²⁶sacchā javāb dost ke bose kī mānind hai.

²⁷pahale bāhar kā kām mukammal karke apne khetoṅ ko tayyār kar, phir hī apnā ghar tāmīr kar.

²⁸bilāvajah apne paṛosī ke ḵẖilāf gavāhī mat de. yā kyā tū apne hoṅṭoṅ se dhokā denā chāhatā hai?

²⁹mat kahanā, “jis tarah us ne mere sāth kiyā usī tarah maiṅ us ke sāth karūṅgā, maiṅ us ke har fel kā munāsib javāb dūṅgā.”

³⁰ek din maiṅ sust aur nāsamajh ādmī ke khet aur aṅgūr ke bāġ meṅ se guzrā. ³¹har jagah kāṅṭedār jhāṛiyāṅ phailī huī thīṅ, ḵẖudrau paude pūrī zamīn par chhā gae the. us kī chārdīvārī bhī gir gaī thī. ³²yah dekh kar maiṅ ne dil se dhyān diyā aur sabaq sīkh liyā,

³³agar tū kahe, “mujhe thoṛī der sone de, thoṛī der ūṅghne de, thoṛī der hāth par hāth dhare baiṭhne de tāki maiṅ ārām kar sakūṅ” ³⁴to ḵẖabardār, jald hī ġurbat rāhazan kī tarah tujh par āegī, muflisī hathiyār se les ḍākū kī tarah tujh par ā paṛegī.