Amsāl 13
1dānishmand beṭā apne bāp kī tarbiyat qabūl kartā hai, lekin tānāzan parvā hī nahīṅ kartā agar koī use ḍāṅṭe.
2insān apne muṅh ke acchhe phal se ḵẖūb ser ho jātā hai, lekin bevafā ke dil meṅ zulm kā lālach rahatā hai.
3jo apnī zabān qābū meṅ rakhe vah apnī zindagī mahfūz rakhtā hai, jo apnī zabān ko belagām chhoṛ de vah tabāh ho jāegā.
4kāhil ādmī lālach kartā hai, lekin use kuchh nahīṅ miltā jabki mehanatī shaḵẖs kī ārzū pūrī ho jātī hai.
5rāstbāz jhūṭ se nafrat kartā hai, lekin bedīn sharm aur rusvāī kā bāis hai.
6rāstī beilzām kī hifāzat kartī jabki bedīnī gunāhgār ko tabāh kar detī hai.
7kuchh log amīr kā rūp bhar kar phirte haiṅ go ġarīb haiṅ. dūsre ġarīb kā rūp bhar kar phirte haiṅ go amīrtarīn haiṅ.
8kabhī amīr ko apnī jān chhuṛāne ke liye aisā tāvān denā paṛtā hai ki tamām daulat jātī rahatī hai, lekin ġarīb kī jān is qism kī dhamkī se bachī rahatī hai.
9rāstbāz kī raushnī chamaktī rahatī [a] lafzī tarjumā : ḵẖushī manātī. jabki bedīn kā charāġ bujh jātā hai.
10maġrūroṅ meṅ hameshā jhagṛā hotā hai jabki dānishmand salāh-mashvre ke mutābiq hī chalte haiṅ.
11jaldbāzī se hāsilashudā daulat jald hī ḵẖatm ho jātī hai jabki jo raftā raftā apnā māl jamā kare vah use baṛhātā rahegā.
12jo ummīd vaqt par pūrī na ho jāe vah dil ko bīmār kar detī hai, lekin jo ārzū pūrī ho jāe vah zindagī kā daraḵẖt hai.
13jo acchhī hidāyat ko haqīr jāne use nuqsān pahuṅchegā, lekin jo hukm māne use ajr milegā.
14dānishmand kī hidāyat zindagī kā sarchashmā hai jo insān ko muhalak phaṅdoṅ se bachāe rakhtī hai.
15acchhī samajh manzūrī atā kartī hai, lekin bevafā kī rāh abdī tabāhī kā bāis hai.
16zahīn har kām soch samajh kar kartā, lekin ahamaq tamām nazroṅ ke sāmne hī apnī hamāqat kī numāish kartā hai.
17bedīn qāsid musībat meṅ phaṅs jātā jabki vafādār qāsid shifā kā bāis hai.
18jo tarbiyat kī parvā na kare use ġurbat aur sharmindagī hāsil hogī, lekin jo dūsre kī nasīhat mān jāe us kā ehatirām kiyā jāegā.
19jo ārzū pūrī ho jāe vah dil ko tar-o-tāzā kartī hai, lekin ahamaq burāī se dareġ karne se ghin khātā hai.
20jo dānishmandoṅ ke sāth chale vah ḵẖud dānishmand ho jāegā, lekin jo ahamaqoṅ ke sāth chale use nuqsān pahuṅchegā.
21musībat gunāhgār kā pīchhā kartī hai jabki rāstbāzoṅ kā ajr ḵẖushhālī hai.
22nek ādmī ke beṭe aur pote us kī mīrās pāeṅge, lekin gunāhgār kī daulat rāstbāz ke liye mahfūz rakhī jāegī.
23ġarīb kā khet kasrat kī fasleṅ muhayyā kar saktā hai, lekin jahāṅ insāf nahīṅ vahāṅ sab kuchh chhīn liyā jātā hai.
24jo apne beṭe ko tambīh nahīṅ kartā vah us se nafrat kartā hai. jo us se muhabbat rakhe vah vaqt par us kī tarbiyat kartā hai.
25rāstbāz jī bhar kar khānā khātā hai, lekin bedīn kā peṭ ḵẖālī rahatā hai.