Marqus 8
īsā 4000 afrād ko khānā khilātā hai
1un dinoṅ meṅ ek aur martabā aisā huā ki bahut se log jamā hue jin ke pās khāne kā band-o-bast nahīṅ thā. chunāṅche īsā ne apne shāgirdoṅ ko bulā kar un se kahā, 2“mujhe in logoṅ par taras ātā hai. inheṅ mere sāth ṭhahare tīn din ho chuke haiṅ aur in ke pās khāne kī koī chīz nahīṅ hai. 3lekin agar maiṅ inheṅ ruḵẖsat kar dūṅ aur vah is bhūkī hālat meṅ apne apne ghar chale jāeṅ to vah rāste meṅ thak kar chūr ho jāeṅge. aur in meṅ se kaī dūrdarāz se āe haiṅ.”
4us ke shāgirdoṅ ne javāb diyā, “is vīrān ilāqe meṅ kahāṅ se itnā khānā mil sakegā ki yah khā kar ser ho jāeṅ?”
5īsā ne pūchhā, “tumhāre pās kitnī roṭiyāṅ haiṅ?”
unhoṅ ne javāb diyā, “sāt.”
6īsā ne hujūm ko zamīn par baiṭhne ko kahā. phir sāt roṭiyoṅ ko le kar us ne shukrguzārī kī duā kī aur unheṅ toṛ toṛ kar apne shāgirdoṅ ko taqsīm karne ke liye de diyā. 7un ke pās do chār chhoṭī machhliyāṅ bhī thīṅ. īsā ne un par bhī shukrguzārī kī duā kī aur shāgirdoṅ ko unheṅ bāṅṭne ko kahā. 8logoṅ ne jī bhar kar khāyā. bād meṅ jab khāne ke bache hue ṭukṛe jamā kie gae to sāt baṛe ṭokre bhar gae. 9taqrīban 4,000 ādmī hāzir the. khāne ke bād īsā ne unheṅ ruḵẖsat kar diyā 10aur fauran kashtī par savār ho kar apne shāgirdoṅ ke sāth dalmanūtā ke ilāqe meṅ pahuṅch gayā.
farīsī ilāhī nishān talab karte haiṅ
11is par farīsī nikal kar īsā ke pās āe aur us se bahs karne lage. use āzmāne ke liye unhoṅ ne mutālbā kiyā ki vah unheṅ āsmān kī taraf se koī ilāhī nishān dikhāe tāki us kā iḵẖtiyār sābit ho jāe. 12lekin us ne ṭhaṅḍī āh bhar kar kahā, “yah nasal kyūṅ ilāhī nishān kā mutālbā kartī hai? maiṅ tum ko sacch batātā hūṅ ki ise koī nishān nahīṅ diyā jāegā.”
13aur unheṅ chhoṛ kar vah dubārā kashtī meṅ baiṭh gayā aur jhīl ko pār karne lagā.
farīsiyoṅ aur herodes kā ḵẖamīr
14lekin shāgird apne sāth khānā lānā bhūl gae the. kashtī meṅ un ke pās sirf ek roṭī thī. 15īsā ne unheṅ hidāyat kī, “ḵẖabardār, farīsiyoṅ aur herodes ke ḵẖamīr se hoshyār rahanā.”
16shāgird āpas meṅ bahs karne lage, “vah is liye kah rahe hoṅge ki hamāre pās roṭī nahīṅ hai.”
17īsā ko mālūm huā ki vah kyā soch rahe haiṅ. us ne kahā, “tum āpas meṅ kyūṅ bahs kar rahe ho ki hamāre pās roṭī nahīṅ hai? kyā tum ab tak na jānte, na samajhte ho? kyā tumhāre dil itne behiss ho gae haiṅ? 18tumhārī āṅkheṅ to haiṅ, kyā tum dekh nahīṅ sakte? tumhāre kān to haiṅ, kyā tum sun nahīṅ sakte? aur kyā tumheṅ yād nahīṅ 19jab maiṅ ne 5,000 ādmiyoṅ ko pāṅch roṭiyoṅ se ser kar diyā to tum ne bache hue ṭukṛoṅ ke kitne ṭokre uṭhāe the?”
unhoṅ ne javāb diyā, “bārah”.
