Ahabār 18

nājāiz jinsī tālluqāt

¹rabb ne mūsā se kahā, ²“isrāīliyoṅ ko batānā ki maiṅ rabb tumhārā ḵẖudā hūṅ. ³misriyoṅ kī tarah zindagī na guzārnā jin meṅ tum rahate the. mulk-e-kan’ān ke logoṅ kī tarah bhī zindagī na guzārnā jin ke pās maiṅ tumheṅ le jā rahā hūṅ. un ke rasm-o-rivāj na apnānā. ⁴mere hī ahkām par amal karo aur merī hidāyāt ke mutābiq chalo. maiṅ rabb tumhārā ḵẖudā hūṅ. ⁵merī hidāyāt aur ahkām ke mutābiq chalnā, kyūṅki jo yūṅ karegā vah jītā rahegā. maiṅ rabb hūṅ.

⁶tum meṅ se koī bhī apnī qarībī rishtedār se hambistar na ho. maiṅ rabb hūṅ.

⁷apnī māṅ se hambistar na honā, varnā tere bāp kī behuramtī ho jāegī. vah terī māṅ hai, is liye us se hambistar na honā.

⁸apne bāp kī kisī bhī bīvī se hambistar na honā, varnā tere bāp kī behuramtī ho jāegī.

⁹apnī bahan se hambistar na honā, chāhe vah tere bāp yā terī māṅ kī beṭī ho, chāhe vah tere hī ghar meṅ yā kahīṅ aur paidā huī ho.

¹⁰apnī potī yā navāsī se hambistar na honā, varnā terī apnī behuramtī ho jāegī.

¹¹apne bāp kī bīvī kī beṭī se hambistar na honā. vah terī bahan hai.

¹²apnī phūphī se hambistar na honā. vah tere bāp kī qarībī rishtedār hai.

¹³apnī ḵẖālā se hambistar na honā. vah terī māṅ kī qarībī rishtedār hai.

¹⁴apne bāp ke bhāī kī bīvī se hambistar na honā, varnā tere bāp ke bhāī kī behuramtī ho jāegī. us kī bīvī terī chachī hai.

¹⁵apnī bahū se hambistar na honā. vah tere beṭe kī bīvī hai.

¹⁶apnī bhābī se hambistar na honā, varnā tere bhāī kī behuramtī ho jāegī.

¹⁷agar terā jinsī tālluq kisī aurat se ho to us kī beṭī, potī yā navāsī se hambistar honā manā hai, kyūṅki vah us kī qarībī rishtedār haiṅ. aisā karnā baṛī sharmanāk harkat hai.

¹⁸apnī bīvī ke jīte jī us kī bahan se shādī na karnā.

¹⁹kisī aurat se us kī māhavārī ke dinoṅ meṅ hambistar na honā. is daurān vah nāpāk hai.

²⁰kisī dūsre mard kī bīvī se hambistar na honā, varnā tū apne āp ko nāpāk karegā.

²¹apne kisī bhī bacche ko malik devtā ko qurbānī ke taur par pesh karke jalā denā manā hai. aisī harkat se tū apne ḵẖudā ke nām ko dāġ lagāegā. maiṅ rabb hūṅ.

²²mard dūsre mard ke sāth jinsī tālluqāt na rakhe. aisī harkat qābil-e-ghin hai.

²³kisī jānvar se jinsī tālluqāt na rakhnā, varnā tū nāpāk ho jāegā. aurtoṅ ke liye bhī aisā karnā manā hai. yah baṛī sharmanāk harkat hai.

²⁴aisī harkatoṅ se apne āp ko nāpāk na karnā. kyūṅki jo qaumeṅ maiṅ tumhāre āge mulk se nikālūṅgā vah isī tarah nāpāk hotī rahīṅ. ²⁵mulk ḵẖud bhī nāpāk huā. is liye maiṅ ne use us ke qusūr ke sabab se sazā dī, aur natīje meṅ us ne apne bāshindoṅ ko ugal diyā. ²⁶lekin tum merī hidāyāt aur ahkām ke mutābiq chalo. na desī aur na pardesī aisī koī ghinaunī harkat kareṅ. ²⁷kyūṅki yah tamām qābil-e-ghin bāteṅ un se huīṅ jo tum se pahale is mulk meṅ rahate the. yūṅ mulk nāpāk huā. ²⁸lihāzā agar tum bhī mulk ko nāpāk karoge to vah tumheṅ isī tarah ugal degā jis tarah us ne tum se pahale maujūd qaumoṅ ko ugal diyā. ²⁹jo bhī mazkūrā ghinaunī harkatoṅ meṅ se ek kare use us kī qaum meṅ se miṭāyā jāe. ³⁰mere ahkām ke mutābiq chalte raho aur aise qābil-e-ghin rasm-o-rivāj na apnānā jo tumhāre āne se pahale rāij the. in se apne āp ko nāpāk na karnā. maiṅ rabb tumhārā ḵẖudā hūṅ.”