Gintī 31

midiyāniyoṅ se jaṅg

¹rabb ne mūsā se kahā, ²“midiyāniyoṅ se isrāīliyoṅ kā badlā le. is ke bād tū kūch karke apne bāpdādā se jā milegā.”

³chunāṅche mūsā ne isrāīliyoṅ se kahā, “hathiyāroṅ se apne kuchh ādmiyoṅ ko les karo tāki vah midiyān se jaṅg karke rabb kā badlā leṅ. ⁴har qabīle ke 1,000 mard jaṅg laṛne ke liye bhejo.”

⁵chunāṅche har qabīle ke 1,000 musallah mard yānī kul 12,000 ādmī chune gae. ⁶tab mūsā ne unheṅ jaṅg laṛne ke liye bhej diyā. us ne ilīazar imām ke beṭe fīnhās ko bhī un ke sāth bhejā jis ke pās maqdis kī kuchh chīzeṅ aur elān karne ke bigal the. ⁷unhoṅ ne rabb ke hukm ke mutābiq midiyāniyoṅ se jaṅg kī aur tamām ādmiyoṅ ko maut ke ghāṭ utār diyā. ⁸in meṅ midiyāniyoṅ ke pāṅch bādshāh ivī, raqam, sūr, hūr aur rabā the. bal’ām bin baor ko bhī jān se mār diyā gayā.

⁹isrāīliyoṅ ne midiyānī aurtoṅ aur bacchoṅ ko giriftār karke un ke tamām gāy-bail, bheṛ-bakriyāṅ aur māl lūṭ liyā. ¹⁰unhoṅ ne un kī tamām ābādiyoṅ ko ḵẖaimāgāhoṅ samet jalā kar rākh kar diyā. ^11-12 phir vah tamām lūṭā huā māl qaidiyoṅ aur jānvaroṅ samet mūsā, ilīazar imām aur isrāīl kī pūrī jamāat ke pās le āe jo ḵẖaimāgāh meṅ intizār kar rahe the. abhī tak vah moāb ke maidānī ilāqe meṅ daryā-e-yardan ke mashriqī kināre par yarīhū ke sāmne ṭhahare hue the. ¹³mūsā, ilīazar aur jamāat ke tamām sardār un kā istiqbāl karne ke liye ḵẖaimāgāh se nikle.

¹⁴unheṅ dekh kar mūsā ko hazār hazār aur sau sau afrād par muqarrar afsarān par ġussā āyā. ¹⁵us ne kahā, “āp ne tamām aurtoṅ ko kyūṅ bachāe rakhā? ¹⁶un hī ne bal’ām ke mashvre par faġūr meṅ isrāīliyoṅ ko rabb se dūr kar diyā thā. un hī ke sabab se rabb kī vabā us ke logoṅ meṅ phail gaī. ¹⁷chunāṅche ab tamām laṛkoṅ ko jān se mār do. un tamām aurtoṅ ko bhī maut ke ghāṭ utārnā jo kuṅvāriyāṅ nahīṅ haiṅ. ¹⁸lekin tamām kuṅvāriyoṅ ko bachāe rakhnā. ¹⁹jis ne bhī kisī ko mār diyā yā kisī lāsh ko chhuā hai vah sāt din tak ḵẖaimāgāh ke bāhar rahe. tīsre aur sātveṅ din apne āp ko apne qaidiyoṅ samet gunāh se pāk-sāf karnā. ²⁰har libās aur har chīz ko pāk-sāf karnā jo chamṛe, bakriyoṅ ke bāloṅ yā lakṛī kī ho.”

²¹phir ilīazar imām ne jaṅg se vāpas āne vāle mardoṅ se kahā, “jo sharīat rabb ne mūsā ko dī us ke mutābiq ^22-23 jo bhī chīz jal nahīṅ jātī use āg meṅ se guzār denā tāki pāk-sāf ho jāe. us meṅ sonā, chāṅdī, pītal, lohā, ṭīn aur sīsā shāmil hai. phir us par nāpākī dūr karne kā pānī chhiṛaknā. bāqī tamām chīzeṅ pānī meṅ se guzār denā tāki vah pāk-sāf ho jāeṅ. ²⁴sātveṅ din apne libās ko dhonā to tum pāk-sāf ho kar ḵẖaimāgāh meṅ dāḵẖil ho sakte ho.”

