Gintī 13

mulk-e-kan’ān meṅ isrāīlī jāsūs

¹phir rabb ne mūsā se kahā, ²“kuchh ādmī mulk-e-kan’ān kā jāizā lene ke liye bhej de, kyūṅki maiṅ use isrāīliyoṅ ko dene ko hūṅ. har qabīle meṅ se ek rāhanumā ko chun kar bhej de.”

³mūsā ne rabb ke kahane par unheṅ dasht-e-fārān se bhejā. sab isrāīlī rāhanumā the. ⁴un ke nām yah haiṅ : rūbin ke qabīle se sammūa bin zakkūr,

⁵shamāūn ke qabīle se sāfat bin horī,

⁶yahūdāh ke qabīle se kālib bin yafunnā,

⁷ishkār ke qabīle se ijāl bin yūsuf,

⁸ifrāīm ke qabīle se hosea bin nūn,

⁹binyamīn ke qabīle se faltī bin rafū,

¹⁰zabūlūn ke qabīle se jaddīel bin sodī,

¹¹yūsuf ke beṭe manassī ke qabīle se jiddī bin sūsī,

¹²dān ke qabīle se ammīel bin jamallī,

¹³āshar ke qabīle se satūr bin mīkāel,

¹⁴naftālī ke qabīle se naḵẖbī bin vufsī,

¹⁵jad ke qabīle se jiyūel bin mākī.

¹⁶mūsā ne in hī bārah ādmiyoṅ ko mulk kā jāizā lene ke liye bhejā. us ne hosea kā nām yashūa yānī ‘rabb najāt hai’ meṅ badal diyā.

¹⁷unheṅ ruḵẖsat karne se pahale us ne kahā, “dasht-e-najab se guzar kar pahāṛī ilāqe tak pahuṅcho. ¹⁸mālūm karo ki yah kis tarah kā mulk hai aur us ke bāshinde kaise haiṅ. kyā vah tāqatvar haiṅ yā kamzor, tādād meṅ kam haiṅ yā ziyādā? ¹⁹jis mulk meṅ vah baste haiṅ kyā vah acchhā hai ki nahīṅ? vah kis qism ke shaharoṅ meṅ rahate haiṅ? kyā un kī chāradīvāriyāṅ haiṅ ki nahīṅ? ²⁰mulk kī zamīn zarḵẖez hai yā baṅjar? us meṅ daraḵẖt haiṅ ki nahīṅ? aur jur’at karke mulk kā kuchh phal chun kar le āo.” us vaqt pahale aṅgūr pak gae the.

²¹chunāṅche in ādmiyoṅ ne safar karke dasht-e-sīn se rahob tak mulk kā jāizā liyā. rahob labo-hamāt ke qarīb hai. ²²vah dasht-e-najab se guzar kar habrūn pahuṅche jahāṅ anāq ke beṭe aḵẖīmān, sīsī aur talmī rahate the. (habrūn ko misr ke shahar zuan se sāt sāl pahale tāmīr kiyā gayā thā). ²³jab vah vādī-e-iskāl tak pahuṅche to unhoṅ ne ek ḍālī kāṭ lī jis par aṅgūr kā gucchhā lagā huā thā. do ādmiyoṅ ne yah aṅgūr, kuchh anār aur kuchh anjīr lāṭhī par laṭkāe aur use uṭhā kar chal paṛe. ²⁴us jagah kā nām us gucchhe ke sabab se jo isrāīliyoṅ ne vahāṅ se kāṭ liyā iskāl yānī gucchhā rakhā gayā.

²⁵chālīs din tak mulk kā khoj lagāte lagāte vah lauṭ āe. ²⁶vah mūsā, hārūn aur isrāīl kī pūrī jamāat ke pās āe jo dasht-e-fārān meṅ qādis kī jagah par intizār kar rahe the. vahāṅ unhoṅ ne sab kuchh batāyā jo unhoṅ ne mālūm kiyā thā aur unheṅ vah phal dikhāe jo le kar āe the. ²⁷unhoṅ ne mūsā ko riporṭ dī, “ham us mulk meṅ gae jahāṅ āp ne hameṅ bhejā thā. vāqaī us mulk meṅ dūdh aur shahad kī kasrat hai. yahāṅ hamāre pās us ke kuchh phal bhī haiṅ. ²⁸lekin us ke bāshinde tāqatvar haiṅ. un ke shaharoṅ kī fasīleṅ haiṅ, aur vah nihāyat baṛe haiṅ. ham ne vahāṅ anāq kī aulād bhī dekhī. ²⁹amālīqī dasht-e-najab meṅ rahate haiṅ jabki hittī, yabūsī aur amorī pahāṛī ilāqe meṅ ābād haiṅ. kan’ānī sāhilī ilāqe aur daryā-e-yardan ke kināre kināre baste haiṅ.”

³⁰kālib ne mūsā ke sāmne jamāshudā logoṅ ko ishārā kiyā ki vah ḵẖāmosh ho jāeṅ. phir us ne kahā, “āeṅ, ham mulk meṅ dāḵẖil ho jāeṅ aur us par qabzā kar leṅ, kyūṅki ham yaqīnan yah karne ke qābil haiṅ.” ³¹lekin dūsre ādmiyoṅ ne jo us ke sāth mulk ko dekhne gae the kahā, “ham un logoṅ par hamlā nahīṅ kar sakte, kyūṅki vah ham se tāqatvar haiṅ.” ³²unhoṅ ne isrāīliyoṅ ke darmiyān us mulk ke bāre meṅ ġalat afwāheṅ phailāīṅ jis kī taftīsh unhoṅ ne kī thī. unhoṅ ne kahā, “jis mulk meṅ se ham guzre tāki us kā jāizā leṅ vah apne bāshindoṅ ko haṛap kar letā hai. jo bhī us meṅ rahatā hai nihāyat darāzaqad hai. ³³ham ne vahāṅ deo bhī dekhe. (anāq ke beṭe deoṅ kī aulād the). un ke sāmne ham apne āp ko ṭiḍḍī jaisā mahsūs kar rahe the, aur ham un kī nazar meṅ aise the bhī.”