Ahabār 14

vabāī jildī bīmārī ke marīz kī shifā par qurbānī

¹rabb ne mūsā se kahā, ²“agar koī shaḵẖs jildī bīmārī se shifā pāe aur use pāk-sāf karānā hai to use imām ke pās lāyā jāe ³jo ḵẖaimāgāh ke bāhar jā kar us kā muāinā kare. agar vah dekhe ki marīz kī sehat vāqaī bahāl ho gaī hai ⁴to imām us ke liye do zindā aur pāk parinde, deodār kī lakṛī, qirmizī raṅg kā dhāgā aur zūfā maṅgavāe. ⁵imām ke hukm par parindoṅ meṅ se ek ko tāzā pānī se bhare hue miṭṭī ke bartan ke ūpar zabah kiyā jāe. ⁶imām zindā parinde ko deodār kī lakṛī, qirmizī raṅg ke dhāge aur zūfā ke sāth zabah kie gae parinde ke us ḵẖūn meṅ ḍubo de jo miṭṭī ke bartan ke pānī meṅ ā gayā hai. ⁷vah pānī se milāyā huā ḵẖūn sāt bār pāk hone vāle shaḵẖs par chhiṛak kar use pāk qarār de, phir zindā parinde ko khule maidān meṅ chhoṛ de. ⁸jo apne āp ko pāk-sāf karā rahā hai vah apne kapṛe dhoe, apne tamām bāl muṅḍavāe aur nahā le. is ke bād vah pāk hai. ab vah ḵẖaimāgāh meṅ dāḵẖil ho saktā hai agarchi vah mazīd sāt din apne ḍere meṅ nahīṅ jā saktā. ⁹sātveṅ din vah dubārā apne sar ke bāl, apnī dāṛhī, apne abrū aur bāqī tamām bāl muṅḍavāe. vah apne kapṛe dhoe aur nahā le. tab vah pāk hai.

¹⁰āṭhveṅ din vah do bheṛ ke nar bacche aur ek yaksālā bheṛ chun le jo beaib hoṅ. sāth hī vah ġallā kī nazar ke liye tel ke sāth milāyā gayā sāḍhe 4 kilogrām behtarīn maidā aur 300 milīliṭar tel le. ¹¹phir jis imām ne use pāk qarār diyā vah use in qurbāniyoṅ samet mulāqāt ke ḵẖaime ke darvāze par rabb ko pesh kare. ¹²bheṛ kā ek nar bacchā aur 300 milīliṭar tel qusūr kī qurbānī ke liye hai. imām unheṅ hilāne vālī qurbānī ke taur par rabb ke sāmne hilāe. ¹³phir vah bheṛ ke is bacche ko ḵẖaime ke darvāze par zabah kare jahāṅ gunāh kī qurbāniyāṅ aur bhasm hone vālī qurbāniyāṅ zabah kī jātī haiṅ. gunāh kī qurbāniyoṅ kī tarah qusūr kī yah qurbānī imām kā hissā hai aur nihāyat muqaddas hai. ¹⁴imām ḵẖūn meṅ se kuchh le kar pāk hone vāle ke dahane kān kī lau par aur us ke dahane hāth aur dahane pāoṅ ke aṅgūṭhoṅ par lagāe. ¹⁵ab vah 300 milīliṭar tel meṅ se kuchh le kar apne bāeṅ hāth kī hathelī par ḍāle. ¹⁶apne dahane hāth ke aṅgūṭhe ke sāth vālī uṅglī is tel meṅ ḍubo kar vah use sāt bār rabb ke sāmne chhiṛke. ¹⁷vah apnī hathelī par ke tel meṅ se kuchh aur le kar pāk hone vāle ke dahane kān kī lau par aur us ke dahane hāth aur dahane pāoṅ ke aṅgūṭhoṅ par lagā de yānī un jagahoṅ par jahāṅ vah qusūr kī qurbānī kā ḵẖūn lagā chukā hai. ¹⁸imām apnī hathelī par kā bāqī tel pāk hone vāle ke sar par ḍāl kar rabb ke sāmne us kā kaffārā de.

