Gintī 15
kan’ān meṅ qurbāniyāṅ pesh karne kā tarīqā
1rabb ne mūsā se kahā, 2“isrāīliyoṅ ko batānā ki jab tum us mulk meṅ dāḵẖil hoge jo maiṅ tumheṅ dūṅgā 3-4 to jalne vālī qurbāniyāṅ yūṅ pesh karnā :
agar tum apne gāy-bailoṅ yā bheṛ-bakriyoṅ meṅ se aisī qurbānī pesh karnā chāho jis kī ḵẖushbū rabb ko pasand ho to sāth sāth ḍeṛh kilogrām behtarīn maidā bhī pesh karo jo ek liṭar zaitūn ke tel ke sāth milāyā gayā ho. is meṅ koī farq nahīṅ ki yah bhasm hone vālī qurbānī, mannat kī qurbānī, dilī ḵẖushī kī qurbānī yā kisī īd kī qurbānī ho.
5har bheṛ ko pesh karte vaqt ek liṭar mai bhī mai kī nazar ke taur par pesh karnā. 6jab meṅḍhā qurbān kiyā jāe 3 kilogrām behtarīn maidā bhī sāth pesh karnā jo savā liṭar tel ke sāth milāyā gayā ho. 7savā liṭar mai bhī mai kī nazar ke taur par pesh kī jāe. aisī qurbānī kī ḵẖushbū rabb ko pasand āegī.
8agar tū rabb ko bhasm hone vālī qurbānī, mannat kī qurbānī yā salāmatī kī qurbānī ke taur par javān bail pesh karnā chāhe 9to us ke sāth sāḍhe 4 kilogrām behtarīn maidā bhī pesh karnā jo do liṭar tel ke sāth milāyā gayā ho. 10do liṭar mai bhī mai kī nazar ke taur par pesh kī jāe. aisī qurbānī kī ḵẖushbū rabb ko pasand hai. 11lāzim hai ki jab bhī kisī gāy, bail, bheṛ, meṅḍhe, bakrī yā bakre ko chaṛhāyā jāe to aisā hī kiyā jāe.
12agar ek se zāid jānvaroṅ ko qurbān karnā hai to har ek ke liye muqarrarā ġallā aur mai kī nazreṅ bhī sāth hī pesh kī jāeṅ.
13lāzim hai ki har desī isrāīlī jalne vālī qurbāniyāṅ pesh karte vaqt aisā hī kare. phir un kī ḵẖushbū rabb ko pasand āegī. 14yah bhī lāzim hai ki isrāīl meṅ ārizī yā mustaqil taur par rahane vāle pardesī in usūloṅ ke mutābiq apnī qurbāniyāṅ chaṛhāeṅ. phir un kī ḵẖushbū rabb ko pasand āegī. 15mulk-e-kan’ān meṅ rahane vāle tamām logoṅ ke liye pābandiyāṅ ek jaisī haiṅ, ḵẖwāh vah desī hoṅ yā pardesī, kyūṅki rabb kī nazar meṅ pardesī tumhāre barābar hai. yah tumhāre aur tumhārī aulād ke liye dāimī usūl hai. 16tumhāre aur tumhāre sāth rahane vāle pardesī ke liye ek hī sharīat hai.”
fasal ke liye shukrguzārī kī qurbānī
17rabb ne mūsā se kahā, 18“isrāīliyoṅ ko batānā ki jab tum us mulk meṅ dāḵẖil hoge jis meṅ maiṅ tumheṅ le jā rahā hūṅ 19aur vahāṅ kī paidāvār khāoge to pahale us kā ek hissā uṭhāne vālī qurbānī ke taur par rabb ko pesh karnā. 20fasal ke pahale ḵẖālis āṭe meṅ se mere liye ek roṭī banā kar uṭhāne vālī qurbānī ke taur par pesh karo. vah gāhane kī jagah kī taraf se rabb ke liye uṭhāne vālī qurbānī hogī. 21apnī fasal ke pahale ḵẖālis āṭe meṅ se yah qurbānī pesh kiyā karo. yah usūl hameshā tak lāgū rahe.
