Amsāl 17
1jis ghar meṅ roṭī kā bāsī ṭukṛā sukūn ke sāth khāyā jāe vah us ghar se kahīṅ behatar hai jis meṅ laṛāī-jhagṛā hai, ḵẖwāh us meṅ kitnī shāndār ziyāfat kyūṅ na ho rahī ho.
2samajhdār mulāzim mālik ke us beṭe par qābū pāegā jo sharm kā bāis hai, aur jab bhāiyoṅ meṅ maurūsī milkiyat taqsīm kī jāe to use bhī hissā milegā.
3sonā-chāṅdī kuṭhālī meṅ pighlā kar pāk-sāf kī jātī hai, lekin rabb hī dil kī jāṅch-paṛtāl kartā hai.
4badkār sharīr hoṅṭoṅ par dhyān aur dhokebāz tabāhakun zabān par tavajjuh detā hai.
5jo ġarīb kā mazāq uṛāe vah us ke ḵẖāliq kī tahqīr kartā hai, jo dūsre kī musībat dekh kar ḵẖush ho jāe vah sazā se nahīṅ bachegā.
6pote būṛhoṅ kā tāj aur vālidain apne bacchoṅ ke zevar haiṅ.
7ahamaq ke liye baṛī baṛī bāteṅ karnā mauzūṅ nahīṅ, lekin sharīf hoṅṭoṅ par fareb kahīṅ ziyādā ġairmunāsib hai.
8rishvat dene vāle kī nazar meṅ rishvat jādū kī mānind hai. jis darvāze par bhī khaṭkhaṭāe vah khul jātā hai.
9jo dūsre kī ġaltī ko darguzar kare vah muhabbat ko faroġ detā hai, lekin jo māzī kī ġaltiyāṅ duharātā rahe vah qarībī dostoṅ meṅ nifāq paidā kartā hai.
10agar samajhdār ko ḍāṅṭā jāe to vah ḵẖūb sīkh letā hai, lekin agar ahamaq ko sau bār mārā jāe to bhī vah itnā nahīṅ sīkhtā.
11sharīr sarkashī par tulā rahatā hai, lekin us ke ḵẖilāf zālim qāsid bhejā jāegā.
12jo ahamaq apnī hamāqat meṅ uljhā huā ho us se dareġ kar, kyūṅki us se milne se behatar yah hai ki terā us rīchhnī se vāstā paṛe jis ke bacche us se chhīn liye gae hoṅ.
13jo bhalāī ke ivz burāī kare us ke ghar se burāī kabhī dūr nahīṅ hogī.
14laṛāī-jhagṛā chheṛnā band meṅ raḵẖnā ḍālne ke barābar hai. is se pahale ki muqaddamābāzī shurū ho us se bāz ā.
15jo bedīn ko bequsūr aur rāstbāz ko mujrim ṭhaharāe us se rabb ghin khātā hai.
16ahamaq ke hāth meṅ paisoṅ kā kyā fāidā hai? kyā vah hikmat ḵẖarīd saktā hai jabki us meṅ aqal nahīṅ? hargiz nahīṅ!
17paṛosī vah hai jo har vaqt muhabbat rakhtā hai, bhāī vah hai jo musībat meṅ sahārā dene ke liye paidā huā hai.
18jo hāth milā kar apne paṛosī kā zāmin hone kā vādā kare vah nāsamajh hai.
19jo laṛāī-jhagṛe se muhabbat rakhe vah gunāh se muhabbat rakhtā hai, jo apnā darvāzā hadd se ziyādā baṛā banāe vah tabāhī ko dāḵẖil hone kī dāvat detā hai.
20jis kā dil ṭeṛhā hai vah ḵẖushhālī nahīṅ pāegā, aur jis kī zabān chālāk hai vah musībat meṅ ulajh jāegā.
21jis ke hāṅ ahamaq beṭā paidā ho jāe use dukh pahuṅchtā hai, aur aqal se ḵẖālī beṭā bāp ke liye ḵẖushī kā bāis nahīṅ hotā.
22ḵẖushbāsh dil pūre jism ko shifā detā hai, lekin shikastā rūh haḍḍiyoṅ ko ḵẖushk kar detī hai.
23bedīn chupke se rishvat le kar insāf kī rāhoṅ ko bigāṛ detā hai.
24samajhdār apnī nazar ke sāmne hikmat rakhtā hai, lekin ahamaq kī nazreṅ duniyā kī intihā tak āvārā phirtī haiṅ.
25ahamaq beṭā bāp ke liye raṅj kā bāis aur māṅ ke liye talḵẖī kā sabab hai.
26bequsūr par jurmānā lagānā ġalat hai, aur sharīf ko us kī diyānatdārī ke sabab se koṛe lagānā burā hai.
27jo apnī zabān ko qābū meṅ rakhe vah ilm-o-irfān kā mālik hai, jo ṭhaṅḍe dil se bāt kare vah samajhdār hai.
28agar ahamaq ḵẖāmosh rahe to vah bhī dānishmand lagtā hai. jab tak vah bāt na kare log use samajhdār qarār dete haiṅ.