Amsāl 16

¹insān dil meṅ mansūbe bāṅdhtā hai, lekin zabān kā javāb rabb kī taraf se ātā hai.

²insān kī nazar meṅ us kī tamām rāheṅ pāk-sāf haiṅ, lekin rabb hī rūhoṅ kī jāṅch-paṛtāl kartā hai.

³jo kuchh bhī tū karnā chāhe use rabb ke sapurd kar. tab hī tere mansūbe kāmyāb hoṅge.

⁴rabb ne sab kuchh apne hī maqāsid pūre karne ke liye banāyā hai. vah din bhī pahale se muqarrar hai jab bedīn par āfat āegī.

⁵rabb har maġrūr dil se ghin khātā hai. yaqīnan vah sazā se nahīṅ bachegā.

⁶shafqat aur vafādārī gunāh kā kaffārā detī haiṅ. rabb kā ḵẖauf mānne se insān burāī se dūr rahatā hai.

⁷agar rabb kisī insān kī rāhoṅ se ḵẖush ho to vah us ke dushmanoṅ ko bhī us se sulah karāne detā hai.

⁸insāf se thoṛā bahut kamānā nāinsāfī se bahut daulat jamā karne se kahīṅ behatar hai.

⁹insān apne dil meṅ mansūbe bāṅdhtā rahatā hai, lekin rabb hī muqarrar kartā hai ki vah āḵẖirkār kis rāh par chal paṛe.

¹⁰bādshāh ke hoṅṭ goyā ilāhī faisle pesh karte haiṅ, us kā muṅh adālat karte vaqt bevafā nahīṅ hotā.

¹¹rabb durust tarāzū kā mālik hai, usī ne tamām bāṭoṅ kā intizām qāim kiyā.

¹²bādshāh bedīnī se ghin khātā hai, kyūṅki us kā taḵẖt rāstbāzī kī bunyād par mazbūt rahatā hai.

¹³bādshāh rāstbāz hoṅṭoṅ se ḵẖush hotā aur sāf bāt karne vāle se muhabbat rakhtā hai.

¹⁴bādshāh kā ġussā maut kā peshḵẖaimā hai, lekin dānishmand use ṭhaṅḍā karne ke tarīqe jāntā hai.

¹⁵jab bādshāh kā chiharā khil uṭhe to matlab zindagī hai. us kī manzūrī mausam-e-bahār ke tar-o-tāzā karne vāle bādal kī mānind hai.

¹⁶hikmat kā husūl sone se kahīṅ behatar aur samajh pānā chāṅdī se kahīṅ baṛh kar hai.

¹⁷diyānatdār kī mazbūt rāh bure kām se dūr rahatī hai, jo apnī rāh kī paharādārī kare vah apnī jān bachāe rakhtā hai.

¹⁸tabāhī se pahale ġarūr aur girne se pahale takabbur ātā hai.

¹⁹farotnī se zarūratmandoṅ ke darmiyān basnā ghamaṅḍiyoṅ ke lūṭe hue māl meṅ sharīk hone se kahīṅ behatar hai.

²⁰jo kalām par dhyān de vah ḵẖushhāl hogā, mubārak hai vah jo rabb par bharosā rakhe.

²¹jo dil se dānishmand hai use samajhdār qarār diyā jātā hai, aur mīṭhe alfāz tālīm meṅ izāfā karte haiṅ.

²²faham apne mālik ke liye zindagī kā sarchashmā hai, lekin ahamaq kī apnī hī hamāqat use sazā detī hai.

²³dānishmand kā dil samajh kī bāteṅ zabān par lātā aur tālīm dene meṅ hoṅṭoṅ kā sahārā bantā hai.

²⁴meharbān alfāz ḵẖālis shahad haiṅ, vah jān ke liye shīrīṅ aur pūre jism ko tar-o-tāzā kar dete haiṅ.

²⁵aisī rāh bhī hotī hai jo dekhne meṅ to ṭhīk lagtī hai go us kā anjām maut hai.

²⁶mazdūr kā ḵẖālī peṭ use kām karne par majbūr kartā, us kī bhūk use hāṅktī rahatī hai.

²⁷sharīr kured kured kar ġalat kām nikāl letā, us ke hoṅṭoṅ par jhulsāne vālī āg rahatī hai.

²⁸kajrau ādmī jhagṛe chheṛtā rahatā, aur tuhamat lagāne vālā dilī dostoṅ meṅ bhī raḵẖnā ḍāltā hai.

²⁹zālim apne paṛosī ko varġalā kar ġalat rāh par le jātā hai.

³⁰jo āṅkh māre vah ġalat mansūbe bāṅdh rahā hai, jo apne hoṅṭ chabāe vah ġalat kām karne par tulā huā hai.

³¹safed bāl ek shāndār tāj haiṅ jo rāstbāz zindagī guzārne se hāsil hote haiṅ.

³²tahammul karne vālā sūrme se sabqat letā hai, jo apne āp ko qābū meṅ rakhe vah shahar ko shikast dene vāle se bartar hai.

³³insān to qur’ā ḍāltā hai, lekin us kā har faislā rabb kī taraf se hai.