Gintī 24
1ab bal’ām ko us bāt kā pūrā yaqīn ho gayā ki rabb ko pasand hai ki maiṅ isrāīliyoṅ ko barkat dūṅ. is liye us ne is martabā pahale kī tarah jādūgrī kā tarīqā istemāl na kiyā balki sīdhā registān kī taraf ruḵẖ kiyā 2jahāṅ isrāīl apne apne qabīloṅ kī tartīb se ḵẖaimāzan thā. yah dekh kar allāh kā rūh us par nāzil huā, 3aur vah bol uṭhā,
“bal’ām bin baor kā paiġām suno, us ke paiġām par ġaur karo jo sāf sāf dekhtā hai, 4us kā paiġām jo allāh kī bāteṅ sun letā hai, qādir-e-mutlaq kī royā ko dekh letā hai aur zamīn par gir kar poshīdā bāteṅ dekhtā hai.
5ai yāqūb, tere ḵẖaime kitne shāndār haiṅ! ai isrāīl, tere ghar kitne acchhe haiṅ!
6vah dūr tak phailī huī vādiyoṅ kī mānind, nahar ke kināre lage bāġoṅ kī mānind, rabb ke lagāe hue ūd ke daraḵẖtoṅ kī mānind, pānī ke kināre lage deodār ke daraḵẖtoṅ kī mānind haiṅ.
7un kī bālṭiyoṅ se pānī chhalaktā rahegā, un ke bīj ko kasrat kā pānī milegā. un kā bādshāh ajāj se ziyādā tāqatvar hogā, aur un kī saltanat sarfarāz hogī.
8allāh unheṅ misr se nikāl lāyā, aur unheṅ jaṅglī bail kī sī tāqat hāsil hai. vah muḵẖālif qaumoṅ ko haṛap karke un kī haḍḍiyāṅ chūr chūr kar dete haiṅ, vah apne tīr chalā kar unheṅ mār ḍālte haiṅ.
9isrāīl sherbabar yā shernī kī mānind hai. jab vah dabak kar baiṭh jāe to koī bhī use chheṛne kī jur’at nahīṅ kartā. jo tujhe barkat de use barkat mile, aur jo tujh par lānat bheje us par lānat āe.”
10yah sun kar balaq āpe se bāhar huā. us ne tālī bajā kar apnī hiqārat kā izhār kiyā aur kahā, “maiṅ ne tujhe is liye bulāyā thā ki tū mere dushmanoṅ par lānat bheje. ab tū ne unheṅ tīnoṅ bār barkat hī dī hai. 11ab dafā ho jā! apne ghar vāpas bhāg jā! maiṅ ne kahā thā ki baṛā in’ām dūṅgā. lekin rabb ne tujhe in’ām pāne se rok diyā hai.”
12bal’ām ne javāb diyā, “kyā maiṅ ne un logoṅ ko jinheṅ āp ne mujhe bulāne ke liye bhejā thā nahīṅ batāyā thā 13ki agar balaq apne mahal ko chāṅdī aur sone se bhar kar bhī mujhe de de to bhī maiṅ rabb kī kisī bāt kī ḵẖilāfvarzī nahīṅ kar saktā, ḵẖwāh merī nīyat acchhī ho yā burī. maiṅ sirf vah kuchh kar saktā hūṅ jo allāh farmātā hai. 14ab maiṅ apne vatan vāpas chalā jātā hūṅ. lekin pahale maiṅ āp ko batā detā hūṅ ki āḵẖirkār yah qaum āp kī qaum ke sāth kyā kuchh karegī.”
bal’ām kī chauthī barkat
15vah bol uṭhā,
“bal’ām bin baor kā paiġām suno, us kā paiġām jo sāf sāf dekhtā hai,
16us kā paiġām jo allāh kī bāteṅ sun letā aur allāh t’ālā kī marzī ko jāntā hai, jo qādir-e-mutlaq kī royā ko dekh letā aur zamīn par gir kar poshīdā bāteṅ dekhtā hai.
17jise maiṅ dekh rahā hūṅ vah us vaqt nahīṅ hai. jo mujhe nazar ā rahā hai vah qarīb nahīṅ hai. yāqūb ke gharāne se sitārā niklegā, aur isrāīl se asā-e-shāhī uṭhegā jo moāb ke māthoṅ aur set ke tamām beṭoṅ kī khopṛiyoṅ ko pāsh pāsh karegā.
18adom us ke qabze meṅ āegā, us kā dushman saīr us kī milkiyat banegā jabki isrāīl kī tāqat baṛhtī jāegī.
19yāqūb ke gharāne se ek hukmarān niklegā jo shahar ke bache huoṅ ko halāk kar degā.”
bal’ām ke āḵẖirī paiġām
20phir bal’ām ne amālīq ko dekhā aur kahā,
“amālīq qaumoṅ meṅ avval thā, lekin āḵẖirkār vah ḵẖatm ho jāegā.”
21phir us ne qīniyoṅ ko dekhā aur kahā,
“terī sukūnatgāh mustahkam hai, terā chaṭān meṅ banā ghoṅslā mazbūt hai.
22lekin tū tabāh ho jāegā jab asūr tujhe giriftār karegā.”
23ek aur dafā us ne bāt kī,
“hāy, kaun zindā rah saktā hai jab allāh yūṅ karegā?
24kittīm ke sāhil se baharī jahāz āeṅge jo asūr aur ibar ko zalīl kareṅge, lekin vah ḵẖud bhī halāk ho jāeṅge.”
25phir bal’ām uṭh kar apne ghar vāpas chalā gayā. balaq bhī vahāṅ se chalā gayā.