Mattī 13
bīj bone vāle kī tamsīl
1usī din īsā ghar se nikal kar jhīl ke kināre baiṭh gayā. 2itnā baṛā hujūm us ke gird jamā ho gayā ki āḵẖirkār vah ek kashtī meṅ baiṭh gayā jabki log kināre par khaṛe rahe. 3phir us ne unheṅ bahut sī bāteṅ tamsīloṅ meṅ sunāīṅ.
“ek kisān bīj bone ke liye niklā. 4jab bīj idhar udhar bikhar gayā to kuchh dāne rāste par gire aur parindoṅ ne ā kar unheṅ chug liyā. 5kuchh pathrīlī zamīn par gire jahāṅ miṭṭī kī kamī thī. vah jald ug āe kyūṅki miṭṭī gaharī nahīṅ thī. 6lekin jab sūraj niklā to paude jhulas gae aur chūṅki vah jaṛ na pakaṛ sake is liye sūkh gae. 7kuchh ḵẖudrau kāṅṭedār paudoṅ ke darmiyān bhī gire. vahāṅ vah ugne to lage, lekin ḵẖudrau paudoṅ ne sāth sāth baṛh kar unheṅ phalne phūlne na diyā. chunāṅche vah bhī ḵẖatm ho gae. 8lekin aise dāne bhī the jo zarḵẖez zamīn meṅ gire aur baṛhte baṛhte tīs gunā, sāṭh gunā balki sau gunā tak ziyādā phal lāe. 9jo sun saktā hai vah sun le!”
tamsīloṅ kā maqsad
10shāgird us ke pās ā kar pūchhne lage, “āp logoṅ se tamsīloṅ meṅ bāt kyūṅ karte haiṅ?”
11us ne javāb diyā, “tum ko to āsmān kī bādshāhī ke bhed samajhne kī liyāqat dī gaī hai, lekin unheṅ yah liyāqat nahīṅ dī gaī. 12jis ke pās kuchh hai use aur diyā jāegā aur us ke pās kasrat kī chīzeṅ hoṅgī. lekin jis ke pās kuchh nahīṅ hai us se vah bhī chhīn liyā jāegā jo us ke pās hai. 13is liye maiṅ tamsīloṅ meṅ un se bāt kartā hūṅ. kyūṅki vah dekhte hue kuchh nahīṅ dekhte, vah sunte hue kuchh nahīṅ sunte aur kuchh nahīṅ samajhte. 14un meṅ yasāyāh nabī kī yah peshgoī pūrī ho rahī hai :
‘tum apne kānoṅ se sunoge
magar kuchh nahīṅ samjhoge,
tum apnī āṅkhoṅ se dekhoge
magar kuchh nahīṅ jānoge.
15kyūṅki is qaum kā dil behiss ho gayā hai.
vah mushkil se apne kānoṅ se sunte haiṅ,
unhoṅ ne apnī āṅkhoṅ ko band kar rakhā hai,
aisā na ho ki vah apnī āṅkhoṅ se dekheṅ,
apne kānoṅ se suneṅ,
apne dil se samjheṅ,
merī taraf rujū kareṅ
aur maiṅ unheṅ shifā dūṅ.’
16lekin tumhārī āṅkheṅ mubārak haiṅ kyūṅki vah dekh saktī haiṅ aur tumhāre kān mubārak haiṅ kyūṅki vah sun sakte haiṅ. 17maiṅ tum ko sacch batātā hūṅ ki jo kuchh tum dekh rahe ho bahut se nabī aur rāstbāz ise dekh na pāe agarchi vah is ke ārzūmand the. aur jo kuchh tum sun rahe ho ise vah sunne na pāe, agarchi vah is ke ḵẖwāhishmand the.