lūṭe hue māl kī taqsīm

²⁵rabb ne mūsā se kahā, ²⁶“tamām qaidiyoṅ aur lūṭe hue jānvaroṅ ko gin. is meṅ ilīazar imām aur qabāilī kuṁboṅ ke sarparast terī madad kareṅ. ²⁷sārā māl do barābar ke hissoṅ meṅ taqsīm karnā, ek hissā faujiyoṅ ke liye aur dūsrā bāqī jamāat ke liye ho. ²⁸faujiyoṅ ke hisse ke pāṅch pāṅch sau qaidiyoṅ meṅ se ek ek nikāl kar rabb ko denā. isī tarah pāṅch pāṅch sau bailoṅ, gadhoṅ, bheṛoṅ aur bakriyoṅ meṅ se ek ek nikāl kar rabb ko denā. ²⁹unheṅ ilīazar imām ko denā tāki vah unheṅ rabb ko uṭhāne vālī qurbānī ke taur par pesh kare. ³⁰bāqī jamāat ke hisse ke pachās pachās qaidiyoṅ meṅ se ek ek nikāl kar rabb ko denā, isī tarah pachās pachās bailoṅ, gadhoṅ, bheṛoṅ aur bakriyoṅ yā dūsre jānvaroṅ meṅ se bhī ek ek nikāl kar rabb ko denā. unheṅ un lāviyoṅ ko denā jo rabb ke maqdis ko saṁbhālte haiṅ.”

³¹mūsā aur ilīazar ne aisā hī kiyā. ^32-34 unhoṅ ne 6,75,000 bheṛ-bakriyāṅ, 72,000 gāy-bail aur 61,000 gadhe gine. ³⁵in ke ilāvā 32,000 qaidī kuṅvāriyāṅ bhī thīṅ. ^36-40 faujiyoṅ ko tamām chīzoṅ kā ādhā hissā mil gayā yānī 3,37,500 bheṛ-bakriyāṅ, 36,000 gāy-bail, 30,500 gadhe aur 16,000 qaidī kuṅvāriyāṅ. in meṅ se unhoṅ ne 675 bheṛ-bakriyāṅ, 72 gāy-bail, 61 gadhe aur 32 laṛkiyāṅ rabb ko dīṅ. ⁴¹mūsā ne rabb kā yah hissā ilīazar imām ko uṭhāne vālī qurbānī ke taur par de diyā, jis tarah rabb ne hukm diyā thā. ^42-47 bāqī jamāat ko bhī lūṭe hue māl kā ādhā hissā mil gayā. mūsā ne pachās pachās qaidiyoṅ aur jānvaroṅ meṅ se ek ek nikāl kar un lāviyoṅ ko de diyā jo rabb kā maqdis saṁbhālte the. us ne vaisā hī kiyā jaisā rabb ne hukm diyā thā.

⁴⁸phir vah afsar mūsā ke pās āe jo lashkar ke hazār hazār aur sau sau ādmiyoṅ par muqarrar the. ⁴⁹unhoṅ ne us se kahā, “āp ke ḵẖādimoṅ ne un faujiyoṅ ko gin liyā hai jin par vah muqarrar haiṅ, aur hameṅ patā chal gayā ki ek bhī kam nahīṅ huā. ⁵⁰is liye ham rabb ko sone kā tamām zevar qurbān karnā chāhate haiṅ jo hameṅ fatah pāne par milā thā maslan sone ke bāzūband, kaṅgan, muhar lagāne kī aṅgūṭhiyāṅ, bāliyāṅ aur hār. yah sab kuchh ham rabb ko pesh karnā chāhate haiṅ tāki rabb ke sāmne hamārā kaffārā ho jāe.”

⁵¹mūsā aur ilīazar imām ne sone kī tamām chīzeṅ un se le līṅ. ⁵²jo chīzeṅ unhoṅ ne afsarān ke lūṭe hue māl meṅ se rabb ko uṭhāne vālī qurbānī ke taur par pesh kīṅ un kā pūrā vazan taqrīban 190 kilogrām thā. ⁵³sirf afsarān ne aisā kiyā. bāqī faujiyoṅ ne apnā lūṭ kā māl apne liye rakh liyā. ⁵⁴mūsā aur ilīazar afsarān kā yah sonā mulāqāt ke ḵẖaime meṅ le āe tāki vah rabb ko us kī qaum kī yād dilātā rahe.