Mattī 19
talāq ke bāre meṅ tālīm
1yah kahane ke bād īsā galīl ko chhoṛ kar yahūdiyā meṅ daryā-e- yardan ke pār chalā gayā. 2baṛā hujūm us ke pīchhe ho liyā aur us ne unheṅ vahāṅ shifā dī.
3kuchh farīsī āe aur use phaṅsāne kī ġaraz se savāl kiyā, “kyā jāiz hai ki mard apnī bīvī ko kisī bhī vajah se talāq de?”
4īsā ne javāb diyā, “kyā tum ne kalām-e-muqaddas meṅ nahīṅ paṛhā ki ibtidā meṅ ḵẖāliq ne unheṅ mard aur aurat banāyā? 5aur us ne farmāyā, ‘is liye mard apne māṅ-bāp ko chhoṛ kar apnī bīvī ke sāth paivast ho jātā hai. vah donoṅ ek ho jāte haiṅ.’ 6yūṅ vah kalām-e-muqaddas ke mutābiq do nahīṅ rahate balki ek ho jāte haiṅ. jise allāh ne joṛā hai use insān judā na kare.”
7unhoṅ ne etirāz kiyā, “to phir mūsā ne yah kyūṅ farmāyā ki ādmī talāqnāmā likh kar bīvī ko ruḵẖsat kar de?”
8īsā ne javāb diyā, “mūsā ne tumhārī saḵẖtdilī kī vajah se tum ko apnī bīvī ko talāq dene kī ijāzat dī. lekin ibtidā meṅ aisā na thā. 9maiṅ tumheṅ batātā hūṅ, jo apnī bīvī ko jis ne zinā na kiyā ho talāq de aur kisī aur se shādī kare, vah zinā kartā hai.”
10shāgirdoṅ ne us se kahā, “agar shauhar aur bīvī kā āpas kā tālluq aisā hai to shādī na karnā behatar hai.”
11īsā ne javāb diyā, “har koī yah bāt samajh nahīṅ saktā balki sirf vah jise is qābil banā diyā gayā ho. 12kyūṅki kuchh paidāish hī se shādī karne ke qābil nahīṅ hote, bāz ko dūsroṅ ne yūṅ banāyā hai aur bāz ne āsmān kī bādshāhī kī ḵẖātir shādī karne se inkār kiyā hai. lihāzā jo yah samajh sake vah samajh le.”
īsā chhoṭe bacchoṅ ko barkat detā hai
13ek din chhoṭe bacchoṅ ko īsā ke pās lāyā gayā tāki vah un par apne hāth rakh kar duā kare. lekin shāgirdoṅ ne lāne vāloṅ ko malāmat kī. 14yah dekh kar īsā ne kahā, “bacchoṅ ko mere pās āne do aur unheṅ na roko, kyūṅki āsmān kī bādshāhī in jaise logoṅ ko hāsil hai.”
15us ne un par apne hāth rakhe aur phir vahāṅ se chalā gayā.
amīr mushkil se allāh kī bādshāhī meṅ dāḵẖil ho sakte haiṅ
16phir ek ādmī īsā ke pās āyā. us ne kahā, “ustād, maiṅ kaun sā nek kām karūṅ tāki abdī zindagī mil jāe?”
17īsā ne javāb diyā, “tū mujhe nekī ke bāre meṅ kyūṅ pūchh rahā hai? sirf ek hī nek hai. lekin agar tū abdī zindagī meṅ dāḵẖil honā chāhatā hai to ahkām ke mutābiq zindagī guzār.”
18ādmī ne pūchhā, “kaun se ahkām?”
īsā ne javāb diyā, “qatl na karnā, zinā na karnā, chorī na karnā, jhūṭī gavāhī na denā, 19apne bāp aur apnī māṅ kī izzat karnā aur apne paṛosī se vaisī muhabbat rakhnā jaisī tū apne āp se rakhtā hai.”
20javān ādmī ne javāb diyā, “maiṅ ne in tamām ahkām kī pairvī kī hai, ab kyā rah gayā hai?”
21īsā ne use batāyā, “agar tū kāmil honā chāhatā hai to jā aur apnī pūrī jāydād faroḵẖt karke paise ġarīboṅ meṅ taqsīm kar de. phir tere liye āsmān par ḵẖazānā jamā ho jāegā. is ke bād ā kar mere pīchhe ho le.”
22yah sun kar naujavān māyūs ho kar chalā gayā, kyūṅki vah nihāyat daulatmand thā.
23is par īsā ne apne shāgirdoṅ se kahā, “maiṅ tum ko sacch batātā hūṅ ki daulatmand ke liye āsmān kī bādshāhī meṅ dāḵẖil honā mushkil hai. 24maiṅ yah dubārā kahatā hūṅ, amīr ke āsmān kī bādshāhī meṅ dāḵẖil hone kī nisbat ziyādā āsān yah hai ki ūṅṭ sūī ke nāke meṅ se guzar jāe.”
25yah sun kar shāgird nihāyat hairatzadā hue aur pūchhne lage, “phir kis ko najāt hāsil ho saktī hai?”
26īsā ne ġaur se un kī taraf dekh kar javāb diyā, “yah insān ke liye to nāmumkin hai, lekin allāh ke liye sab kuchh mumkin hai.”
27phir patras bol uṭhā, “ham to apnā sab kuchh chhoṛ kar āp ke pīchhe ho liye haiṅ. hameṅ kyā milegā?”
28īsā ne un se kahā, “maiṅ tum ko sacch batātā hūṅ, duniyā kī naī taḵẖlīq par jab ibn-e-ādam apne jalālī taḵẖt par baiṭhegā to tum bhī jinhoṅ ne merī pairvī kī hai bārah taḵẖtoṅ par baiṭh kar isrāīl ke bārah qabīloṅ kī adālat karoge. 29aur jis ne bhī merī ḵẖātir apne gharoṅ, bhāiyoṅ, bahanoṅ, bāp, māṅ, bacchoṅ yā khetoṅ ko chhoṛ diyā hai use sau gunā ziyādā mil jāegā aur mīrās meṅ abdī zindagī pāegā. 30lekin bahut se log jo ab avval haiṅ us vaqt āḵẖir hoṅge aur jo ab āḵẖir haiṅ vah avval hoṅge.