Gintī 5

nāpāk log ḵẖaimāgāh meṅ nahīṅ rah sakte

¹rabb ne mūsā se kahā, ²“isrāīliyoṅ ko hukm de ki har us shaḵẖs ko ḵẖaimāgāh se bāhar kar do jis ko vabāī jildī bīmārī hai, jis ke zaḵẖmoṅ se māe nikaltā rahatā hai yā jo kisī lāsh ko chhūne se nāpāk hai. ³ḵẖwāh mard ho yā aurat, sab ko ḵẖaimāgāh ke bāhar bhej denā tāki vah ḵẖaimāgāh ko nāpāk na kareṅ jahāṅ maiṅ tumhāre darmiyān sukūnat kartā hūṅ.” ⁴isrāīliyoṅ ne vaisā hī kiyā jaisā rabb ne mūsā ko kahā thā. unhoṅ ne rabb ke hukm ke ain mutābiq is tarah ke tamām logoṅ ko ḵẖaimāgāh se bāhar kar diyā.

ġalat kām kā muāvazā

⁵rabb ne mūsā se kahā, ⁶“isrāīliyoṅ ko hidāyat denā ki jo bhī kisī se ġalat sulūk kare vah mere sāth bevafāī kartā hai aur qusūrvār hai, ḵẖwāh mard ho yā aurat. ⁷lāzim hai ki vah apnā gunāh taslīm kare aur us kā pūrā muāvazā de balki mut’assirā shaḵẖs kā nuqsān pūrā karne ke ilāvā 20 fīsad ziyādā de. ⁸lekin agar vah shaḵẖs jis kā qusūr kiyā gayā thā mar chukā ho aur us kā koī vāris na ho jo yah muāvazā vasūl kar sake to phir use rabb ko denā hai. imām ko yah muāvazā us meṅḍhe ke ilāvā milegā jo qusūrvār apne kaffārā ke liye degā. ^9-10 nīz imām ko isrāīliyoṅ kī qurbāniyoṅ meṅ se vah kuchh milnā hai jo uṭhāne vālī qurbānī ke taur par use diyā jātā hai. yah hissā sirf imāmoṅ ko hī milnā hai.”

zinā ke shak par allāh kā faislā

¹¹rabb ne mūsā se kahā, ¹²“isrāīliyoṅ ko batānā, ho saktā hai ki koī shādīshudā aurat bhaṭak kar apne shauhar se bevafā ho jāe aur ¹³kisī aur se hambistar ho kar nāpāk ho jāe. us ke shauhar ne use nahīṅ dekhā, kyūṅki yah poshīdgī meṅ huā hai aur na kisī ne use pakṛā, na is kā koī gavāh hai. ¹⁴agar shauhar ko apnī bīvī kī vafādārī par shak ho aur vah ġairat khāne lage, lekin yaqīn se nahīṅ kah saktā ki merī bīvī qusūrvār hai ki nahīṅ ¹⁵to vah apnī bīvī ko imām ke pās le āe. sāth sāth vah apnī bīvī ke liye qurbānī ke taur par jau kā ḍeṛh kilogrām behtarīn maidā le āe. is par na tel uṅḍelā jāe, na baḵẖūr ḍālā jāe, kyūṅki ġallā kī yah nazar ġairat kī nazar hai jis kā maqsad hai ki poshīdā qusūr zāhir ho jāe. ¹⁶imām aurat ko qarīb āne de aur rabb ke sāmne khaṛā kare. ¹⁷vah miṭṭī kā bartan muqaddas pānī se bhar kar us meṅ maqdis ke farsh kī kuchh ḵẖāk ḍāle. ¹⁸phir vah aurat ko rabb ko pesh karke us ke bāl khulvāe aur us ke hāthoṅ par maide kī nazar rakhe. imām ke apne hāth meṅ kaṛve pānī kā vah bartan ho jo lānat kā bāis hai.

¹⁹phir vah aurat ko qasam khilā kar kahe, ‘agar koī aur ādmī āp se hambistar nahīṅ huā hai aur āp nāpāk nahīṅ huī haiṅ to is kaṛve pānī kī lānat kā āp par koī asar na ho. ²⁰lekin agar āp bhaṭak kar apne shauhar se bevafā ho gaī haiṅ aur kisī aur se hambistar ho kar nāpāk ho gaī haiṅ ²¹to rabb āp ko āp kī qaum ke sāmne lāntī banāe. āp bāṅjh ho jāeṅ aur āp kā peṭ phūl jāe. ²²jab lānat kā yah pānī āp ke peṭ meṅ utre to āp bāṅjh ho jāeṅ aur āp kā peṭ phūl jāe.’ is par aurat kahe, ‘āmīn, aisā hī ho.’

²³phir imām yah lānat likh kar kāġaz ko bartan ke pānī meṅ yūṅ dho de ki us par likhī huī bāteṅ pānī meṅ ghul jāeṅ. ²⁴bād meṅ vah aurat ko yah pānī pilāe tāki vah us ke jism meṅ jā kar use lānat pahuṅchāe. ²⁵lekin pahale imām us ke hāthoṅ meṅ se ġairat kī qurbānī le kar use ġallā kī nazar ke taur par rabb ke sāmne hilāe aur phir qurbāngāh ke pās le āe. ²⁶us par vah muṭṭhī bhar yādgārī kī qurbānī ke taur par jalāe. is ke bād vah aurat ko pānī pilāe. ²⁷agar vah apne shauhar se bevafā thī aur nāpāk ho gaī hai to vah bāṅjh ho jāegī, us kā peṭ phūl jāegā aur vah apnī qaum ke sāmne lāntī ṭhaharegī. ²⁸lekin agar vah pāk-sāf hai to use sazā nahīṅ dī jāegī aur vah bacche janm dene ke qābil rahegī.

^29-30 chunāṅche aisā hī karnā hai jab shauhar ġairat khāe aur use apnī bīvī par zinā kā shak ho. bīvī ko qurbāngāh ke sāmne khaṛā kiyā jāe aur imām yah sab kuchh kare. ³¹is sūrat meṅ shauhar bequsūr ṭhaharegā, lekin agar us kī bīvī ne vāqaī zinā kiyā ho to use apne gunāh ke natīje bardāsht karne paṛeṅge.”