Lūqā 16
chālāk mulāzim
1īsā ne shāgirdoṅ se kahā, “kisī amīr ādmī ne ek mulāzim rakhā thā jo us kī jāydād kī dekh-bhāl kartā thā. aisā huā ki ek din us par ilzām lagāyā gayā ki vah apne mālik kī daulat zāe kar rahā hai. 2mālik ne use bulā kar kahā, ‘yah kyā hai jo maiṅ tere bāre meṅ suntā hūṅ? apnī tamām zimmādāriyoṅ kā hisāb de, kyūṅki maiṅ tujhe barḵẖāst kar dūṅgā.’ 3mulāzim ne dil meṅ kahā, ‘ab maiṅ kyā karūṅ jabki merā mālik yah zimmādārī mujh se chhīn legā? khudāī jaisā saḵẖt kām mujh se nahīṅ hotā aur bhīk māṅgne se sharm ātī hai. 4hāṅ, maiṅ jāntā hūṅ ki kyā karūṅ tāki log mujhe barḵẖāst kie jāne ke bād apne gharoṅ meṅ ḵẖush’āmadīd kaheṅ.’
5yah kah kar us ne apne mālik ke tamām qarzdāroṅ ko bulāyā. pahale se us ne pūchhā, ‘tumhārā qarzā kitnā hai?’ 6us ne javāb diyā, ‘mujhe mālik ko zaitūn ke tel ke sau kanastar vāpas karne haiṅ.’ mulāzim ne kahā, ‘apnā bil le lo aur baiṭh kar jaldī se sau kanastar pachās meṅ badal lo.’ 7dūsre se us ne pūchhā, ‘tumhārā kitnā qarzā hai?’ us ne javāb diyā, ‘mujhe gandum kī hazār boriyāṅ vāpas karnī haiṅ.’ mulāzim ne kahā, ‘apnā bil le lo aur hazār ke badle āṭh sau likh lo.’
8yah dekh kar mālik ne beīmān mulāzim kī tārīf kī ki us ne aqal se kām liyā hai. kyūṅki is duniyā ke farzand apnī nasal ke logoṅ se nipaṭne meṅ nūr ke farzandoṅ se ziyādā hoshyār hote haiṅ.
9maiṅ tum ko batātā hūṅ ki duniyā kī nārāst daulat se apne liye dost banā lo tāki jab yah ḵẖatm ho jāe to log tum ko abdī rihāishagāhoṅ meṅ ḵẖush’āmadīd kaheṅ. 10jo thoṛe meṅ vafādār hai vah ziyādā meṅ bhī vafādār hogā. aur jo thoṛe meṅ beīmān hai vah ziyādā meṅ bhī beīmānī karegā. 11agar tum duniyā kī nārāst daulat ko saṁbhālne meṅ vafādār na rahe to phir kaun haqīqī daulat tumhāre sapurd karegā? 12aur agar tum ne dūsroṅ kī daulat saṁbhālne meṅ beīmānī dikhāī hai to phir kaun tum ko tumhāre zātī istemāl ke liye kuchh degā?
13koī bhī ġulām do mālikoṅ kī ḵẖidmat nahīṅ kar saktā. yā to vah ek se nafrat karke dūsre se muhabbat rakhegā, yā ek se lipaṭ kar dūsre ko haqīr jānegā. tum ek hī vaqt meṅ allāh aur daulat kī ḵẖidmat nahīṅ kar sakte.”
īsā kī chand kahāvateṅ
14farīsiyoṅ ne yah sab kuchh sunā to vah us kā mazāq uṛāne lage, kyūṅki vah lālchī the. 15us ne un se kahā, “tum hī vah ho jo apne āp ko logoṅ ke sāmne rāstbāz qarār dete ho, lekin allāh tumhāre diloṅ se vāqif hai. kyūṅki log jis chīz kī bahut qadar karte haiṅ vah allāh ke nazdīk makrūh hai.
16yahayā ke āne tak tumhāre rāhanumā mūsā kī sharīat aur nabiyoṅ ke paiġāmāt the. lekin ab allāh kī bādshāhī kī ḵẖushḵẖabarī kā elān kiyā jā rahā hai aur tamām log zabardastī is meṅ dāḵẖil ho rahe haiṅ. 17lekin is kā yah matlab nahīṅ ki sharīat mansūḵẖ ho gaī hai balki āsmān-o-zamīn jāte raheṅge, lekin sharīat kī zer zabar tak koī bhī bāt nahīṅ badlegī.
18chunāṅche jo ādmī apnī bīvī ko talāq de kar kisī aur se shādī kare vah zinā kartā hai. isī tarah jo kisī talākshudā aurat se shādī kare vah bhī zinā kartā hai.
amīr ādmī aur lāzar
19ek amīr ādmī kā zikr hai jo arġvānī raṅg ke kapṛe aur nafīs katān pahantā aur har roz aish-o-ishrat meṅ guzārtā thā. 20amīr ke geṭ par ek ġarīb ādmī paṛā thā jis ke pūre jism par nāsūr the. us kā nām lāzar thā 21aur us kī bas ek hī ḵẖwāhish thī ki vah amīr kī mez se gire hue ṭukṛe khā kar ser ho jāe. kutte us ke pās ā kar us ke nāsūr chāṭte the.
22phir aisā huā ki ġarīb ādmī mar gayā. farishtoṅ ne use uṭhā kar ibrāhīm kī god meṅ biṭhā diyā. amīr ādmī bhī faut huā aur dafnāyā gayā. 23vah jahannum meṅ pahuṅchā. azāb kī hālat meṅ us ne apnī nazar uṭhāī to dūr se ibrāhīm aur us kī god meṅ lāzar ko dekhā. 24vah pukār uṭhā, ‘ai mere bāp ibrāhīm, mujh par raham kareṅ. meharbānī karke lāzar ko mere pās bhej deṅ tāki vah apnī uṅglī ko pānī meṅ ḍubo kar merī zabān ko ṭhaṅḍā kare, kyūṅki maiṅ is āg meṅ taṛaptā hūṅ.’
25lekin ibrāhīm ne javāb diyā, ‘beṭā, yād rakh ki tujhe apnī zindagī meṅ behtarīn chīzeṅ mil chukī haiṅ jabki lāzar ko badtarīn chīzeṅ. lekin ab use ārām aur tasallī mil gaī hai jabki tujhe aziyat. 26nīz, hamāre aur tumhāre darmiyān ek vasī ḵẖalīj qāim hai. agar koī chāhe bhī to use pār karke yahāṅ se tumhāre pās nahīṅ jā saktā, na vahāṅ se koī yahāṅ ā saktā hai.’ 27amīr ādmī ne kahā, ‘mere bāp, phir merī ek aur guzārish hai, meharbānī karke lāzar ko mere vālid ke ghar bhej deṅ. 28mere pāṅch bhāī haiṅ. vah vahāṅ jā kar unheṅ āgāh kare, aisā na ho ki un kā anjām bhī yah aziyatanāk maqām ho.’
29lekin ibrāhīm ne javāb diyā, ‘un ke pās mūsā kī tauret aur nabiyoṅ ke sahīfe to haiṅ. vah un kī suneṅ.’ 30amīr ne arz kī, ‘nahīṅ, mere bāp ibrāhīm, agar koī murdoṅ meṅ se un ke pās jāe to phir vah zarūr taubā kareṅge.’ 31ibrāhīm ne kahā, ‘agar vah mūsā aur nabiyoṅ kī nahīṅ sunte to vah us vaqt bhī qāil nahīṅ hoṅge jab koī murdoṅ meṅ se jī uṭh kar un ke pās jāegā’.”