Ahabār 26

faramāṁbardārī kā ajr

¹apne liye but na banānā. na apne liye devtā ke mujassme yā patthar ke maḵẖsūs kie hue satūn khaṛe karnā, na sijdā karne ke liye apne mulk meṅ aise patthar rakhnā jin meṅ devtā kī tasvīr kandā kī gaī ho. maiṅ rabb tumhārā ḵẖudā hūṅ. ²sabat kā din manānā aur mere maqdis kī tāzīm karnā. maiṅ rabb hūṅ.

³agar tum merī hidāyāt par chalo aur mere ahkām mān kar un par amal karo ⁴to maiṅ vaqt par bārish bhejūṅgā, zamīn apnī paidāvār degī aur daraḵẖt apne apne phal lāeṅge. ⁵kasrat ke bāis anāj kī fasal kī kaṭāī aṅgūr toṛte vaqt tak jārī rahegī aur aṅgūr kī fasal us vaqt tak toṛī jāegī jab tak bīj bone kā mausam āegā. itnī ḵẖurāk milegī ki tum kabhī bhūke nahīṅ hoge. aur tum apne mulk meṅ mahfūz rahoge.

⁶maiṅ mulk ko amn-o-amān baḵẖshūṅgā. tum ārām se leṭ jāoge, kyūṅki kisī ḵẖatre se ḍarne kī zarūrat nahīṅ hogī. maiṅ vahashī jānvar mulk se dūr kar dūṅgā, aur vah talvār kī qatl-o-ġārat se bachā rahegā. ⁷tum apne dushmanoṅ par ġālib ā kar un kā tāqqub karoge, aur vah tumhārī talvār se māre jāeṅge. ⁸tumhāre pāṅch ādmī sau dushmanoṅ kā pīchhā kareṅge, aur tumhāre sau ādmī un ke das hazār ādmiyoṅ ko bhagā deṅge. tumhāre dushman tumhārī talvār se māre jāeṅge.

⁹merī nazar-e-karam tum par hogī. maiṅ tumhārī aulād kī tādād baṛhāūṅgā aur tumhāre sāth apnā ahd qāim rakhūṅgā. ¹⁰ek sāl itnī fasal hogī ki jab aglī fasal kī kaṭāī hogī to nae anāj ke liye jagah banāne kī ḵẖātir purāne anāj ko phaiṅk denā paṛegā. ¹¹maiṅ tumhāre darmiyān apnā maskan qāim karūṅgā aur tum se ghin nahīṅ khāūṅgā. ¹²maiṅ tum meṅ phirūṅgā, aur tum merī qaum hoge.

¹³maiṅ rabb tumhārā ḵẖudā hūṅ jo tumheṅ misr se nikāl lāyā tāki tumhārī ġulāmī kī hālat ḵẖatm ho jāe. maiṅ ne tumhāre jūe ko toṛ ḍālā, aur ab tum āzād aur sīdhe ho kar chal sakte ho.

faramāṁbardār na hone kī sazā

¹⁴lekin agar tum merī nahīṅ sunoge aur in tamām ahkām par nahīṅ chaloge, ¹⁵agar tum merī hidāyāt ko radd karke mere ahkām se ghin khāoge aur un par amal na karke merā ahd toṛoge ¹⁶to maiṅ javāb meṅ tum par achānak dahshat tārī kar dūṅgā. jism ko ḵẖatm karne vālī bīmāriyoṅ aur buḵẖār se tumhārī āṅkheṅ zāe ho jāeṅgī aur tumhārī jān chhin jāegī. jab tum bīj booge to befāidā, kyūṅki dushman us kī fasal khā jāegā. ¹⁷maiṅ tumhāre ḵẖilāf ho jāūṅgā, is liye tum apne dushmanoṅ ke hāth se shikast khāoge. tum se nafrat rakhne vāle tum par hukūmat kareṅge. us vaqt bhī jab koī tumhārā tāqqub nahīṅ karegā tum bhāg jāoge.

¹⁸agar tum is ke bād bhī merī na suno to maiṅ tumhāre gunāhoṅ ke sabab se tumheṅ sāt gunā ziyādā sazā dūṅgā. ¹⁹maiṅ tumhārā saḵẖt ġarūr ḵẖāk meṅ milā dūṅgā. tumhāre ūpar āsmān lohe jaisā aur tumhāre nīche zamīn pītal jaisī hogī. ²⁰jitnī bhī mehanat karoge vah befāidā hogī, kyūṅki tumhāre khetoṅ meṅ fasleṅ nahīṅ pakeṅgī aur tumhāre daraḵẖt phal nahīṅ lāeṅge.

²¹agar tum phir bhī merī muḵẖālafat karoge aur merī nahīṅ sunoge to maiṅ in gunāhoṅ ke javāb meṅ tumheṅ is se bhī sāt gunā ziyādā sazā dūṅgā. ²²maiṅ tumhāre ḵẖilāf jaṅglī jānvar bhej dūṅgā jo tumhāre bacchoṅ ko phāṛ khāeṅge aur tumhāre maveshī barbād kar deṅge. āḵẖir meṅ tumhārī tādād itnī kam ho jāegī ki tumhārī saṛkeṅ vīrān ho jāeṅgī.

²³agar tum phir bhī merī tarbiyat qabūl na karo balki mere muḵẖālif raho ²⁴to maiṅ ḵẖud tumhāre ḵẖilāf ho jāūṅgā. in gunāhoṅ ke javāb meṅ maiṅ tumheṅ sāt gunā ziyādā sazā dūṅgā. ²⁵maiṅ tum par talvār chalā kar is kā badlā lūṅgā ki tum ne mere ahd ko toṛā hai. jab tum apnī hifāzat ke liye shaharoṅ meṅ bhāg kar jamā hoge to maiṅ tumhāre darmiyān vabāī bīmāriyāṅ phailāūṅgā aur tumheṅ dushmanoṅ ke hāth meṅ de dūṅgā. ²⁶anāj kī itnī kamī hogī ki das aurteṅ tumhārī pūrī roṭī ek hī tanūr meṅ pakā sakeṅgī, aur vah use baṛī ehatiyāt se tol tol kar taqsīm kareṅgī. tum khā kar bhī bhūke rahoge.

