Mattī 18
kaun sab se baṛā hai?
1us vaqt shāgird īsā ke pās ā kar pūchhne lage, “āsmān kī bādshāhī meṅ kaun sab se baṛā hai?”
2javāb meṅ īsā ne ek chhoṭe bacche ko bulā kar un ke darmiyān khaṛā kiyā 3aur kahā, “maiṅ tum ko sacch batātā hūṅ agar tum badal kar chhoṭe bacchoṅ kī mānind na bano to tum kabhī āsmān kī bādshāhī meṅ dāḵẖil nahīṅ hoge. 4is liye jo bhī apne āp ko is bacche kī tarah chhoṭā banāegā vah āsmān meṅ sab se baṛā hogā. 5aur jo bhī mere nām meṅ is jaise chhoṭe bacche ko qabūl kare vah mujhe qabūl kartā hai.
āzmāisheṅ
6lekin jo koī in chhoṭoṅ meṅ se kisī ko gunāh karne par uksāe us ke liye behatar hai ki us ke gale meṅ baṛī chakkī kā pāṭ bāṅdh kar use samundar kī gaharāiyoṅ meṅ ḍubo diyā jāe. 7duniyā par un chīzoṅ kī vajah se afsos jo gunāh karne par uksātī haiṅ. lāzim hai ki aisī āzmāisheṅ āeṅ, lekin us shaḵẖs par afsos jis kī mārifat vah āeṅ.
8agar terā hāth yā pāoṅ tujhe gunāh karne par uksāe to use kāṭ kar phaiṅk denā. is se pahale ki tujhe do hāthoṅ yā do pāoṅ samet jahannum kī abdī āg meṅ phaiṅkā jāe, behatar yah hai ki ek hāth yā pāoṅ se maharūm ho kar abdī zindagī meṅ dāḵẖil ho. 9aur agar terī āṅkh tujhe gunāh karne par uksāe to use nikāl kar phaiṅk denā. is se pahale ki tujhe do āṅkhoṅ samet jahannum kī āg meṅ phaiṅkā jāe behatar yah hai ki ek āṅkh se maharūm ho kar abdī zindagī meṅ dāḵẖil ho.
khoī huī bheṛ kī tamsīl
10ḵẖabardār! tum in chhoṭoṅ meṅ se kisī ko bhī haqīr na jānnā. kyūṅki maiṅ tum ko batātā hūṅ ki āsmān par in ke farishte har vaqt mere bāp ke chihare ko dekhte rahate haiṅ. 11[kyūṅki ibn-e-ādam khoe huoṅ ko ḍhūṅḍne aur najāt dene āyā hai.]
12tumhārā kyā ḵẖayāl hai? agar kisī ādmī kī 100 bheṛeṅ hoṅ aur ek bhaṭak kar gum ho jāe to vah kyā karegā? kyā vah bāqī 99 bheṛeṅ pahāṛī ilāqe meṅ chhoṛ kar bhaṭkī huī bheṛ ko ḍhūṅḍne nahīṅ jāegā? 13aur maiṅ tum ko sacch batātā hūṅ ki bhaṭkī huī bheṛ ke milne par vah us ke bāre meṅ un bāqī 99 bheṛoṅ kī nisbat kahīṅ ziyādā ḵẖushī manāegā jo bhaṭkī nahīṅ. 14bilkul isī tarah āsmān par tumhārā bāp nahīṅ chāhatā ki in chhoṭoṅ meṅ se ek bhī halāk ho jāe.
gunāh meṅ paṛe bhāī se sulūk
15agar tere bhāī ne terā gunāh kiyā ho to akele us ke pās jā kar us par us kā gunāh zāhir kar. agar vah terī bāt māne to tū ne apne bhāī ko jīt liyā. 16lekin agar vah na māne to ek yā do aur logoṅ ko apne sāth le jā tāki tumhārī har bāt kī do yā tīn gavāhoṅ se tasdīq ho jāe. 17agar vah un kī bāt bhī na māne to jamāat ko batā denā. aur agar vah jamāat kī bhī na māne to us ke sāth ġairīmāndār yā ṭaiks lene vāle kā sā sulūk kar.
bāṅdhne aur kholne kā iḵẖtiyār
18maiṅ tum ko sacch batātā hūṅ ki jo kuchh bhī tum zamīn par bāndhoge āsmān par bhī baṅdhegā, aur jo kuchh zamīn par khologe āsmān par bhī khulegā.
19maiṅ tum ko yah bhī batātā hūṅ ki agar tum meṅ se do shaḵẖs kisī bāt ko māṅgne par muttafiq ho jāeṅ to merā āsmānī bāp tum ko baḵẖshegā. 20kyūṅki jahāṅ bhī do yā tīn afrād mere nām meṅ jamā ho jāeṅ vahāṅ maiṅ un ke darmiyān hūṅgā.”
muāf na karne vāle naukar kī tamsīl
21phir patras ne īsā ke pās ā kar pūchhā, “ḵẖudāvand, jab merā bhāī merā gunāh kare to maiṅ kitnī bār use muāf karūṅ? sāt bār tak?”
22īsā ne javāb diyā, “maiṅ tujhe batātā hūṅ, sāt bār nahīṅ balki 77 bār. 23is liye āsmān kī bādshāhī ek bādshāh kī mānind hai jo apne naukroṅ ke karzoṅ kā hisāb-kitāb karnā chāhatā thā. 24hisāb-kitāb shurū karte vaqt ek ādmī us ke sāmne pesh kiyā gayā jo arboṅ ke hisāb se us kā qarzdār thā. 25vah yah raqam adā na kar sakā, is liye us ke mālik ne yah qarz vasūl karne ke liye hukm diyā ki use bāl-bacchoṅ aur tamām milkiyat samet faroḵẖt kar diyā jāe. 26yah sun kar naukar muṅh ke bal girā aur minnat karne lagā, ‘mujhe muhalat deṅ, maiṅ pūrī raqam adā kar dūṅgā.’ 27bādshāh ko us par taras āyā. us ne us kā qarz muāf karke use jāne diyā.
28lekin jab yahī naukar bāhar niklā to ek hamḵẖidmat milā jo us kā chand hazār rūpoṅ kā qarzdār thā. use pakaṛ kar vah us kā galā dabā kar kahane lagā, ‘apnā qarz adā kar!’ 29dūsrā naukar gir kar minnat karne lagā, ‘mujhe muhalat deṅ, maiṅ āp ko sārī raqam adā kar dūṅgā.’ 30lekin vah is ke liye tayyār na huā, balki jā kar use us vaqt tak jel meṅ ḍalvāyā jab tak vah pūrī raqam adā na kar de. 31jab bāqī naukroṅ ne yah dekhā to unheṅ shadīd dukh huā aur unhoṅ ne apne mālik ke pās jā kar sab kuchh batā diyā jo huā thā. 32is par mālik ne us naukar ko apne pās bulā liyā aur kahā, ‘sharīr naukar! jab tū ne merī minnat kī to maiṅ ne terā pūrā qarz muāf kar diyā. 33kyā lāzim na thā ki tū bhī apne sāthī naukar par utnā raham kartā jitnā maiṅ ne tujh par kiyā thā?’ 34ġusse meṅ mālik ne use jel ke afsaroṅ ke havāle kar diyā tāki us par us vaqt tak tashaddud kiyā jāe jab tak vah qarz kī pūrī raqam adā na kar de.
35merā āsmānī bāp tum meṅ se har ek ke sāth bhī aisā hī karegā agar tum ne apne bhāī ko pūre dil se muāf na kiyā.”