Lūqā 17
gunāh
1īsā ne apne shāgirdoṅ se kahā, “āzmāishoṅ ko to ānā hī ānā hai, lekin us par afsos jis kī mārifat vah āeṅ. 2agar vah in chhoṭoṅ meṅ se kisī ko gunāh karne par uksāe to us ke liye behatar hai ki us ke gale meṅ baṛī chakkī kā pāṭ bāṅdhā jāe aur use samundar meṅ phaiṅk diyā jāe. 3ḵẖabardār raho!
agar tumhārā bhāī gunāh kare to use samjhāo. agar vah is par taubā kare to use muāf kar do. 4ab farz karo ki vah ek din ke andar sāt bār tumhārā gunāh kare, lekin har dafā vāpas ā kar taubā kā izhār kare, to bhī use har dafā muāf kar do.”
īmān
5rasūloṅ ne ḵẖudāvand se kahā, “hamāre īmān ko baṛhā deṅ.”
6ḵẖudāvand ne javāb diyā, “agar tumhārā īmān rāī ke dāne jaisā chhoṭā bhī ho to tum shahtūt ke is daraḵẖt ko kah sakte ho, ‘ukhaṛ kar samundar meṅ jā lag’ to vah tumhārī bāt par amal karegā.
ġulām kā farz
7farz karo ki tum meṅ se kisī ne hal chalāne yā jānvar charāne ke liye ek ġulām rakhā hai. jab yah ġulām khet se ghar āegā to kyā us kā mālik kahegā, ‘idhar āo, khāne ke liye baiṭh jāo?’ 8hargiz nahīṅ, balki vah yah kahegā, ‘merā khānā tayyār karo, ḍyūṭī ke kapṛe pahan kar merī ḵẖidmat karo jab tak maiṅ khā pī na lūṅ. is ke bād tum bhī khā aur pī sakoge.’ 9aur kyā vah apne ġulām kī us ḵẖidmat kā shukriyā adā karegā jo us ne use karne ko kahā thā? hargiz nahīṅ! 10isī tarah jab tum sab kuchh jo tumheṅ karne ko kahā gayā hai kar chuko tab tum ko yah kahanā chāhie, ‘ham nālāiq naukar haiṅ. ham ne sirf apnā farz adā kiyā hai’.”
koṛh ke das marīzoṅ kī shifā
11aisā huā ki yarūshalam kī taraf safar karte karte īsā sāmriyā aur galīl meṅ se guzrā. 12ek din vah kisī gāoṅ meṅ dāḵẖil ho rahā thā ki koṛh ke das marīz us ko milne āe. vah kuchh fāsile par khaṛe ho kar 13ūṅchī āvāz se kahane lage, “ai īsā, ustād, ham par raham kareṅ.”
14us ne unheṅ dekhā to kahā, “jāo, apne āp ko imāmoṅ ko dikhāo tāki vah tumhārā muāinā kareṅ.”
aur aisā huā ki vah chalte chalte apnī bīmārī se pāk-sāf ho gae. 15un meṅ se ek ne jab dekhā ki shifā mil gaī hai to vah muṛ kar ūṅchī āvāz se allāh kī tamjīd karne lagā, 16aur īsā ke sāmne muṅh ke bal gir kar shukriyā adā kiyā. yah ādmī sāmriyā kā bāshindā thā. 17īsā ne pūchhā, “kyā das ke das ādmī apnī bīmārī se pāk-sāf nahīṅ hue? bāqī nau kahāṅ haiṅ? 18kyā is ġairmulkī ke ilāvā koī aur vāpas ā kar allāh kī tamjīd karne ke liye tayyār nahīṅ thā?” 19phir us ne us se kahā, “uṭh kar chalā jā. tere īmān ne tujhe bachā liyā hai.”
allāh kī bādshāhī kab āegī
20kuchh farīsiyoṅ ne īsā se pūchhā, “allāh kī bādshāhī kab āegī?” us ne javāb diyā, “allāh kī bādshāhī yūṅ nahīṅ ā rahī ki use zāhirī nishānoṅ se pahachānā jāe. 21log yah bhī nahīṅ kah sakeṅge, ‘vah yahāṅ hai’ yā ‘vah vahāṅ hai’ kyūṅki allāh kī bādshāhī tumhāre darmiyān hai.”
22phir us ne apne shāgirdoṅ se kahā, “aise din āeṅge ki tum ibn-e-ādam kā kam az kam ek din dekhne kī tamannā karoge, lekin nahīṅ dekhoge. 23log tum ko batāeṅge, ‘vah vahāṅ hai’ yā ‘vah yahāṅ hai.’ lekin mat jānā aur un ke pīchhe na lagnā. 24kyūṅki jab ibn-e-ādam kā din āegā to vah bijlī kī mānind hogā jis kī chamak āsmān ko ek sire se le kar dūsre sire tak raushan kar detī hai. 25lekin pahale lāzim hai ki vah bahut dukh uṭhāe aur is nasal ke hāthoṅ radd kiyā jāe. 26jab ibn-e-ādam kā vaqt āegā to hālāt nūh ke dinoṅ jaise hoṅge. 27log us din tak khāne-pīne aur shādī karne karvāne meṅ lage rahe jab tak nūh kashtī meṅ dāḵẖil na ho gayā. phir sailāb ne ā kar un sab ko tabāh kar diyā. 28bilkul yahī kuchh lūt ke ayyām meṅ huā. log khāne-pīne, ḵẖarīd-o-faroḵẖt, kāshtkārī aur tāmīr ke kām meṅ lage rahe. 29lekin jab lūt sadūm ko chhoṛ kar niklā to āg aur gaṅdhak ne āsmān se baras kar un sab ko tabāh kar diyā. 30ibn-e-ādam ke zuhūr ke vaqt aise hī hālāt hoṅge.
31jo shaḵẖs us din chhat par ho vah ghar kā sāmān sāth le jāne ke liye nīche na utre. isī tarah jo khet meṅ ho vah apne pīchhe paṛī chīzoṅ ko sāth le jāne ke liye ghar na lauṭe. 32lūt kī bīvī ko yād rakho. 33jo apnī jān bachāne kī koshish karegā vah use kho degā, aur jo apnī jān kho degā vahī use bachāe rakhegā. 34maiṅ tum ko batātā hūṅ ki us rāt do afrād ek bistar meṅ soe hoṅge, ek ko sāth le liyā jāegā jabki dūsre ko pīchhe chhoṛ diyā jāegā. 35do ḵẖavātīn chakkī par gandum pīs rahī hoṅgī, ek ko sāth le liyā jāegā jabki dūsrī ko pīchhe chhoṛ diyā jāegā. 36[do afrād khet meṅ hoṅge, ek ko sāth le liyā jāegā jabki dūsre ko pīchhe chhoṛ diyā jāegā.]”
37unhoṅ ne pūchhā, “ḵẖudāvand, yah kahāṅ hogā?” us ne javāb diyā, “jahāṅ lāsh paṛī ho vahāṅ giddh jamā ho jāeṅge.”