Ahabār 17
qurbānī chaṛhāne kā maqām
1rabb ne mūsā se kahā, 2“hārūn, us ke beṭoṅ aur tamām isrāīliyoṅ ko hidāyat denā 3-4 ki jo bhī isrāīlī apnī gāy yā bheṛ-bakrī mulāqāt ke ḵẖaime ke darvāze par rabb ko qurbānī ke taur par pesh na kare balki ḵẖaimāgāh ke andar yā bāhar kisī aur jagah par zabah kare vah ḵẖūn bahāne kā qusūrvār ṭhaharegā. us ne ḵẖūn bahāyā hai, aur lāzim hai ki use us kī qaum meṅ se miṭāyā jāe. 5is hidāyat kā maqsad yah hai ki isrāīlī ab se apnī qurbāniyāṅ khule maidān meṅ zabah na kareṅ balki rabb ko pesh kareṅ. vah apne jānvaroṅ ko mulāqāt ke ḵẖaime ke darvāze par imām ke pās lā kar unheṅ rabb ko salāmatī kī qurbānī ke taur par pesh kareṅ. 6imām un kā ḵẖūn mulāqāt ke ḵẖaime ke darvāze par kī qurbāngāh par chhiṛke aur un kī charbī us par jalā de. aisī qurbānī kī ḵẖushbū rabb ko pasand hai. 7ab se isrāīlī apnī qurbāniyāṅ un bakroṅ ke devtāoṅ ko pesh na kareṅ jin kī pairvī karke unhoṅ ne zinā kiyā hai. yah un ke liye aur un ke bād āne vālī nasloṅ ke liye ek dāimī usūl hai.
8lāzim hai ki har isrāīlī aur tumhāre darmiyān rahane vālā pardesī apnī bhasm hone vālī qurbānī yā koī aur qurbānī 9mulāqāt ke ḵẖaime ke darvāze par lā kar rabb ko pesh kare. varnā use us kī qaum meṅ se miṭāyā jāegā.
ḵẖūn khānā manā hai
10ḵẖūn khānā bilkul manā hai. jo bhī isrāīlī yā tumhāre darmiyān rahane vālā pardesī ḵẖūn khāe maiṅ us ke ḵẖilāf ho jāūṅgā aur use us kī qaum meṅ se miṭā ḍālūṅgā. 11kyūṅki har maḵẖlūq ke ḵẖūn meṅ us kī jān hai. maiṅ ne use tumheṅ de diyā hai tāki vah qurbāngāh par tumhārā kaffārā de. kyūṅki ḵẖūn hī us jān ke zarīe jo us meṅ hai tumhārā kaffārā detā hai. 12is liye maiṅ kahatā hūṅ ki na koī isrāīlī na koī pardesī ḵẖūn khāe.
13agar koī bhī isrāīlī yā pardesī kisī jānvar yā parinde kā shikār karke pakṛe jise khāne kī ijāzat hai to vah use zabah karne ke bād us kā pūrā ḵẖūn zamīn par bahane de aur ḵẖūn par miṭṭī ḍāle. 14kyūṅki har maḵẖlūq kā ḵẖūn us kī jān hai. is liye maiṅ ne isrāīliyoṅ ko kahā hai ki kisī bhī maḵẖlūq kā ḵẖūn na khāo. har maḵẖlūq kā ḵẖūn us kī jān hai, aur jo bhī use khāe use qaum meṅ se miṭā denā hai.
15agar koī bhī isrāīlī yā pardesī aise jānvar kā gosht khāe jo fitrī taur par mar gayā yā jise jaṅglī jānvaroṅ ne phāṛ ḍālā ho to vah apne kapṛe dho kar nahā le. vah shām tak nāpāk rahegā. 16jo aisā nahīṅ kartā use apne qusūr kī sazā bhugatnī paṛegī.”