¹⁹is ke bād imām gunāh kī qurbānī chaṛhā kar pāk hone vāle kā kaffārā de. āḵẖir meṅ vah bhasm hone vālī qurbānī kā jānvar zabah kare. ²⁰vah use ġallā kī nazar ke sāth qurbāngāh par chaṛhā kar us kā kaffārā de. tab vah pāk hai.

²¹agar shifāyāb shaḵẖs ġurbat ke bāis yah qurbāniyāṅ nahīṅ chaṛhā saktā to phir vah qusūr kī qurbānī ke liye bheṛ kā sirf ek nar bacchā le āe. kāfī hai ki kaffārā dene ke liye yahī rabb ke sāmne hilāyā jāe. sāth sāth ġallā kī nazar ke liye ḍeṛh kilogrām behtarīn maidā tel ke sāth milā kar pesh kiyā jāe aur 300 milīliṭar tel. ²²is ke ilāvā vah do qumriyāṅ yā do javān kabūtar pesh kare, ek ko gunāh kī qurbānī ke liye aur dūsre ko bhasm hone vālī qurbānī ke liye. ²³āṭhveṅ din vah unheṅ mulāqāt ke ḵẖaime ke darvāze par imām ke pās aur rabb ke sāmne le āe tāki vah pāk-sāf ho jāe. ²⁴imām bheṛ ke bacche ko 300 milīliṭar tel samet le kar hilāne vālī qurbānī ke taur par rabb ke sāmne hilāe. ²⁵vah qusūr kī qurbānī ke liye bheṛ ke bacche ko zabah kare aur us ke ḵẖūn meṅ se kuchh le kar pāk hone vāle ke dahane kān kī lau par aur us ke dahane hāth aur dahane pāoṅ ke aṅgūṭhoṅ par lagāe. ²⁶ab vah 300 milīliṭar tel meṅ se kuchh apne bāeṅ hāth kī hathelī par ḍāle ²⁷aur apne dahane hāth ke aṅgūṭhe ke sāth vālī uṅglī is tel meṅ ḍubo kar use sāt bār rabb ke sāmne chhiṛak de. ²⁸vah apnī hathelī par ke tel meṅ se kuchh aur le kar pāk hone vāle ke dahane kān kī lau par aur us ke dahane hāth aur dahane pāoṅ ke aṅgūṭhoṅ par lagā de yānī un jagahoṅ par jahāṅ vah qusūr kī qurbānī kā ḵẖūn lagā chukā hai. ²⁹apnī hathelī par kā bāqī tel vah pāk hone vāle ke sar par ḍāl de tāki rabb ke sāmne us kā kaffārā de. ³⁰is ke bād vah shifāyāb shaḵẖs kī gunjāish ke mutābiq do qumriyāṅ yā do javān kabūtar chaṛhāe, ³¹ek ko gunāh kī qurbānī ke liye aur dūsre ko bhasm hone vālī qurbānī ke liye. sāth hī vah ġallā kī nazar pesh kare. yūṅ imām rabb ke sāmne us kā kaffārā detā hai. ³²yah usūl aise shaḵẖs ke liye hai jo vabāī jildī bīmārī se shifā pā gayā hai lekin apnī ġurbat ke bāis pāk ho jāne ke liye pūrī qurbānī pesh nahīṅ kar saktā.”