²⁷agar tum phir bhī merī nahīṅ sunoge balki mere muḵẖālif rahoge ²⁸to merā ġussā bhaṛkegā aur maiṅ tumhāre ḵẖilāf ho kar tumhāre gunāhoṅ ke javāb meṅ tumheṅ sāt gunā ziyādā sazā dūṅgā. ²⁹tum musībat ke bāis apne beṭe-beṭiyoṅ kā gosht khāoge. ³⁰maiṅ tumhārī ūṅchī jagahoṅ kī qurbāngāheṅ aur tumhārī baḵẖūr kī qurbāngāheṅ barbād kar dūṅgā. maiṅ tumhārī lāshoṅ ke ḍher tumhāre bejān butoṅ par lagāūṅgā aur tum se ghin khāūṅgā. ³¹maiṅ tumhāre shaharoṅ ko khaṅḍarāt meṅ badal kar tumhāre mandiroṅ ko barbād karūṅgā. tumhārī qurbāniyoṅ kī ḵẖushbū mujhe pasand nahīṅ āegī. ³²maiṅ tumhāre mulk kā satyānās yūṅ karūṅgā ki jo dushman us meṅ ābād ho jāeṅge un ke roṅgṭe khaṛe ho jāeṅge. ³³maiṅ tumheṅ muḵẖtalif mamālik meṅ muntashir kar dūṅgā, lekin vahāṅ bhī apnī talvār ko hāth meṅ liye tumhārā pīchhā karūṅgā. tumhārī zamīn vīrān hogī aur tumhāre shahar khaṅḍarāt ban jāeṅge. ³⁴us vaqt jab tum apne dushmanoṅ ke mulk meṅ rahoge tumhārī zamīn vīrān hālat meṅ ārām ke vah sāl manā sakegī jin se vah maharūm rahī hai. ³⁵un tamām dinoṅ meṅ jab vah barbād rahegī use vah ārām milegā jo use na milā jab tum mulk meṅ rahate the.

³⁶tum meṅ se jo bach kar apne dushmanoṅ ke mamālik meṅ raheṅge un ke diloṅ par maiṅ dahshat tārī karūṅgā. vah havā ke jhoṅkoṅ se girne vāle patte kī āvāz se chauṅk kar bhāg jāeṅge. vah farār hoṅge goyā koī hāth meṅ talvār liye un kā tāqqub kar rahā ho. aur vah gir kar mar jāeṅge hālāṅki koī un kā pīchhā nahīṅ kar rahā hogā. ³⁷vah ek dūsre se ṭakrā kar laṛkhaṛāeṅge goyā koī talvār le kar un ke pīchhe chal rahā ho hālāṅki koī nahīṅ hai. chunāṅche tum apne dushmanoṅ kā sāmnā nahīṅ kar sakoge. ³⁸tum dīgar qaumoṅ meṅ muntashir ho kar halāk ho jāoge, aur tumhāre dushmanoṅ kī zamīn tumheṅ haṛap kar legī.

³⁹tum meṅ se bāqī log apne aur apne bāpdādā ke qusūr ke bāis apne dushmanoṅ ke mamālik meṅ gal saṛ jāeṅge. ⁴⁰lekin ek vaqt āegā ki vah apne aur apne bāpdādā kā qusūr mān leṅge. vah mere sāth apnī bevafāī aur vah muḵẖālafat taslīm kareṅge ⁴¹jis ke sabab se maiṅ un ke ḵẖilāf huā aur unheṅ un ke dushmanoṅ ke mulk meṅ dhakel diyā thā. pahale un kā ḵẖatnā sirf zāhirī taur par huā thā, lekin ab un kā dil ājiz ho jāegā aur vah apne qusūr kī qīmat adā kareṅge. ⁴²phir maiṅ ibrāhīm ke sāth apnā ahd, ishāq ke sāth apnā ahd aur yāqūb ke sāth apnā ahd yād karūṅgā. maiṅ mulk-e-kan’ān bhī yād karūṅgā. ⁴³lekin pahale vah zamīn ko chhoṛeṅge tāki vah un kī ġairmaujūdgī meṅ vīrān ho kar ārām ke sāl manāe. yūṅ isrāīlī apne qusūr ke natīje bhugateṅge, is sabab se ki unhoṅ ne mere ahkām radd kie aur merī hidāyāt se ghin khāī. ⁴⁴is ke bāvujūd bhī maiṅ unheṅ dushmanoṅ ke mulk meṅ chhoṛ kar radd nahīṅ karūṅgā, na yahāṅ tak un se ghin khāūṅgā ki vah bilkul tabāh ho jāeṅ. kyūṅki maiṅ un ke sāth apnā ahd nahīṅ toṛne kā. maiṅ rabb un kā ḵẖudā hūṅ. ⁴⁵maiṅ un kī ḵẖātir un ke bāpdādā ke sāth baṅdhā huā ahd yād karūṅgā, un logoṅ ke sāth ahd jinheṅ maiṅ dūsrī qaumoṅ ke dekhte dekhte misr se nikāl lāyā tāki un kā ḵẖudā hūṅ. maiṅ rabb hūṅ.”

⁴⁶rabb ne mūsā ko isrāīliyoṅ ke liye yah tamām hidāyāt aur ahkām sīnā pahāṛ par die.