Amsāl 11
1rabb ġalat tarāzū se ghin khātā hai, vah sahīh tarāzū hī se ḵẖush hotā hai.
2jahāṅ takabbur hai vahāṅ badnāmī bhī qarīb hī rahatī hai, lekin jo halīm hai us ke dāman meṅ hikmat rahatī hai.
3sīdhī rāh par chalne vāloṅ kī diyānatdārī un kī rāhanumāī kartī jabki bevafāoṅ kī namakaharāmī unheṅ tabāh kartī hai.
4ġazab ke din daulat kā koī fāidā nahīṅ jabki rāstbāzī logoṅ kī jān ko chhuṛātī hai.
5beilzām kī rāstbāzī us kā rāstā hamvār banā detī hai jabki bedīn kī burī harkateṅ use girā detī haiṅ.
6sīdhī rāh par chalne vāloṅ kī rāstbāzī unheṅ chhuṛā detī jabki bevafāoṅ kā lālach unheṅ phaṅsā detā hai.
7dam toṛte vaqt bedīn kī sārī ummīd jātī rahatī hai, jis daulat kī tavaqqo us ne kī vah jātī rahatī hai.
8rāstbāz kī jān musībat se chhūṭ jātī hai, aur us kī jagah bedīn phaṅs jātā hai.
9kāfir apne muṅh se apne paṛosī ko tabāh kartā hai, lekin rāstbāzoṅ kā ilm unheṅ chhuṛātā hai.
10jab rāstbāz kāmyāb hoṅ to pūrā shahar jashn manātā hai, jab bedīn halāk hoṅ to ḵẖushī ke nāre buland ho jāte haiṅ.
11sīdhī rāh par chalne vāloṅ kī barkat se shahar taraqqī kartā hai, lekin bedīn ke muṅh se vah mismār ho jātā hai.
12nāsamajh ādmī apne paṛosī ko haqīr jāntā hai jabki samajhdār ādmī ḵẖāmosh rahatā hai.
13tuhamat lagāne vālā dūsroṅ ke rāz fāsh kartā hai, lekin qābil-e-etimād shaḵẖs vah bhed poshīdā rakhtā hai jo us ke sapurd kiyā gayā ho.
14jahāṅ qiyādat kī kamī hai vahāṅ qaum kā tanazzul yaqīnī hai, jahāṅ mushīroṅ kī kasrat hai vahāṅ qaum fathayāb rahegī.
15jo ajnabī kā zāmin ho jāe use yaqīnan nuqsān pahuṅchegā, jo zāmin banne se inkār kare vah mahfūz rahegā.
16nek aurat izzat se aur zālim ādmī daulat se lipṭe rahate haiṅ.
17shafīq kā acchhā sulūk usī ke liye fāidāmand hai jabki zālim kā burā sulūk usī ke liye nuqsāndih hai.
18jo kuchh bedīn kamātā hai vah farebdih hai, lekin jo rāstī kā bīj boe us kā ajr yaqīnī hai.
19rāstbāzī kā phal zindagī hai jabki burāī ke pīchhe bhāgne vāle kā anjām maut hai.
20rabb kajdiloṅ se ghin khātā hai, vah beilzām rāh par chalne vāloṅ hī se ḵẖush hotā hai.
21yaqīn karo, badkār sazā se nahīṅ bachegā jabki rāstbāzoṅ ke farzand chhūṭ jāeṅge.
22jis tarah sūar kī thūthnī meṅ sone kā chhallā khaṭkatā hai usī tarah ḵẖūbsūrat aurat kī betamīzī khaṭkatī hai.
23allāh rāstbāzoṅ kī ārzū acchhī chīzoṅ se pūrī kartā hai, lekin us kā ġazab bedīnoṅ kī ummīd par nāzil hotā hai.
24ek ādmī kī daulat meṅ izāfā hotā hai, go vah fayyāzdilī se taqsīm kartā hai. dūsre kī ġurbat meṅ izāfā hotā hai, go vah hadd se ziyādā kaṅjūs hai.
25fayyāzdil ḵẖushhāl rahegā, jo dūsroṅ ko tar-o-tāzā kare vah ḵẖud tāzādam rahegā.
26log gandum ke zakhīrāandoz par lānat bhejte haiṅ, lekin jo gandum ko bāzār meṅ āne detā hai us ke sar par barkat ātī hai.
27jo bhalāī kī talāsh meṅ rahe vah allāh kī manzūrī chāhatā hai, lekin jo burāī kī talāsh meṅ rahe vah ḵẖud burāī ke phaṅde meṅ phaṅs jāegā.
28jo apnī daulat par bharosā rakhe vah gir jāegā, lekin rāstbāz hare-bhare pattoṅ kī tarah phaleṅ phūleṅge.
29jo apne ghar meṅ gaṛbaṛ paidā kare vah mīrās meṅ havā hī pāegā. ahamaq dānishmand kā naukar banegā.
30rāstbāz kā phal zindagī kā daraḵẖt hai, aur dānishmand ādmī jāneṅ jīttā hai.
31rāstbāz ko zamīn par hī ajr miltā hai. to phir bedīn aur gunāhgār sazā kyūṅ na pāeṅ