Ahabār 20

jarāim kī sazāeṅ

¹rabb ne mūsā se kahā, ²“isrāīliyoṅ ko batānā ki tum meṅ se jo bhī apne bacche ko malik devtā ko qurbānī ke taur par pesh kare use sazā-e-maut denī hai. is meṅ koī farq nahīṅ ki vah isrāīlī hai yā pardesī. jamāat ke log use saṅgasār kareṅ. ³maiṅ ḵẖud aise shaḵẖs ke ḵẖilāf ho jāūṅgā aur use us kī qaum meṅ se miṭā ḍālūṅgā. kyūṅki apne bacchoṅ ko malik ko pesh karne se us ne mere maqdis ko nāpāk kiyā aur mere nām ko dāġ lagāyā hai. ⁴agar jamāat ke log apnī āṅkheṅ band karke aise shaḵẖs kī harkateṅ nazar’andāz kareṅ aur use sazā-e-maut na deṅ ⁵to phir maiṅ ḵẖud aise shaḵẖs aur us ke gharāne ke ḵẖilāf khaṛā ho jāūṅgā. maiṅ use aur un tamām logoṅ ko qaum meṅ se miṭā ḍālūṅgā jinhoṅ ne us ke pīchhe lag kar malik devtā ko sijdā karne se zinā kiyā hai.

⁶jo shaḵẖs murdoṅ se rābitā karne aur ġaibdānī karne vāloṅ kī taraf rujū kartā hai maiṅ us ke ḵẖilāf ho jāūṅgā. un kī pairvī karne se vah zinā kartā hai. maiṅ use us kī qaum meṅ se miṭā ḍālūṅgā. ⁷apne āp ko mere liye maḵẖsūs-o-muqaddas rakho, kyūṅki maiṅ rabb tumhārā ḵẖudā hūṅ. ⁸merī hidāyāt māno aur un par amal karo. maiṅ rabb hūṅ jo tumheṅ maḵẖsūs-o-muqaddas kartā hūṅ.

⁹jis ne bhī apne bāp yā māṅ par lānat bhejī hai use sazā-e-maut dī jāe. is harkat se vah apnī maut kā ḵẖud zimmādār hai.

¹⁰agar kisī mard ne kisī kī bīvī ke sāth zinā kiyā hai to donoṅ ko sazā-e-maut denī hai.

¹¹jo mard apne bāp kī bīvī se hambistar huā hai us ne apne bāp kī behuramtī kī hai. donoṅ ko sazā-e-maut denī hai. vah apnī maut ke ḵẖud zimmādār haiṅ.

¹²agar koī mard apnī bahū se hambistar huā hai to donoṅ ko sazā-e-maut denī hai. jo kuchh unhoṅ ne kiyā hai vah nihāyat sharmanāk hai. vah apnī maut ke ḵẖud zimmādār haiṅ.

¹³agar koī mard kisī dūsre mard se jinsī tālluqāt rakhe to donoṅ ko is ghinaunī harkat ke bāis sazā-e-maut denī hai. vah apnī maut ke ḵẖud zimmādār haiṅ.

¹⁴agar koī ādmī apnī bīvī ke ilāvā us kī māṅ se bhī shādī kare to yah ek nihāyat sharmanāk bāt hai. donoṅ ko jalā denā hai tāki tumhāre darmiyān koī aisī ḵẖabīs bāt na rahe.

¹⁵jo mard kisī jānvar se jinsī tālluqāt rakhe use sazā-e-maut denā hai. us jānvar ko bhī mār diyā jāe. ¹⁶jo aurat kisī jānvar se jinsī tālluqāt rakhe use sazā-e-maut denī hai. us jānvar ko bhī mār diyā jāe. vah apnī maut ke ḵẖud zimmādār haiṅ.

¹⁷jis mard ne apnī bahan se shādī kī hai us ne sharmanāk harkat kī hai, chāhe vah bāp kī beṭī ho yā māṅ kī. unheṅ isrāīlī qaum kī nazroṅ se miṭāyā jāe. aise shaḵẖs ne apnī bahan kī behuramtī kī hai. is liye use ḵẖud apne qusūr ke natīje bardāsht karne paṛeṅge.

¹⁸agar koī mard māhavārī ke ayyām meṅ kisī aurat se hambistar huā hai to donoṅ ko un kī qaum meṅ se miṭānā hai. kyūṅki donoṅ ne aurat ke ḵẖūn ke mambā se pardā uṭhāyā hai.

¹⁹apnī ḵẖālā yā phūphī se hambistar na honā. kyūṅki jo aisā kartā hai vah apnī qarībī rishtedār kī behuramtī kartā hai. donoṅ ko apne qusūr ke natīje bardāsht karne paṛeṅge.

²⁰jo apnī chachī yā tāī se hambistar huā hai us ne apne chachā yā tāyā kī behuramtī kī hai. donoṅ ko apne qusūr ke natīje bardāsht karne paṛeṅge. vah beaulād mareṅge.

²¹jis ne apnī bhābī se shādī kī hai us ne ek najis harkat kī hai. us ne apne bhāī kī behuramtī kī hai. vah beaulād raheṅge.

²²merī tamām hidāyāt aur ahkām ko māno aur un par amal karo. varnā jis mulk meṅ maiṅ tumheṅ le jā rahā hūṅ vah tumheṅ ugal degā. ²³un qaumoṅ ke rasm-o-rivāj ke mutābiq zindagī na guzārnā jinheṅ maiṅ tumhāre āge se nikāl dūṅgā. mujhe is sabab se un se ghin āne lagī ki vah yah sab kuchh karte the. ²⁴lekin tum se maiṅ ne kahā, ‘tum hī un kī zamīn par qabzā karoge. maiṅ hī use tumheṅ de dūṅgā, aisā mulk jis meṅ kasrat kā dūdh aur shahad hai.’ maiṅ rabb tumhārā ḵẖudā hūṅ, jis ne tum ko dīgar qaumoṅ meṅ se chun kar alag kar diyā hai. ²⁵is liye lāzim hai ki tum zamīn par chalne vāle jānvaroṅ aur parindoṅ meṅ pāk aur nāpāk kā imtiyāz karo. apne āp ko nāpāk jānvar khāne se qābil-e-ghin na banānā, chāhe vah zamīn par chalte yā reṅgte haiṅ, chāhe havā meṅ uṛte haiṅ. maiṅ hī ne unheṅ tumhāre liye nāpāk qarār diyā hai. ²⁶tumheṅ mere liye maḵẖsūs-o-muqaddas honā hai, kyūṅki maiṅ quddūs hūṅ, aur maiṅ ne tumheṅ dīgar qaumoṅ meṅ se chun kar apne liye alag kar liyā hai.

²⁷tum meṅ se jo murdoṅ se rābitā yā ġaibdānī kartā hai use sazā-e-maut denī hai, ḵẖwāh aurat ho yā mard. unheṅ saṅgasār karnā. vah apnī maut ke ḵẖud zimmādār haiṅ.”