Amsāl 14

¹hikmat bībī apnā ghar tāmīr kartī hai, lekin hamāqat bībī apne hī hāthoṅ se use ḍhā detī hai.

²jo sīdhī rāh par chaltā hai vah allāh kā ḵẖauf māntā hai, lekin jo ġalat rāh par chaltā hai vah use haqīr jāntā hai.

³ahamaq kī bātoṅ se vah ḍaṅḍā nikaltā hai jo use us ke takabbur kī sazā detā hai, lekin dānishmand ke hoṅṭ use mahfūz rakhte haiṅ.

⁴jahāṅ bail nahīṅ vahāṅ charnī ḵẖālī rahatī hai, bail kī tāqat hī se kasrat kī fasleṅ paidā hotī haiṅ.

⁵vafādār gavāh jhūṭ nahīṅ boltā, lekin jhūṭe gavāh ke muṅh se jhūṭ nikaltā hai.

⁶tānāzan hikmat ko ḍhūṅḍtā hai, lekin befāidā. samajhdār ke ilm meṅ āsānī se izāfā hotā hai.

⁷ahamaq se dūr rah, kyūṅki tū us kī bātoṅ meṅ ilm nahīṅ pāegā.

⁸zahīn kī hikmat is meṅ hai ki vah soch samajh kar apnī rāh par chale, lekin ahamaq kī hamāqat sarāsar dhokā hī hai.

⁹ahamaq apne qusūr kā mazāq uṛāte haiṅ, lekin sīdhī rāh par chalne vāle rabb ko manzūr haiṅ.

¹⁰har dil kī apnī hī talḵẖī hotī hai jis se sirf vahī vāqif hai, aur us kī ḵẖushī meṅ bhī koī aur sharīk nahīṅ ho saktā.

¹¹bedīn kā ghar tabāh ho jāegā, lekin sīdhī rāh par chalne vāle kā ḵẖaimā phale phūlegā.

¹²aisī rāh bhī hotī hai jo dekhne meṅ ṭhīk to lagtī hai go us kā anjām maut hai.

¹³dil haṅste vaqt bhī raṅjīdā ho saktā hai, aur ḵẖushī ke iḵẖtitām par dukh hī bāqī rah jātā hai.

¹⁴jis kā dil bevafā hai vah jī bhar kar apne chāl-chalan kā kaṛvā phal khāegā jabki nek ādmī apne āmāl ke mīṭhe phal se ser ho jāegā.

¹⁵sādālauh har ek kī bāt mān letā hai jabki zahīn ādmī apnā har qadam soch samajh kar uṭhātā hai.

¹⁶dānishmand ḍarte ḍarte ġalat kām se dareġ kartā hai, lekin ahamaq ḵẖudetimād hai aur ek dam mushtail ho jātā hai.

¹⁷ġusīlā ādmī ahamaqānā harkateṅ kartā hai, aur log sāzishī shaḵẖs se nafrat karte haiṅ.

¹⁸sādālauh mīrās meṅ hamāqat pātā hai jabki zahīn ādmī kā sar ilm ke tāj se ārāstā rahatā hai.

¹⁹sharīroṅ ko nekoṅ ke sāmne jhuknā paṛegā, aur bedīnoṅ ko rāstbāz ke darvāze par auṅdhe muṅh honā paṛegā.

²⁰ġarīb ke hamsāy bhī us se nafrat karte haiṅ jabki amīr ke beshumār dost hote haiṅ.

²¹jo apne paṛosī ko haqīr jāne vah gunāh kartā hai. mubārak hai vah jo zarūratmand par taras khātā hai.

²²bure mansūbe bāṅdhne vāle sab āvārā phirte haiṅ. lekin acchhe mansūbe bāṅdhne vāle shafqat aur vafā pāeṅge.

²³mehanat-mashaqqat karne meṅ hameshā fāidā hotā hai, jabki ḵẖālī bāteṅ karne se log ġarīb ho jāte haiṅ.

²⁴dānishmandoṅ kā ajr daulat kā tāj hai jabki ahamaqoṅ kā ajr hamāqat hī hai.

²⁵sacchā gavāh jāneṅ bachātā hai jabki jhūṭā gavāh farebdih hai.

²⁶jo rabb kā ḵẖauf māne us ke pās mahfūz qil’ā hai jis meṅ us kī aulād bhī panāh le saktī hai.

²⁷rabb kā ḵẖauf zindagī kā sarchashmā hai jo insān ko muhalak phaṅdoṅ se bachāe rakhtā hai.

²⁸jitnī ābādī mulk meṅ hai utnī hī bādshāh kī shān-o-shaukat hai. r’āyā kī kamī hukmarān ke tanazzul kā bāis hai.

²⁹tahammul karne vālā baṛī samajhdārī kā mālik hai, lekin ġusīlā ādmī apnī hamāqat kā izhār kartā hai.

³⁰pursukūn dil jism ko zindagī dilātā jabki hasad haḍḍiyoṅ ko galne detā hai.

³¹jo pastahāl par zulm kare vah us ke ḵẖāliq kī tahqīr kartā hai jabki jo zarūratmand par taras khāe vah allāh kā ehatirām kartā hai.

³²bedīn kī burāī use ḵẖāk meṅ milā detī hai, lekin rāstbāz marte vaqt bhī allāh meṅ panāh letā hai.

³³hikmat samajhdār ke dil meṅ ārām kartī hai, aur vah ahamaqoṅ ke darmiyān bhī zāhir ho jātī hai.

³⁴rāstī se har qaum sarfarāz hotī hai jabki gunāh se ummateṅ rusvā ho jātī haiṅ.

³⁵bādshāh dānishmand mulāzim se ḵẖush hotā hai, lekin sharmanāk kām karne vālā mulāzim us ke ġusse kā nishānā ban jātā hai.