bīj bone vāle kī tamsīl kā matlab
18ab suno ki bīj bone vāle kī tamsīl kā matlab kyā hai. 19rāste par gire hue dāne vah log haiṅ jo bādshāhī kā kalām sunte to haiṅ, lekin use samajhte nahīṅ. phir iblīs ā kar vah kalām chhīn letā hai jo un ke diloṅ meṅ boyā gayā hai. 20pathrīlī zamīn par gire hue dāne vah log haiṅ jo kalām sunte hī use ḵẖushī se qabūl to kar lete haiṅ, 21lekin vah jaṛ nahīṅ pakaṛte aur is liye ziyādā der tak qāim nahīṅ rahate. jūṅ hī vah kalām par īmān lāne ke bāis kisī musībat yā īzārasānī se dochār ho jāeṅ to vah bargashtā ho jāte haiṅ. 22ḵẖudrau kāṅṭedār paudoṅ ke darmiyān gire hue dāne vah log haiṅ jo kalām sunte to haiṅ, lekin phir rozmarrā kī pareshāniyāṅ aur daulat kā fareb kalām ko phalne phūlne nahīṅ detā. natīje meṅ vah phal lāne tak nahīṅ pahuṅchtā. 23is ke muqāble meṅ zarḵẖez zamīn meṅ gire hue dāne vah log haiṅ jo kalām ko sun kar use samajh lete aur baṛhte baṛhte tīs gunā, sāṭh gunā balki sau gunā tak phal lāte haiṅ.”
ḵẖudrau paudoṅ kī tamsīl
24īsā ne unheṅ ek aur tamsīl sunāī. “āsmān kī bādshāhī us kisān se mutābiqat rakhtī hai jis ne apne khet meṅ acchhā bīj bo diyā. 25lekin jab log so rahe the to us ke dushman ne ā kar anāj ke paudoṅ ke darmiyān ḵẖudrau paudoṅ kā bīj bo diyā. phir vah chalā gayā. 26jab anāj phūṭ niklā aur fasal pakne lagī to ḵẖudrau paude bhī nazar āe. 27naukar mālik ke pās āe aur kahane lage, ‘janāb, kyā āp ne apne khet meṅ acchhā bīj nahīṅ boyā thā? to phir yah ḵẖudrau paude kahāṅ se ā gae haiṅ?’
28us ne javāb diyā, ‘kisī dushman ne yah kar diyā hai.’
naukroṅ ne pūchhā, ‘kyā ham jā kar unheṅ ukhāṛeṅ?’
29‘nahīṅ,’ us ne kahā. ‘aisā na ho ki ḵẖudrau paudoṅ ke sāth sāth tum anāj ke paude bhī ukhāṛ ḍālo. 30unheṅ fasal kī kaṭāī tak mil kar baṛhne do. us vaqt maiṅ fasal kī kaṭāī karne vāloṅ se kahūṅgā ki pahale ḵẖudrau paudoṅ ko chun lo aur unheṅ jalāne ke liye gaṭhoṅ meṅ bāṅdh lo. phir hī anāj ko jamā karke godām meṅ lāo’.”
rāī ke dāne kī tamsīl
31īsā ne unheṅ ek aur tamsīl sunāī. “āsmān kī bādshāhī rāī ke dāne kī mānind hai jo kisī ne le kar apne khet meṅ bo diyā. 32go yah bījoṅ meṅ sab se chhoṭā dānā hai, lekin baṛhte baṛhte yah sabziyoṅ meṅ sab se baṛā ho jātā hai. balki yah daraḵẖt sā ban jātā hai aur parinde ā kar us kī shāḵẖoṅ meṅ ghoṅsle banā lete haiṅ.”
ḵẖamīr kī tamsīl
33us ne unheṅ ek aur tamsīl bhī sunāī. “āsmān kī bādshāhī ḵẖamīr kī mānind hai jo kisī aurat ne le kar taqrīban 27 kilogrām āṭe meṅ milā diyā. go vah us meṅ chhup gayā to bhī hote hote pūre guṅdhe hue āṭe ko ḵẖamīr banā diyā.”
tamsīloṅ meṅ bāt karne kā sabab
34īsā ne yah tamām bāteṅ hujūm ke sāmne tamsīloṅ kī sūrat meṅ kīṅ. tamsīl ke baġair us ne un se bāt hī nahīṅ kī. 35yūṅ nabī kī yah peshgoī pūrī huī ki “maiṅ tamsīloṅ meṅ bāt karūṅgā, maiṅ duniyā kī taḵẖlīq se le kar āj tak chhupī huī bāteṅ bayān karūṅgā.”
ḵẖudrau paudoṅ kī tamsīl kā matlab
36phir īsā hujūm ko ruḵẖsat karke ghar ke andar chalā gayā. us ke shāgird us ke pās ā kar kahane lage, “khet meṅ ḵẖudrau paudoṅ kī tamsīl kā matlab hameṅ samjhāeṅ.”
