Nāhūm 1

allāh ke ġazab kā izhār

¹zail meṅ nīnvā ke bāre meṅ vah kalām qalamband hai jo allāh ne royā meṅ nāhūm ilqūshī ko dikhāyā.

²rabb ġairatmand aur intiqām lene vālā ḵẖudā hai. intiqām lete vaqt rabb apnā pūrā ġussā utārtā hai. rabb apne muḵẖālifoṅ se badlā letā aur apne dushmanoṅ se nārāz rahatā hai.

³rabb tahammul se bharpūr hai, aur us kī qudrat azīm hai. vah qusūrvār ko kabhī bhī sazā die baġair nahīṅ chhoṛtā.

vah āṅdhī aur tūfān se ghirā huā chaltā hai, aur bādal us ke pāoṅ tale kī gard hote haiṅ.

⁴vah samundar ko ḍāṅṭtā to vah sūkh jātā, us ke hukm par tamām daryā ḵẖushk ho jāte haiṅ. tab basan aur karmil kī shādāb hariyālī murjhā jātī aur lubnān ke phūl kamlā jāte haiṅ.

⁵us ke sāmne pahāṛ laraz uṭhte, pahāṛiyāṅ pighal jātī haiṅ. us ke huzūr pūrī zamīn apne bāshindoṅ samet laraz uṭhtī hai.

⁶kaun us kī nārāzī aur us ke shadīd qahar kā sāmnā kar saktā hai? us kā ġazab āg kī tarah bhaṛak kar zamīn par nāzil hotā hai, us ke āne par patthar phaṭ kar ṭukṛe ṭukṛe ho jāte haiṅ.

⁷rabb meharbān hai. musībat ke din vah mazbūt qil’ā hai, aur jo us meṅ panāh lete haiṅ unheṅ vah jāntā hai.

⁸lekin apne dushmanoṅ par vah sailāb lāegā jo un ke maqām ko ġarq karegā. jahāṅ bhī dushman bhāg jāe vahāṅ us par tārīkī chhā jāne degā.

⁹rabb ke ḵẖilāf mansūbā bāṅdhne kā kyā fāidā? vah to tumheṅ ek dam tabāh kar degā, dūsrī bār tum par āfat lāne kī zarūrat hī nahīṅ hogī.

¹⁰kyūṅki go dushman ghanī aur ḵẖārdār jhāṛiyoṅ aur nashe meṅ dhut sharābī kī mānind haiṅ, lekin vah jald hī ḵẖushk bhūse kī tarah bhasm ho jāeṅge.

¹¹ai nīnvā, tujh se vah nikal āyā jis ne rabb ke ḵẖilāf bure mansūbe bāṅdhe, jis ne shaitānī mashvre die.

¹²lekin apnī qaum se rabb farmātā hai, “go dushman tāqatvar aur beshumār kyūṅ na hoṅ to bhī unheṅ miṭāyā jāegā aur vah ġāib ho jāeṅge. beshak maiṅ ne tujhe past kar diyā, lekin āindā aisā nahīṅ karūṅgā. ¹³ab maiṅ vah jūā toṛ ḍālūṅgā jo unhoṅ ne terī gardan par rakh diyā thā, maiṅ terī zanjīroṅ ko phāṛ ḍālūṅgā.”

¹⁴lekin nīnvā se rabb farmātā hai, “āindā terī koī aulād qāim nahīṅ rahegī jo terā nām rakhe. jitne bhī but aur mujassme tere mandir meṅ paṛe haiṅ un sab ko maiṅ nest-o-nābūd kar dūṅgā. maiṅ terī qabr tayyār kar rahā hūṅ, kyūṅki tū kuchh bhī nahīṅ hai.”

nīnvā kī shikast

¹⁵vah dekho, pahāṛoṅ par us ke qadam chal rahe haiṅ jo amn-o-amān kī ḵẖushḵẖabarī sunātā hai. ai yahūdāh, ab apnī īdeṅ manā, apnī mannateṅ pūrī kar! kyūṅki āindā shaitānī ādmī tujh meṅ nahīṅ ghusegā, vah sarāsar miṭ gayā hai.