20“aur jab maiṅ ne 4,000 ādmiyoṅ ko sāt roṭiyoṅ se ser kar diyā to tum ne bache hue ṭukṛoṅ ke kitne ṭokre uṭhāe the?”
unhoṅ ne javāb diyā, “sāt.” 21us ne pūchhā, “kyā tum abhī tak nahīṅ samajhte?”
bait-saidā meṅ aṅdhe kī shifā
22vah bait-saidā pahuṅche to log īsā ke pās ek aṅdhe ādmī ko lāe. unhoṅ ne iltimās kī ki vah use chhue. 23īsā aṅdhe kā hāth pakaṛ kar use gāoṅ se bāhar le gayā. vahāṅ us ne us kī āṅkhoṅ par thūk kar apne hāth us par rakh die aur pūchhā, “kyā tū kuchh dekh saktā hai?”
24ādmī ne nazar uṭhā kar kahā, “hāṅ, maiṅ logoṅ ko dekh saktā hūṅ. vah phirte hue daraḵẖtoṅ kī mānind dikhāī de rahe haiṅ.”
25īsā ne dubārā apne hāth us kī āṅkhoṅ par rakhe. is par ādmī kī āṅkheṅ pūre taur par khul gaīṅ, us kī nazar bahāl ho gaī aur vah sab kuchh sāf sāf dekh saktā thā. 26īsā ne use ruḵẖsat karke kahā, “is gāoṅ meṅ vāpas na jānā balki sīdhā apne ghar chalā jā.”
patras kā iqrār
27phir īsā vahāṅ se nikal kar apne shāgirdoṅ ke sāth qaisriyā-filippī ke qarīb ke dīhātoṅ meṅ gayā. chalte chalte us ne un se pūchhā, “maiṅ logoṅ ke nazdīk kaun hūṅ?”
28unhoṅ ne javāb diyā, “kuchh kahate haiṅ yahayā baptismā dene vālā, kuchh yah ki āp ilyās nabī haiṅ. kuchh yah bhī kahate haiṅ ki nabiyoṅ meṅ se ek.”
29us ne pūchhā, “lekin tum kyā kahate ho? tumhāre nazdīk maiṅ kaun hūṅ?”
patras ne javāb diyā, “āp masīh haiṅ.”
30yah sun kar īsā ne unheṅ kisī ko bhī yah bāt batāne se manā kiyā.
īsā apnī maut kā zikr kartā hai
31phir īsā unheṅ tālīm dene lagā, “lāzim hai ki ibn-e-ādam bahut dukh uṭhā kar buzurgoṅ, rāhanumā imāmoṅ aur sharīat ke ulmā se radd kiyā jāe. use qatl bhī kiyā jāegā, lekin vah tīsre din jī uṭhegā.” 32us ne unheṅ yah bāt sāf sāf batāī. is par patras use ek taraf le jā kar samjhāne lagā. 33īsā muṛ kar shāgirdoṅ kī taraf dekhne lagā. us ne patras ko ḍāṅṭā, “shaitān, mere sāmne se haṭ jā! tū allāh kī soch nahīṅ rakhtā balki insān kī.”
34phir us ne shāgirdoṅ ke ilāvā hujūm ko bhī apne pās bulāyā. us ne kahā, “jo mere pīchhe ānā chāhe vah apne āp kā inkār kare aur apnī salīb uṭhā kar mere pīchhe ho le. 35kyūṅki jo apnī jān ko bachāe rakhnā chāhe vah use kho degā. lekin jo merī aur allāh kī ḵẖushḵẖabarī kī ḵẖātir apnī jān kho de vahī use bachāegā. 36kyā fāidā hai agar kisī ko pūrī duniyā hāsil ho jāe, lekin vah apnī jān se maharūm ho jāe? 37insān apnī jān ke badle kyā de saktā hai? 38jo bhī is zinākār aur gunāh’ālūdā nasal ke sāmne mere aur merī bātoṅ ke sabab se sharmāe us se ibn-e-ādam bhī us vaqt sharamāegā jab vah apne bāp ke jalāl meṅ muqaddas farishtoṅ ke sāth āegā.”