37us ne javāb diyā, “acchhā bīj bone vālā ibn-e-ādam hai. 38khet duniyā hai jabki acchhe bīj se murād bādshāhī ke farzand haiṅ. ḵẖudrau paude iblīs ke farzand haiṅ 39aur unheṅ bone vālā dushman iblīs hai. fasal kī kaṭāī kā matlab duniyā kā iḵẖtitām hai jabki fasal kī kaṭāī karne vāle farishte haiṅ. 40jis tarah tamsīl meṅ ḵẖudrau paude ukhāṛe jāte aur āg meṅ jalāe jāte haiṅ usī tarah duniyā ke iḵẖtitām par bhī kiyā jāegā. 41ibn-e-ādam apne farishtoṅ ko bhej degā, aur vah us kī bādshāhī se bargashtagī kā har sabab aur sharīat kī ḵẖilāfvarzī karne vāle har shaḵẖs ko nikālte jāeṅge. 42vah unheṅ bhaṛaktī bhaṭṭī meṅ phaiṅk deṅge jahāṅ log rote aur dāṅt pīste raheṅge. 43phir rāstbāz apne bāp kī bādshāhī meṅ sūraj kī tarah chamkeṅge. jo sun saktā hai vah sun le!
chhupe hue ḵẖazāne kī tamsīl
44āsmān kī bādshāhī khet meṅ chhupe ḵẖazāne kī mānind hai. jab kisī ādmī ko us ke bāre meṅ mālūm huā to us ne use dubārā chhupā diyā. phir vah ḵẖushī ke māre chalā gayā, apnī tamām milkiyat faroḵẖt kar dī aur us khet ko ḵẖarīd liyā.
motī kī tamsīl
45nīz, āsmān kī bādshāhī aise saudāgar kī mānind hai jo acchhe motiyoṅ kī talāsh meṅ thā. 46jab use ek nihāyat qīmtī motī ke bāre meṅ mālūm huā to vah chalā gayā, apnī tamām milkiyat faroḵẖt kar dī aur us motī ko ḵẖarīd liyā.
jāl kī tamsīl
47āsmān kī bādshāhī jāl kī mānind bhī hai. use jhīl meṅ ḍālā gayā to har qism kī machhliyāṅ pakṛī gaīṅ. 48jab vah bhar gayā to machheroṅ ne use kināre par khaiṅch liyā. phir unhoṅ ne baiṭh kar qābil-e-istemāl machhliyāṅ chun kar ṭokriyoṅ meṅ ḍāl dīṅ aur nāqābil-e-istemāl machhliyāṅ phaiṅk dīṅ. 49duniyā ke iḵẖtitām par aisā hī hogā. farishte āeṅge aur bure logoṅ ko rāstbāzoṅ se alag karke 50unheṅ bhaṛaktī bhaṭṭī meṅ phaiṅk deṅge jahāṅ log rote aur dāṅt pīste raheṅge.”
naī aur purānī sacchāiyāṅ
51īsā ne pūchhā, “kyā tum ko in tamām bātoṅ kī samajh ā gaī hai?”
“jī,” shāgirdoṅ ne javāb diyā.
52us ne un se kahā, “is liye sharīat kā har ālim jo āsmān kī bādshāhī meṅ shāgird ban gayā hai aise mālik-e-makān kī mānind hai jo apne ḵẖazāne se nae aur purāne javāhir nikāltā hai.”
īsā ko nāsrat meṅ radd kiyā jātā hai
53yah tamsīleṅ sunāne ke bād īsā vahāṅ se chalā gayā. 54apne vatnī shahar nāsrat pahuṅch kar vah ibādatḵẖāne meṅ logoṅ ko tālīm dene lagā. us kī bāteṅ sun kar vah hairatzadā hue. unhoṅ ne pūchhā, “use yah hikmat aur mojize karne kī yah qudrat kahāṅ se hāsil huī hai? 55kyā yah baṛhaī kā beṭā nahīṅ hai? kyā us kī māṅ kā nām mariyam nahīṅ hai, aur kyā us ke bhāī yāqūb, yūsuf, shamāūn aur yahūdā nahīṅ haiṅ? 56kyā us kī bahaneṅ hamāre sāth nahīṅ rahatīṅ? to phir use yah sab kuchh kahāṅ se mil gayā?” 57yūṅ vah us se ṭhokar khā kar use qabūl karne se qāsir rahe.
īsā ne un se kahā, “nabī kī izzat har jagah kī jātī hai sivā-e-us ke vatnī shahar aur us ke apne ḵẖāndān ke.” 58aur un ke īmān kī kamī ke bāis us ne vahāṅ ziyādā mojize na kie