nādānistā gunāhoṅ ke liye qurbāniyāṅ
22ho saktā hai ki ġairirādī taur par tum se ġaltī huī hai aur tum ne un ahkām par pūre taur par amal nahīṅ kiyā jo rabb mūsā ko de chukā hai 23yā jo vah āne vālī nasloṅ ko degā. 24agar jamāat is bāt se nāvāqif thī aur ġairirādī taur par us se ġaltī huī to phir pūrī jamāat ek javān bail bhasm hone vālī qurbānī ke taur par pesh kare. sāth hī vah muqarrarā ġallā aur mai kī nazreṅ bhī pesh kare. is kī ḵẖushbū rabb ko pasand hogī. is ke ilāvā jamāat gunāh kī qurbānī ke liye ek bakrā pesh kare. 25imām isrāīl kī pūrī jamāat kā kaffārā de to unheṅ muāfī milegī, kyūṅki un kā gunāh ġairirādī thā aur unhoṅ ne rabb ko bhasm hone vālī qurbānī aur gunāh kī qurbānī pesh kī hai. 26isrāīliyoṅ kī pūrī jamāat ko pardesiyoṅ samet muāfī milegī, kyūṅki gunāh ġairirādī thā.
27agar sirf ek shaḵẖs se ġairirādī taur par gunāh huā ho to gunāh kī qurbānī ke liye vah ek yaksālā bakrī pesh kare. 28imām rabb ke sāmne us shaḵẖs kā kaffārā de. jab kaffārā de diyā gayā to use muāfī hāsil hogī. 29yahī usūl pardesī par bhī lāgū hai. agar us se ġairirādī taur par gunāh huā ho to vah muāfī hāsil karne ke liye vahī kuchh kare jo isrāīlī ko karnā hotā hai.
dānistā gunāhoṅ ke liye sazā-e-maut
30lekin agar koī desī yā pardesī jān-būjh kar gunāh kartā hai to aisā shaḵẖs rabb kī ihānat kartā hai, is liye lāzim hai ki use us kī qaum meṅ se miṭāyā jāe. 31us ne rabb kā kalām haqīr jān kar us ke ahkām toṛ ḍāle haiṅ, is liye use zarūr qaum meṅ se miṭāyā jāe. vah apne gunāh kā zimmādār hai.”
32jab isrāīlī registān meṅ se guzar rahe the to ek ādmī ko pakṛā gayā jo hafte ke din lakṛiyāṅ jamā kar rahā thā. 33jinhoṅ ne use pakṛā thā vah use mūsā, hārūn aur pūrī jamāat ke pās le āe. 34chūṅki sāf mālūm nahīṅ thā ki us ke sāth kyā kiyā jāe is liye unhoṅ ne use giriftār kar liyā.
35phir rabb ne mūsā se kahā, “is ādmī ko zarūr sazā-e-maut dī jāe. pūrī jamāat use ḵẖaimāgāh ke bāhar le jā kar saṅgasār kare.” 36chunāṅche jamāat ne use ḵẖaimāgāh ke bāhar le jā kar saṅgasār kiyā, jis tarah rabb ne mūsā ko hukm diyā thā.
ahkām kī yād dilāne vāle phundane
37rabb ne mūsā se kahā, 38“isrāīliyoṅ ko batānā ki tum aur tumhāre bād kī nasleṅ apne libās ke kināroṅ par phundane lagāeṅ. har phundanā ek qirmizī ḍorī se libās ke sāth lagā ho. 39in phundanoṅ ko dekh kar tumheṅ rabb ke tamām ahkām yād raheṅge aur tum un par amal karoge. phir tum apne diloṅ aur āṅkhoṅ kī ġalat ḵẖwāhishoṅ ke pīchhe nahīṅ paṛoge balki zinākārī se dūr rahoge. 40phir tum mere ahkām ko yād karke un par amal karoge aur apne ḵẖudā ke sāmne maḵẖsūs-o-muqaddas rahoge. 41maiṅ rabb tumhārā ḵẖudā hūṅ jo tumheṅ misr se nikāl lāyā tāki tumhārā ḵẖudā hūṅ. maiṅ rabb tumhārā ḵẖudā hūṅ.”