Amsāl 20

¹mai tānāzan kā bāp aur sharāb shor-sharābā kī māṅ hai. jo yah pī pī kar ḍagmagāne lage vah dānishmand nahīṅ.

²bādshāh kā qahar javān sherbabar kī dahāṛoṅ kī mānind hai, jo use taish dilāe vah apnī jān par kheltā hai.

³laṛāī-jhagṛe se bāz rahanā izzat kā turrā-e-imtiyāz hai jabki har ahamaq jhagaṛne ke liye tayyār rahatā hai.

⁴kāhil vaqt par hal nahīṅ chalātā, chunāṅche jab vah fasal pakte vaqt apne khet par nigāh kare to kuchh nazar nahīṅ āegā.

⁵insān ke dil kā mansūbā gahare pānī kī mānind hai, lekin samajhdār ādmī use nikāl kar amal meṅ lātā hai.

⁶bahut se log apnī vafādārī par faḵẖar karte haiṅ, lekin qābil-e-etimād shaḵẖs kahāṅ pāyā jātā hai?

⁷jo rāstbāz beilzām zindagī guzāre us kī aulād mubārak hai.

⁸jab bādshāh taḵẖt-e-adālat par baiṭh jāe to vah apnī āṅkhoṅ se sab kuchh chhānkar har ġalat bāt ek taraf kar letā hai.

⁹kaun kah saktā hai, “maiṅ ne apne dil ko pāk-sāf kar rakhā hai, maiṅ apne gunāh se pāk ho gayā hūṅ”?

¹⁰ġalat bāṭ aur ġalat paimāish, rabb donoṅ se ghin khātā hai.

¹¹laṛke kā kirdār us ke sulūk se mālūm hotā hai. is se patā chaltā hai ki us kā chāl-chalan pāk aur rāst hai yā nahīṅ.

¹²sunne vāle kān aur dekhne vālī āṅkheṅ donoṅ hī rabb ne banāī haiṅ.

¹³nīṅd ko piyār na kar varnā ġarīb ho jāegā. apnī āṅkhoṅ ko khulā rakh to jī bhar kar khānā khāegā.

¹⁴gāhak dukāndār se kahatā hai, “yah kaisī nāqis chīz hai!” lekin phir jā kar dūsroṅ ke sāmne apne saude par sheḵẖī mārtā hai.

¹⁵sonā aur kasrat ke motī pāe jā sakte haiṅ, lekin samajhdār hoṅṭ un se kahīṅ ziyādā qīmtī haiṅ.

¹⁶zamānat kā vah libās vāpas na kar jo kisī ne pardesī kā zāmin ban kar diyā hai. agar vah ajnabī kā zāmin ho to us zamānat par zarūr qabzā kar jo us ne dī thī.

¹⁷dhoke se hāsil kī huī roṭī ādmī ko mīṭhī lagtī hai, lekin us kā anjām kaṅkaroṅ se bharā muṅh hai.

¹⁸mansūbe salāh-mashvre se mazbūt ho jāte haiṅ, aur jaṅg karne se pahale dūsroṅ kī hidāyāt par dhyān de.

¹⁹agar tū buhtān lagāne vāle ko hamrāz banāe to vah idhar udhar phir kar bāt phailāegā. chunāṅche bātūnī se gurez kar.

²⁰jo apne bāp yā māṅ par lānat kare us kā charāġ ghane aṅdhere meṅ bujh jāegā.

²¹jo mīrās shurū meṅ baṛī jaldī se mil jāe vah āḵẖir meṅ barkat kā bāis nahīṅ hogī.

²²mat kahanā, “maiṅ ġalat kām kā intiqām lūṅgā.” rabb ke intizār meṅ rah to vahī terī madad karegā.

²³rabb jhūṭe bāṭoṅ se ghin khātā hai, aur ġalat tarāzū use acchhā nahīṅ lagtā.

²⁴rabb har ek ke qadam muqarrar kartā hai. to phir insān kis tarah apnī rāh samajh saktā hai?

²⁵insān apne liye phaṅdā tayyār kartā hai jab vah jaldbāzī se mannat māntā aur bād meṅ hī mannat ke natāij par ġaur karne lagtā hai.

²⁶dānishmand bādshāh bedīnoṅ ko chhān chhānkar uṛā letā hai, hāṅ vah gāhane kā ālā hī un par se guzarne detā hai.

²⁷ādamzād kī rūh rabb kā charāġ hai jo insān ke bātin kī tah tak sab kuchh kī tahqīq kartā hai.

²⁸shafqat aur vafā bādshāh ko mahfūz rakhtī haiṅ, shafqat se vah apnā taḵẖt mustahkam kar letā hai.

²⁹naujvānoṅ kā faḵẖar un kī tāqat aur buzurgoṅ kī shān un ke safed bāl haiṅ.

³⁰zaḵẖm aur choṭeṅ burāī ko dūr kar detī haiṅ, zarbeṅ bātin kī tah tak sab kuchh sāf kar detī haiṅ.