Ahabār 21

imāmoṅ ke liye hidāyāt

¹rabb ne mūsā se kahā, “hārūn ke beṭoṅ ko jo imām haiṅ batā denā ki imām apne āp ko kisī isrāīlī kī lāsh ke qarīb jāne se nāpāk na kare ²sivā-e-apne qarībī rishtedāroṅ ke yānī māṅ, bāp, beṭā, beṭī, bhāī ³aur jo ġairshādīshudā bahan us ke ghar meṅ rahatī hai. ⁴vah apnī qaum meṅ kisī aur ke bāis apne āp ko nāpāk na kare, varnā us kī muqaddas hālat jātī rahegī.

⁵imām apne sar ko na muṅḍavāeṅ. vah na apnī dāṛhī ko tarāsheṅ aur na kāṭne se apne āp ko zaḵẖmī kareṅ.

⁶vah apne ḵẖudā ke liye maḵẖsūs-o-muqaddas raheṅ aur apne ḵẖudā ke nām ko dāġ na lagāeṅ. chūṅki vah rabb ko jalne vālī qurbāniyāṅ yānī apne ḵẖudā kī roṭī pesh karte haiṅ is liye lāzim hai ki vah muqaddas raheṅ. ⁷imām zinākār aurat, mandir kī kasbī yā talāqayāftā aurat se shādī na kareṅ, kyūṅki vah apne rabb ke liye maḵẖsūs-o-muqaddas haiṅ. ⁸imām ko muqaddas samajhnā, kyūṅki vah tere ḵẖudā kī roṭī ko qurbāngāh par chaṛhātā hai. vah tere liye muqaddas ṭhahare kyūṅki maiṅ rabb quddūs hūṅ. maiṅ hī tumheṅ muqaddas kartā hūṅ.

⁹kisī imām kī jo beṭī zinākārī se apnī muqaddas hālat ko ḵẖatm kar detī hai vah apne bāp kī muqaddas hālat ko bhī ḵẖatm kar detī hai. use jalā diyā jāe.

¹⁰imām-e-āzam ke sar par masah kā tel uṅḍelā gayā hai aur use imām-e-āzam ke muqaddas kapṛe pahanne kā iḵẖtiyār diyā gayā hai. is liye vah raṅj ke ālam meṅ apne bāloṅ ko bikharne na de, na kabhī apne kapṛoṅ ko phāṛe. ¹¹vah kisī lāsh ke qarīb na jāe, chāhe vah us ke bāp yā māṅ kī lāsh kyūṅ na ho, varnā vah nāpāk ho jāegā. ¹²jab tak koī lāsh us ke ghar meṅ paṛī rahe vah maqdis ko chhoṛ kar apne ghar na jāe, varnā vah maqdis ko nāpāk karegā. kyūṅki use us ke ḵẖudā ke tel se maḵẖsūs kiyā gayā hai. maiṅ rabb hūṅ. ¹³imām-e-āzam ko sirf kuṅvārī se shādī kī ijāzat hai. ¹⁴vah bevā, talāqayāftā aurat, mandir kī kasbī yā zinākār aurat se shādī na kare balki sirf apne qabīle kī kuṅvārī se, ¹⁵varnā us kī aulād maḵẖsūs-o-muqaddas nahīṅ hogī. kyūṅki maiṅ rabb hūṅ jo use apne liye maḵẖsūs-o-muqaddas kartā hūṅ.”

¹⁶rabb ne mūsā se yah bhī kahā, ¹⁷“hārūn ko batānā ki terī aulād meṅ se koī bhī jis ke jism meṅ nuqs ho mere huzūr ā kar apne ḵẖudā kī roṭī na chaṛhāe. yah usūl āne vālī nasloṅ ke liye bhī aṭal hai. ¹⁸kyūṅki koī bhī māzūr mere huzūr na āe, na aṅdhā, na laṅgṛā, na vah jis kī nāk chirī huī ho yā jis ke kisī uzv meṅ kamī beshī ho, ¹⁹na vah jis kā pāoṅ yā hāth ṭūṭā huā ho, ²⁰na kubṛā, na baunā, na vah jis kī āṅkh meṅ nuqs ho yā jise vabāī jildī bīmārī ho yā jis ke ḵẖusye kuchle hue hoṅ. ²¹hārūn imām kī koī bhī aulād jis ke jism meṅ nuqs ho mere huzūr ā kar rabb ko jalne vālī qurbāniyāṅ pesh na kare. chūṅki us meṅ nuqs hai is liye vah mere huzūr ā kar apne ḵẖudā kī roṭī na chaṛhāe. ²²use allāh kī muqaddas balki muqaddastarīn qurbāniyoṅ meṅ se bhī imāmoṅ kā hissā khāne kī ijāzat hai. ²³lekin chūṅki us meṅ nuqs hai is liye vah muqaddastarīn kamre ke darvāze ke parde ke qarīb na jāe, na qurbāngāh ke pās āe. varnā vah merī muqaddas chīzoṅ ko nāpāk karegā. kyūṅki maiṅ rabb hūṅ jo unheṅ apne liye maḵẖsūs-o-muqaddas kartā hūṅ.”

²⁴mūsā ne yah hidāyāt hārūn, us ke beṭoṅ aur tamām isrāīliyoṅ ko dīṅ.