Amsāl 21

¹bādshāh kā dil rabb ke hāth meṅ nahar kī mānind hai. vah jidhar chāhe us kā ruḵẖ pher detā hai.

²har ādmī kī rāh us kī apnī nazar meṅ ṭhīk lagtī hai, lekin rabb hī diloṅ kī jāṅch-paṛtāl kartā hai.

³rāstbāzī aur insāf karnā rabb ko zabah kī qurbāniyoṅ se kahīṅ ziyādā pasand hai.

⁴maġrūr āṅkheṅ aur mutakabbir dil jo bedīnoṅ kā charāġ haiṅ gunāh haiṅ.

⁵mehanatī shaḵẖs ke mansūbe nafā kā bāis haiṅ, lekin jaldbāzī ġurbat tak pahuṅchā detī hai.

⁶farebdih zabān se jamā kiyā huā ḵẖazānā bikhar jāne vālā dhuāṅ aur muhalak phaṅdā hai.

⁷bedīnoṅ kā zulm hī unheṅ ghasīṭ kar le jātā hai, kyūṅki vah insāf karne se inkār karte haiṅ.

⁸qusūrvār kī rāh pechdār hai jabki pāk shaḵẖs sīdhī rāh par chaltā hai.

⁹jhagṛālū bīvī ke sāth ek hī ghar meṅ rahane kī nisbat chhat ke kisī kone meṅ guzārā karnā behatar hai.

¹⁰bedīn ġalat kām karne ke lālach meṅ rahatā hai aur apne kisī bhī paṛosī par taras nahīṅ khātā.

¹¹tānāzan par jurmānā lagā to sādālauh sabaq sīkhegā, dānishmand ko tālīm de to us ke ilm meṅ izāfā hogā.

¹²allāh jo rāst hai bedīn ke ghar ko dhyān meṅ rakhtā hai, vahī bedīn ko ḵẖāk meṅ milā detā hai.

¹³jo kān meṅ uṅglī ḍāl kar ġarīb kī madad ke liye chīḵẖeṅ nahīṅ suntā vah bhī ek din chīḵẖeṅ māregā, aur us kī bhī nahīṅ sunī jāegī.

¹⁴poshīdgī meṅ silā dene se dūsre kā ġussā ṭhaṅḍā ho jātā, kisī kī jeb garm karne se us kā saḵẖt taish dūr ho jātā hai.

¹⁵jab insāf kiyā jāe to rāstbāz ḵẖush ho jātā, lekin badkār dahshat khāne lagtā hai.

¹⁶jo samajh kī rāh se bhaṭak jāe vah ek din murdoṅ kī jamāat meṅ ārām karegā.

¹⁷jo aish-o-ishrat kī zindagī pasand kare vah ġarīb ho jāegā, jise mai aur tel piyārā ho vah amīr nahīṅ ho jāegā.

¹⁸jab rāstbāz kā fidyā denā hai to bedīn ko diyā jāegā, aur diyānatdār kī jagah bevafā ko diyā jāegā.

¹⁹jhagṛālū aur taṅg karne vālī bīvī ke sāth basne kī nisbat registān meṅ guzārā karnā behatar hai.

²⁰dānishmand ke ghar meṅ umdā ḵẖazānā aur tel hotā hai, lekin ahamaq apnā sārā māl haṛap kar letā hai.

²¹jo insāf aur shafqat kā tāqqub kartā rahe vah zindagī, rāstī aur izzat pāegā.

²²dānishmand ādmī tāqatvar faujiyoṅ ke shahar par hamlā karke vah qil’ābandī ḍhā detā hai jis par un kā pūrā etimād thā.

²³jo apne muṅh aur zabān kī paharādārī kare vah apnī jān ko musībat se bachāe rakhtā hai.

²⁴maġrūr aur ghamaṅḍī kā nām ‘tānāzan’ hai, har kām vah behad takabbur ke sāth kartā hai.

²⁵kāhil kā lālach use maut ke ghāṭ utār detā hai, kyūṅki us ke hāth kām karne se inkār karte haiṅ.

²⁶lālchī pūrā din lālach kartā rahatā hai, lekin rāstbāz fayyāzdilī se detā hai.

²⁷bedīnoṅ kī qurbānī qābil-e-ghin hai, ḵẖāskar jab use bure maqsad se pesh kiyā jāe.

²⁸jhūṭā gavāh tabāh ho jāegā, lekin jo dūsre kī dhyān se sune us kī bāt hameshā tak qāim rahegī.

²⁹bedīn ādmī gustāḵẖ andāz se pesh ātā hai, lekin sīdhī rāh par chalne vālā soch samajh kar apnī rāh par chaltā hai.

³⁰kisī kī bhī hikmat, samajh yā mansūbā rabb kā sāmnā nahīṅ kar saktā.

³¹ghoṛe ko jaṅg ke din ke liye tayyār to kiyā jātā hai, lekin fatah rabb ke hāth meṅ hai.