gharoṅ meṅ phaphūṅdī

³³rabb ne mūsā aur hārūn se kahā, ³⁴“jab tum mulk-e-kan’ān meṅ dāḵẖil hoge jo maiṅ tumheṅ dūṅgā to vahāṅ aise makān hoṅge jin meṅ maiṅ ne phaphūṅdī phailne dī hai. ³⁵aise ghar kā mālik jā kar imām ko batāe ki maiṅ ne apne ghar meṅ phaphūṅdī jaisī koī chīz dekhī hai. ³⁶tab imām hukm de ki ghar kā muāinā karne se pahale ghar kā pūrā sāmān nikālā jāe. varnā agar ghar ko nāpāk qarār diyā jāe to sāmān ko bhī nāpāk qarār diyā jāegā. is ke bād imām andar jā kar makān kā muāinā kare. ³⁷vah dīvāroṅ ke sāth lagī huī phaphūṅdī kā muāinā kare. agar mut’assirā jagaheṅ harī yā lāl sī hoṅ aur dīvār ke andar dhaṅsī huī nazar āeṅ ³⁸to phir imām ghar se nikal kar sāt din ke liye tālā lagāe. ³⁹sātveṅ din vah vāpas ā kar makān kā muāinā kare. agar phaphūṅdī phailī huī nazar āe ⁴⁰to vah hukm de ki mut’assirā pattharoṅ ko nikāl kar ābādī ke bāhar kisī nāpāk jagah par phaiṅkā jāe. ⁴¹nīz vah hukm de ki andar kī dīvāroṅ ko kuredā jāe aur kuredī huī miṭṭī ko ābādī ke bāhar kisī nāpāk jagah par phaiṅkā jāe. ⁴²phir log nae patthar lagā kar ghar ko nae gāre se palastar kareṅ. ⁴³lekin agar is ke bāvujūd phaphūṅdī dubārā paidā ho jāe ⁴⁴to imām ā kar dubārā us kā muāinā kare. agar vah dekhe ki phaphūṅdī ghar meṅ phail gaī hai to is kā matlab hai ki phaphūṅdī nuqsāndih hai, is liye ghar nāpāk hai. ⁴⁵lāzim hai ki use pūre taur par ḍhā diyā jāe aur sab kuchh yānī us ke patthar, lakṛī aur palastar ko ābādī ke bāhar kisī nāpāk jagah par phaiṅkā jāe.

⁴⁶agar imām ne kisī ghar kā muāinā karke tālā lagā diyā hai aur phir bhī koī us ghar meṅ dāḵẖil ho jāe to vah shām tak nāpāk rahegā. ⁴⁷jo aise ghar meṅ soe yā khānā khāe lāzim hai ki vah apne kapṛe dho le. ⁴⁸lekin agar ghar ko nae sire se palastar karne ke bād imām ā kar us kā dubārā muāinā kare aur dekhe ki phaphūṅdī dubārā nahīṅ niklī to is kā matlab hai ki phaphūṅdī ḵẖatm ho gaī hai. vah use pāk qarār de. ⁴⁹use gunāh se pāk-sāf karāne ke liye vah do parinde, deodār kī lakṛī, qirmizī raṅg kā dhāgā aur zūfā le le. ⁵⁰vah parindoṅ meṅ se ek ko tāzā pānī se bhare hue miṭṭī ke bartan ke ūpar zabah kare. ⁵¹is ke bād vah deodār kī lakṛī, zūfā, qirmizī raṅg kā dhāgā aur zindā parindā le kar us tāzā pānī meṅ ḍubo de jis ke sāth zabah kie hue parinde kā ḵẖūn milāyā gayā hai aur is pānī ko sāt bār ghar par chhiṛak de. ⁵²in chīzoṅ se vah ghar ko gunāh se pāk-sāf kartā hai. ⁵³āḵẖir meṅ vah zindā parinde ko ābādī ke bāhar khule maidān meṅ chhoṛ de. yūṅ vah ghar kā kaffārā degā, aur vah pāk-sāf ho jāegā.

^54-56 lāzim hai ki har qism kī vabāī bīmārī se aise nipṭo jaise bayān kiyā gayā hai, chāhe vah vabāī jildī bīmāriyāṅ hoṅ (maslan ḵẖārish, sūjan, papṛī yā safed dāġ), chāhe kapṛoṅ yā gharoṅ meṅ phaphūṅdī ho. ⁵⁷in usūloṅ ke tahat faislā karnā hai ki koī shaḵẖs yā chīz pāk hai yā nāpāk.”